ഗണേഷ് കുമാറിനെതിരെ കോഴി പോസ്റ്റർ പ്രതിഷേധം തമ്പാനൂരിൽ പോലീസും യൂത്ത് കോൺഗ്രസും തമ്മിൽ സംഘർഷം

ഗണേഷ് കുമാറിനെതിരെ 'കോഴി' പോസ്റ്ററുമായി യൂത്ത് കോൺഗ്രസ്; തമ്പാനൂരിൽ സംഘർഷം

​തിരുവനന്തപുരം: കുടുംബപ്രശ്നങ്ങളുമായി ബന്ധപ്പെട്ട വെളിപ്പെടുത്തലുകളുടെ പശ്ചാത്തലത്തിൽ ഗതാഗതമന്ത്രി കെ.ബി. ഗണേഷ് കുമാറിനെതിരെ പ്രതിഷേധം ശക്തമാക്കി യൂത്ത് കോൺഗ്രസ്. മന്ത്രിയുടെയും കോഴിയുടെയും ചിത്രം പതിച്ച പോസ്റ്ററുകൾ കെ.എസ്.ആർ.ടി.സി ബസ്സുകളിൽ ഒട്ടിച്ചായിരുന്നു പ്രതിഷേധം. തമ്പാനൂർ ബസ് സ്റ്റേഷനിൽ വെച്ച് യൂത്ത് കോൺഗ്രസ് പ്രവർത്തകർ ഒട്ടിച്ച പോസ്റ്ററുകൾ പോലീസ് ഇളക്കിമാറ്റാൻ ശ്രമിച്ചത് സംഘർഷത്തിന് വഴിതെളിച്ചു.

​മന്ത്രി ഗണേഷ് കുമാറിനെ മന്ത്രിസഭയിൽ നിന്ന് പുറത്താക്കണമെന്നാണ് യൂത്ത് കോൺഗ്രസിന്റെ ആവശ്യം. തന്റെ കിടപ്പുമുറിയിൽ മന്ത്രിയെ മറ്റൊരു സ്ത്രീക്കൊപ്പം കണ്ടെന്നും, ഇതിന്റെ ദൃശ്യങ്ങൾ പകർത്താൻ ശ്രമിച്ചപ്പോൾ മന്ത്രിയുടെ സഹായികൾ തന്നെ തടഞ്ഞുവെച്ചെന്നും ഭാര്യ ബിന്ദു മേനോൻ വെളിപ്പെടുത്തിയതാണ് പുതിയ വിവാദങ്ങൾക്ക് തിരികൊളുത്തിയത്. ഇതോടെ മന്ത്രി രാജി വെക്കണമെന്ന് പ്രതിപക്ഷം ആവശ്യപ്പെട്ടെങ്കിലും താൻ രാജി വെക്കില്ലെന്ന നിലപാടിലാണ് ഗണേഷ് കുമാർ.

​അതേസമയം, ഗണേഷ് കുമാർ മാപ്പപേക്ഷിച്ചെന്നും അതിനാൽ പരാതിയുമായി മുന്നോട്ടില്ലെന്നും ബിന്ദു മേനോൻ പിന്നീട് മാധ്യമങ്ങളെ അറിയിച്ചെങ്കിലും ഉന്നയിച്ച ആരോപണങ്ങൾ തള്ളിക്കളഞ്ഞിട്ടില്ല. ഈ സംഭവത്തിൽ മന്ത്രിയുടെ ഭാര്യയ്ക്കെതിരെ നടന്ന കുറ്റകൃത്യം അറിഞ്ഞിട്ടും പോലീസിനെ അറിയിക്കാതിരുന്ന മുഖ്യമന്ത്രിയുടെ മകൾ വീണ വിജയൻ, ബിജെപി കൗൺസിലറും മുൻ ഡിജിപിയുമായ ആർ. ശ്രീലേഖ എന്നിവർക്കെതിരെ യൂത്ത് കോൺഗ്രസ് വർക്കിങ് പ്രസിഡന്റ് ബിനു ചുള്ളിയിൽ ഡിജിപിക്ക് പരാതി നൽകിയിട്ടുണ്ട്.