കേരളം ആഗോള നിക്ഷേപ ഹബ്ബിലേക്ക് വ്യവസായ മന്ത്രി പി. രാജീവ്
കേരളം ആഗോള നിക്ഷേപ ഹബ്ബിലേക്ക് തിരുവനന്തപുരത്തും കൊച്ചിയിലും ജി.സി.സി സിറ്റികൾ വരുന്നു 1.18 ലക്ഷം കോടിയുടെ നിക്ഷേപ പദ്ധതികൾ വ്യവസായ മന്ത്രി പി. രാജീവ് വാർത്താസമ്മേളനത്തിൽ അറിയിച്ചു.
അനില എം കൃഷ്ണൻ 
കേരളം ആഗോള നിക്ഷേപ ഹബ്ബിലേക്ക്: തിരുവനന്തപുരത്തും കൊച്ചിയിലും ജി.സി.സി സിറ്റികൾ വരുന്നു; 1.18 ലക്ഷം കോടിയുടെ നിക്ഷേപ പദ്ധതികൾ
കൊച്ചി: കേരളത്തിന്റെ വ്യവസായ ഭൂമികയിൽ നിർണ്ണായക മാറ്റങ്ങൾ ലക്ഷ്യമിട്ട് തിരുവനന്തപുരത്തും കൊച്ചിയിലും ജി.സി.സി (ഗ്ലോബൽ കേപ്പബിലിറ്റി സെന്റർ) സിറ്റികൾ സ്ഥാപിക്കുന്നു. ദാവോസിൽ നടന്ന ലോക സാമ്പത്തിക ഫോറത്തിൽ (WEF) ഇതുസംബന്ധിച്ച താൽപര്യപത്രം ഒപ്പുവെച്ചതായി വ്യവസായ മന്ത്രി പി. രാജീവ് വാർത്താസമ്മേളനത്തിൽ അറിയിച്ചു. ലോകത്ത് ഏറ്റവുമധികം ജി.സി.സികൾ സ്ഥാപിച്ചിട്ടുള്ള എ.എൻ.എസ്.ആറുമായാണ് (ANSR) സംസ്ഥാന സർക്കാർ ധാരണയിലെത്തിയത്.
ചരിത്രപരമായ നേട്ടം
ചരിത്രത്തിലാദ്യമായാണ് ലോക സാമ്പത്തിക ഫോറത്തിൽ നിന്ന് കേരളം ഇത്രയധികം നിക്ഷേപം സമാഹരിക്കുന്നത്. ആകെ 1.18 ലക്ഷം കോടി രൂപയുടെ (14 ബില്യൺ യു.എസ് ഡോളർ) നിക്ഷേപ താൽപര്യപത്രങ്ങളാണ് ഒപ്പിട്ടത്. അമേരിക്ക, യു.കെ, ജർമ്മനി, സ്പെയിൻ തുടങ്ങി വിവിധ രാജ്യങ്ങളിൽ നിന്നുള്ള 27 പ്രമുഖ കമ്പനികൾ കേരളത്തിൽ നിക്ഷേപത്തിന് സന്നദ്ധത അറിയിച്ചു.
പ്രധാന നിക്ഷേപകർ:
ഗ്രീൻകോ ഗ്രൂപ്പ്: 10,000 കോടി രൂപ
രാംകി ഇൻഫ്രാസ്ട്രക്ചർ: 6,000 കോടി രൂപ (ഇക്കോ ടൗൺ, വ്യവസായ പാർക്ക്)
ആക്മെ ഗ്രൂപ്പ്: 5,000 കോടി രൂപ (ബാറ്ററി സ്റ്റോറേജ്)
കാനിസ് ഇൻ്റർനാഷണൽ: 2,500 കോടി രൂപ (എയ്റോസ്പേസ്)
സിഫി ടെക്നോളജീസ്: 1,000 കോടി രൂപ (ഡാറ്റ സെൻ്റർ)
തുടർനടപടികൾ വേഗത്തിലാക്കും
പദ്ധതികളുടെ നടത്തിപ്പിനായി പ്രത്യേക ഉദ്യോഗസ്ഥരെ ചുമതലപ്പെടുത്തുമെന്ന് മന്ത്രി പറഞ്ഞു. മെഡിക്കൽ വ്യവസായം, പുനരുപയോഗ ഊർജ്ജം, എമർജിങ് ടെക്നോളജി എന്നീ മേഖലകൾക്കാണ് മുൻഗണന. ഇന്ത്യയിൽ ഇ.എസ്.ജി (ESG) നയം അംഗീകരിച്ച ആദ്യ സംസ്ഥാനമെന്നത് നിക്ഷേപകരെ ആകർഷിക്കുന്നതിൽ വലിയ പങ്കുവഹിച്ചതായും അദ്ദേഹം കൂട്ടിച്ചേർത്തു. വ്യവസായ വകുപ്പ് അഡീ. ചീഫ് സെക്രട്ടറി എ.പി.എം മുഹമ്മദ് ഹനീഷും വാർത്താസമ്മേളനത്തിൽ പങ്കെടുത്തു.
