ഉന്നത വിദ്യാഭ്യാസ മേഖലയിൽ കേരളം മുന്നിൽ സി.ഇ.ടിയിൽ ജിയോ ടെക്നിക്കൽ റിസർച്ച് സെൻ്റർ ഉദ്ഘാടനം ചെയ്തു
കേരളത്തിലെ ഉന്നത വിദ്യാഭ്യാസ മേഖല തുല്യതയിലും സാമൂഹ്യനീതിയിലും മുന്നിലാണെന്ന് മന്ത്രി ആർ. ബിന്ദു. സി.ഇ.ടിയിൽ ജിയോ ടെക്നിക്കൽ റിസർച്ച് സെൻ്റർ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
Angel Varghese 
ഉന്നത വിദ്യാഭ്യാസ രംഗത്ത് കേരളം രാജ്യത്തിന് മാതൃക; സാമൂഹ്യനീതി ഉറപ്പാക്കുന്നതിൽ ബഹുദൂരം മുന്നിലെന്ന് മന്ത്രി ആർ. ബിന്ദു
തിരുവനന്തപുരം: തുല്യതയുടെയും സാമൂഹ്യ നീതിയുടെയും കാര്യത്തിൽ കേരളത്തിലെ ഉന്നത വിദ്യാഭ്യാസ മേഖല രാജ്യത്തിന് തന്നെ മാതൃകയാണെന്ന് ഉന്നത വിദ്യാഭ്യാസ-സാമൂഹ്യനീതി വകുപ്പ് മന്ത്രി ആർ. ബിന്ദു. തിരുവനന്തപുരം എൻജിനീയറിങ് കോളേജിൽ (CET) ജിയോ ടെക്നിക്കൽ റിസർച്ച് ആൻ്റ് ടെസ്റ്റിംഗ് സെൻ്ററിൻ്റെ ഉദ്ഘാടനവും പുതിയ മെൻസ് ഹോസ്റ്റലിൻ്റെ ശിലാസ്ഥാപനവും നിർവ്വഹിച്ച് സംസാരിക്കുകയായിരുന്നു മന്ത്രി.
ദേശീയ ഹയർ എഡ്യൂക്കേഷൻ സർവേ പ്രകാരം മറ്റ് സംസ്ഥാനങ്ങളെ അപേക്ഷിച്ച് മികച്ച അധ്യാപക-വിദ്യാർത്ഥി അനുപാതമാണ് കേരളത്തിലുള്ളതെന്ന് മന്ത്രി ചൂണ്ടിക്കാട്ടി. ഗവേഷണ മേഖലയെ ശക്തിപ്പെടുത്തുന്നതിനാണ് സർക്കാർ ഇപ്പോൾ മുൻഗണന നൽകുന്നത്. ഇതിനായി പത്തിലധികം 'സെൻ്റർ ഓഫ് എക്സലൻസ്' നിലവിൽ പ്രവർത്തിക്കുന്നുണ്ട്. നാടിനാവശ്യമായ പുതിയ സാങ്കേതികവിദ്യകളും ഉൽപ്പന്നങ്ങളും വികസിപ്പിക്കുന്നതിനായി റിസർച്ച് ഇൻഫ്രാസ്ട്രക്ചർ കൂടുതൽ മെച്ചപ്പെടുത്തുമെന്നും മന്ത്രി കൂട്ടിച്ചേർത്തു.
ഗവേഷകർക്കായി ഒരു ലക്ഷം രൂപയുടെ പോസ്റ്റ് ഡോക്ടറൽ ഫെല്ലോഷിപ്പും, മറ്റ് ആനുകൂല്യങ്ങൾ ലഭിക്കാത്തവർക്ക് പ്രതിമാസം 15,000 രൂപയുടെ ഫെല്ലോഷിപ്പും സർക്കാർ നൽകുന്നുണ്ട്. സി.ഇ.ടിയുടെ വികസന പ്രവർത്തനങ്ങൾക്ക് സർക്കാർ പൂർണ്ണ പിന്തുണ നൽകുമെന്നും നൂതന ആശയങ്ങളുമായി വിദ്യാർത്ഥികൾ മുന്നോട്ട് വരണമെന്നും മന്ത്രി ആവശ്യപ്പെട്ടു.
വികസന കുതിപ്പിൽ സി.ഇ.ടി
പ്ലാൻ ഫണ്ടിൽ നിന്നും 11 കോടി രൂപ ചെലവഴിച്ചാണ് ജിയോ ടെക്നിക്കൽ റിസർച്ച് ആൻ്റ് ടെസ്റ്റിംഗ് സെൻ്റർ നിർമ്മിച്ചിരിക്കുന്നത്. അഞ്ച് നിലകളിലായി 7960 ചതുരശ്ര മീറ്റർ വിസ്തീർണ്ണത്തിലാണ് ഈ അത്യാധുനിക ലാബ് സജ്ജമാക്കിയിരിക്കുന്നത്. കൂടാതെ, കിഫ്ബിയിൽ നിന്നും 17.58 കോടി രൂപ ചെലവിൽ 150 വിദ്യാർത്ഥികൾക്ക് താമസിക്കാവുന്ന പുതിയ മെൻസ് ഹോസ്റ്റലിൻ്റെ നിർമ്മാണവും ആരംഭിച്ചു.
ചടങ്ങിൽ കടകംപള്ളി സുരേന്ദ്രൻ എം.എൽ.എ അധ്യക്ഷത വഹിച്ചു. കിഫ്ബി വഴി സംസ്ഥാനത്ത് ഒരു ലക്ഷം കോടിയുടെ വികസന പ്രവർത്തനങ്ങളാണ് നടന്നുവരുന്നതെന്ന് അദ്ദേഹം പറഞ്ഞു. പാങ്ങപ്പാറ വാർഡ് കൗൺസിലർ ദീപ സുരേഷ്, സാങ്കേതിക വിദ്യാഭ്യാസ ഡയറക്ടർ ഡോ. ജയപ്രകാശ് പി., പി.ഡബ്ല്യു.ഡി എക്സിക്യൂട്ടീവ് എൻജിനീയർ മുത്തുകുമാർ, പ്രിൻസിപ്പൽ ഡോ. സുരേഷ് കെ. എന്നിവർ ചടങ്ങിൽ സംബന്ധിച്ചു.
