മായാവി തോറ്റു യുഡിഎഫ് സ്ഥാനാർഥി പി.സി.ഭാസ്കരൻ കൂത്താട്ടുകുളത്ത് വിജയിച്ചു
കൂത്താട്ടുകുളം നഗരസഭയിലെ 26-ാം ഡിവിഷനിൽ കാലിടറി. വാശിയേറിയ മത്സരത്തിൽ യുഡിഎഫ് സ്ഥാനാർഥി പി.സി. ഭാസ്കരൻ വിജയിച്ചു.
അനില എം കൃഷ്ണൻ 
മായാവി തോറ്റു യുഡിഎഫ് സ്ഥാനാർഥി പി.സി.ഭാസ്കരൻ കൂത്താട്ടുകുളത്ത് വിജയിച്ചു
കൂത്താട്ടുകുളം: മഴവിൽ മനോരമയിലെ 'ഒരു ചിരി ഇരുചിരി ബംബർ ചിരി' അടക്കമുള്ള ടെലിവിഷൻ ഷോകളിലൂടെ പ്രേക്ഷകർക്ക് പ്രിയങ്കരനായ എൽഡിഎഫ് സ്ഥാനാർഥി 'മായാവി'ക്ക് കൂത്താട്ടുകുളം നഗരസഭയിലെ 26-ാം ഡിവിഷനിൽ കാലിടറി. വാശിയേറിയ മത്സരത്തിൽ യുഡിഎഫ് സ്ഥാനാർഥി പി.സി. ഭാസ്കരൻ വിജയിച്ചു.
സമൂഹമാധ്യമങ്ങളിലും ടിവി ഷോകളിലൂടെയും ശ്രദ്ധേയനായ മായയുടെ സ്ഥാനാർഥിത്വം ഏറെ കൗതുകമുണർത്തിയിരുന്നു. യഥാർത്ഥ പേര് മായ വി. എന്നായ സ്ഥാനാർഥി, അമ്മയുടെ പേരിന്റെ ആദ്യ അക്ഷരം (വാണി-V) കൂട്ടിച്ചേർത്താണ് 'മായാ വി' എന്ന പേര് സ്വീകരിച്ചത്. കുട്ടിക്കാലത്ത് ബാലരമയിലെ പ്രശസ്ത കഥാപാത്രമായ 'മായാവി'യുമായി ബന്ധപ്പെടുത്തി സുഹൃത്തുക്കൾ വിളിച്ച വിളിപ്പേര് പിന്നീട് താരപരിവേഷത്തിലേക്ക് എത്തിച്ചേരുകയായിരുന്നു.
സ്ഥാനാർത്ഥിത്വം പ്രഖ്യാപിച്ചതിന് പിന്നാലെത്തന്നെ സമൂഹമാധ്യമങ്ങളിൽ മായയെക്കുറിച്ചുള്ള ട്രോളുകൾ നിറഞ്ഞിരുന്നു. മമ്മൂട്ടി നായകനായ 'മായാവി' സിനിമയിലെ പോസ്റ്ററുകളും ഡയലോഗുകളും ഉപയോഗിച്ചുള്ള ട്രോളുകളായിരുന്നു കൂടുതലും പ്രചരിച്ചത്. ഈ ട്രോളുകളെ മായാവി ചിരിച്ചുകൊണ്ട് സ്വീകരിച്ചെങ്കിലും, തിരഞ്ഞെടുപ്പിലെ പരാജയത്തിന് ശേഷം അദ്ദേഹം പങ്കുവെച്ച സോഷ്യൽ മീഡിയ പോസ്റ്റ് ശ്രദ്ധേയമായി.
"ട്രോളുകളെ ചിരിച്ചുകൊണ്ട് രണ്ടു കൈയും നീട്ടി സ്വീകരിക്കുന്നു... എന്നാലും കൊന്നിട്ട് പോടെയ്" എന്നായിരുന്നു പരാജയത്തിന് പിന്നാലെ മായാവി സമൂഹമാധ്യമങ്ങളിൽ കുറിച്ചത്. രാഷ്ട്രീയത്തിൽ താൽക്കാലിക തിരിച്ചടി നേരിട്ടെങ്കിലും, കലാ-സാംസ്കാരിക രംഗത്ത് മായാവിയുടെ സാന്നിധ്യം തുടർന്നും സജീവമായി ഉണ്ടാകുമെന്നാണ് ആരാധകർ പ്രതീക്ഷിക്കുന്നത്.
