നിയമസഭാ തിരഞ്ഞെടുപ്പ് മുന്നൊരുക്കം മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ കേരളത്തിലെത്തി
കേരള നിയമസഭാ തിരഞ്ഞെടുപ്പ് ഒരുക്കങ്ങൾ വിലയിരുത്താൻ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറും സംഘവും കേരളത്തിലെത്തി. മൂന്ന് ദിവസത്തെ സന്ദർശനത്തിൽ ഉദ്യോഗസ്ഥരുമായി കൂടിക്കാഴ്ച നടത്തും.
അനില എം കൃഷ്ണൻ 
നിയമസഭാ തിരഞ്ഞെടുപ്പ്: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ കേരളത്തിലെത്തി; ഒരുക്കങ്ങൾ വിലയിരുത്തും
കൊച്ചി: കേരള നിയമസഭാ തിരഞ്ഞെടുപ്പിന്റെ മുന്നൊരുക്കങ്ങൾ നേരിട്ട് വിലയിരുത്തുന്നതിനായി കേന്ദ്ര മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറും സംഘവും കേരളത്തിലെത്തി. വ്യാഴാഴ്ച ഉച്ചയ്ക്ക് 3 മണിയോടെ നെടുമ്പാശ്ശേരി അന്താരാഷ്ട്ര വിമാനത്താവളത്തിലെത്തിയ അദ്ദേഹത്തെ സംസ്ഥാന മുഖ്യ തിരഞ്ഞെടുപ്പ് ഓഫീസർ രത്തൻ യു ഖേൽകർ സ്വീകരിച്ചു. തിരഞ്ഞെടുപ്പ് കമ്മീഷണർമാരായ ഡോ. എസ്.എസ്. സന്ധു, ഡോ. വിവേക് ജോഷി എന്നിവരും അദ്ദേഹത്തോടൊപ്പമുണ്ട്.
നെടുമ്പാശ്ശേരിയിൽ ജില്ലാ കളക്ടർ ജി. പ്രിയങ്ക, റൂറൽ എസ്.പി സുദർശൻ എന്നിവരും സ്വീകരണത്തിന് നേതൃത്വം നൽകി. പോലീസിന്റെ ഗാർഡ് ഓഫ് ഓണർ സ്വീകരിച്ച ശേഷം അദ്ദേഹം കൊച്ചി ഡർബാർ ഹാൾ ഗ്രൗണ്ട് സന്ദർശനത്തിനായി തിരിച്ചു. മാർച്ച് 7 വരെ നീണ്ടുനിൽക്കുന്ന മൂന്നു ദിവസത്തെ ഔദ്യോഗിക സന്ദർശനമാണ് കമ്മീഷൻ നടത്തുന്നത്.
പ്രധാന പരിപാടികൾ:
വിവിധ ജില്ലാ തിരഞ്ഞെടുപ്പ് ഓഫീസർമാർ, ബൂത്ത് ലെവൽ ഓഫീസർമാർ (BLO) എന്നിവരുമായി കൂടിക്കാഴ്ച നടത്തി തിരഞ്ഞെടുപ്പ് ഒരുക്കങ്ങൾ അദ്ദേഹം വിലയിരുത്തും. ഔദ്യോഗിക ചർച്ചകൾക്ക് പുറമെ, താൻ എറണാകുളം ജില്ലാ കളക്ടറായിരുന്ന കാലത്ത് നടപ്പിലാക്കിയ പ്രധാന വികസന പദ്ധതികൾ അദ്ദേഹം നേരിൽ കണ്ട് വിലയിരുത്തും.
നഗരത്തിലെ പ്രധാന കേന്ദ്രങ്ങളായ ദർബാർ ഹാൾ, മറൈൻ ഡ്രൈവ്, റെയിൻബോ ബ്രിഡ്ജ്, മ്യൂസിക്കൽ വാക്ക്-വേ, ഗോശ്രീ പാലം, ചെറായി ബീച്ച് എന്നിവയും സന്ദർശന പട്ടികയിലുണ്ട്. സന്ദർശനത്തിന്റെ അവസാന ദിവസമായ മാർച്ച് 7-ന് കൊച്ചി ഗ്രാൻഡ് ഹയാത്തിൽ വെച്ച് അദ്ദേഹം മാധ്യമങ്ങളെ കാണും.
