കുരിശിലെ കണ്ണീർ ക്രിസ്തുവിന്റെ ത്യാഗസ്മരണയുമായി സിജിമോൻ ജോർജിന്റെ പുതിയ ഗാനം പുറത്തിറങ്ങി
മുൻ പോലീസ് ഓഫീസർ സിജിമോൻ ജോർജ് രചിച്ച കുരിശിലെ കണ്ണീർ എന്ന ഗാനം റിലീസായി. ക്രിസ്തുവിന്റെ പീഡാനുഭവങ്ങളെ ആസ്പദമാക്കി തയ്യാറാക്കിയ ഗാനത്തിന്റെ വിശേഷങ്ങൾ വായിക്കാം.
P R Sumeran 
ക്രിസ്തുവിന്റെ പീഡാനുഭവ സ്മരണയുമായി സിജിമോൻ ജോർജിന്റെ ‘കുരിശിലെ കണ്ണീർ’ റിലീസായി
തിരുവനന്തപുരം: മുൻ പോലീസ് ഉദ്യോഗസ്ഥനും കായികതാരവുമായ സിജിമോൻ ജോർജ് രചന നിർവ്വഹിച്ച പുതിയ ഭക്തിഗാനം ‘കുരിശിലെ കണ്ണീർ’ റിലീസായി. യേശുക്രിസ്തുവിന്റെ ക്രൂശിത രൂപം തന്റെ മനസ്സിൽ ഏൽപ്പിച്ച ആഴത്തിലുള്ള ചിന്തകളും അനുഭവങ്ങളുമാണ് ഈ ഗാനത്തിന് പിന്നിലെന്ന് സിജിമോൻ ജോർജ് പറഞ്ഞു.
മനുഷ്യന്റെ പാപങ്ങളും വേദനകളും സ്വയം ഏറ്റുവാങ്ങി കുരിശിലേറ്റപ്പെട്ട മഹാത്യാഗത്തിന്റെ സ്മരണയാണ് ഈ ഗാനം പങ്കുവെക്കുന്നത്. ഇതൊരു മതപരമായ സൃഷ്ടിയല്ലെന്നും, സ്നേഹത്തിന്റെ പാതയിലേക്ക് മനുഷ്യഹൃദയങ്ങളെ നയിക്കാനുള്ള ഒരു എളിയ ശ്രമമാണെന്നും അദ്ദേഹം തന്റെ ഫേസ്ബുക്ക് കുറിപ്പിലൂടെ വ്യക്തമാക്കി.
"ഞാനൊരു കവിയോ സാഹിത്യകാരനോ അല്ല. ഒരു പോലീസ് ഓഫീസറായിരുന്ന എന്റെ മനസ്സിൽ പതിഞ്ഞ ക്രൂശിത രൂപത്തിന്റെ വേദനകളാണ് ദൈവകൃപയാൽ വരികളായി മാറിയത്. ഓരോ വരിയിലും സ്നേഹത്തിന്റെ സാക്ഷ്യമുണ്ട്," സിജിമോൻ ജോർജ് കുറിച്ചു. ആത്മാവിനെ തൊടുന്ന ഒരു നിശബ്ദ പ്രാർത്ഥനയായി ഈ ഗാനത്തെ ഏറ്റെടുക്കണമെന്ന് അദ്ദേഹം അഭ്യർത്ഥിച്ചു.
