രാജ്യത്തെ ആദ്യ സമഗ്ര ആയുർവേദ ഗവേഷണ കേന്ദ്രം മുഖ്യമന്ത്രി ഉദ്ഘാടനം ചെയ്തു
കണ്ണൂരിലെ കല്യാട് സ്ഥാപിച്ച അന്താരാഷ്ട്ര ആയുർവേദ ഗവേഷണ കേന്ദ്രം (IRIA) മുഖ്യമന്ത്രി പിണറായി വിജയൻ നാടിന് സമർപ്പിച്ചു. പാരമ്പര്യ നാട്ടുവൈദ്യവും ആധുനിക ഗവേഷണവും സമന്വയിപ്പിക്കുന്ന രാജ്യത്തെ ആദ്യത്തെ സ്ഥാപനമാണിത്.
Angel Varghese 
കണ്ണൂർ: കേരളത്തിന്റെ ആരോഗ്യ-ശാസ്ത്ര മേഖലകളിൽ പുതിയ ചരിത്രം കുറിച്ചുകൊണ്ട് രാജ്യത്തെ ആദ്യത്തെ സമഗ്ര ആയുർവേദ ഗവേഷണ കേന്ദ്രമായ 'ഇൻ്റർനാഷനൽ റിസർച്ച് ഇൻസ്റ്റിറ്റ്യൂട്ട് ഓഫ് ആയുർവേദ' (IRIA) മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. കല്യാട് നടന്ന ചടങ്ങിൽ ഇൻസ്റ്റിറ്റ്യൂട്ട് നാടിന് സമർപ്പിച്ചുകൊണ്ട് സംസാരിക്കുകയായിരുന്നു അദ്ദേഹം.
കേരളത്തെ ഒരു ആഗോള ശാസ്ത്ര ഹബ്ബാക്കി മാറ്റുന്നതിന്റെ ഭാഗമാണ് ഈ സംരംഭമെന്ന് മുഖ്യമന്ത്രി പറഞ്ഞു. രാജ്യത്തെ ആദ്യ ഡിജിറ്റൽ യൂണിവേഴ്സിറ്റി, ഡിജിറ്റൽ സയൻസ് പാർക്ക്, വിഴിഞ്ഞം ട്രാൻസ്ഷിപ്പ്മെന്റ് പോർട്ട്, വാട്ടർ മെട്രോ എന്നിവയ്ക്ക് പിന്നാലെ ആയുർവേദ ഗവേഷണ രംഗത്തും കേരളം വിപ്ലവകരമായ ചുവടുവെപ്പാണ് നടത്തിയിരിക്കുന്നത്.
നാട്ടുവൈദ്യവും ആധുനിക ഗവേഷണവും കൈകോർക്കുന്നു
നമ്മുടെ പാരമ്പര്യ നാട്ടുവൈദ്യന്മാരുടെ അറിവുകൾ പുതിയ തലമുറയിലെ ഗവേഷകർക്ക് വലിയ കരുത്താകുമെന്ന് മുഖ്യമന്ത്രി ഓർമ്മിപ്പിച്ചു. നാട്ടുവൈദ്യത്തിന് പ്രത്യേക അംഗീകാരം നൽകുന്നതിനായി ഇൻസ്റ്റിറ്റ്യൂട്ടിന് രൂപം നൽകാൻ സർക്കാർ തീരുമാനിച്ചിട്ടുണ്ട്. പണ്ട് രഹസ്യമായി സൂക്ഷിച്ചിരുന്ന അറിവുകൾ ഇനി ശാസ്ത്രീയമായി പഠിക്കാനും വരുംതലമുറയ്ക്ക് കൈമാറാനും ഐആർഐഎ വേദിയാകും. ബിരുദം കഴിഞ്ഞിറങ്ങുന്ന ഡോക്ടർമാർക്ക് സസ്യങ്ങളെ തിരിച്ചറിയാനും പ്രായോഗിക ജ്ഞാനം നേടാനും സഹായകമായ രീതിയിൽ വലിയ ഔഷധത്തോട്ടം 300 ഏക്കറിലായി വികസിപ്പിക്കുമെന്നും അദ്ദേഹം കൂട്ടിച്ചേർത്തു.
ആരോഗ്യ വകുപ്പ് മന്ത്രി വീണാ ജോർജ് ചടങ്ങിൽ അധ്യക്ഷത വഹിച്ചു. ആയുർവേദ ചരിത്രത്തിലെ സുവർണ്ണ നിമിഷമാണിതെന്നും ജപ്പാൻ യൂണിവേഴ്സിറ്റി അടക്കമുള്ള അന്താരാഷ്ട്ര സ്ഥാപനങ്ങൾ ഗവേഷണ സഹകരണത്തിന് സന്നദ്ധത അറിയിച്ചിട്ടുണ്ടെന്നും മന്ത്രി പറഞ്ഞു. ചടങ്ങിൽ ഐആർഐഎ വെബ്സൈറ്റും മുഖ്യമന്ത്രി പ്രകാശനം ചെയ്തു.
വി. ശിവദാസൻ എം.പി, കെ.കെ. ശൈലജ ടീച്ചർ എം.എൽ.എ തുടങ്ങിയ ജനപ്രതിനിധികളും ഉന്നത ഉദ്യോഗസ്ഥരും ചടങ്ങിൽ പങ്കെടുത്തു. ആയുർവേദത്തെ അന്താരാഷ്ട്ര നിലവാരത്തിലുള്ള തെളിവധിഷ്ഠിത ചികിത്സാ രീതിയായി മാറ്റുകയാണ് ഈ ഗവേഷണ കേന്ദ്രത്തിന്റെ പ്രധാന ലക്ഷ്യം.
