യാത്രക്കാർക്ക് ആശ്വാസം മൂവാറ്റുപുഴ കെ.എസ്.ആർ.ടി.സി ഡിപ്പോയിൽ റെഡ് ക്രോസ് വക ശുദ്ധജല വിതരണ പദ്ധതി
മൂവാറ്റുപുഴ കെ.എസ്.ആർ.ടി.സി ഡിപ്പോയിൽ യാത്രക്കാർക്കായി ഇന്ത്യൻ റെഡ് ക്രോസ് സൊസൈറ്റി സ്ഥാപിച്ച വാട്ടർ പ്യൂരിഫയർ പദ്ധതി നഗരസഭ ചെയർപേഴ്സൺ ജോയ്സ് മേരി ആന്റണി ഉദ്ഘാടനം ചെയ്തു.
അനില എം കൃഷ്ണൻ 
മൂവാറ്റുപുഴ കെ.എസ്.ആർ.ടി.സി സ്റ്റാൻഡിൽ ഇനി ശുദ്ധജലം; റെഡ് ക്രോസ് സൊസൈറ്റിയുടെ വാട്ടർ പ്യൂരിഫയർ സ്ഥാപിച്ചു
മൂവാറ്റുപുഴ: പുതുക്കിപ്പണിത മൂവാറ്റുപുഴ കെ.എസ്.ആർ.ടി.സി ഡിപ്പോയിലെത്തുന്ന യാത്രക്കാർക്ക് ഇനി ആശ്വാസമായി ശുദ്ധീകരിച്ച കുടിവെള്ളം ലഭ്യമാകും. ഇന്ത്യൻ റെഡ് ക്രോസ് സൊസൈറ്റി മൂവാറ്റുപുഴ താലൂക്ക് ബ്രാഞ്ചിന്റെ നേതൃത്വത്തിൽ ഡിപ്പോയിൽ സ്ഥാപിച്ച പുതിയ വാട്ടർ പ്യൂരിഫയർ പദ്ധതി നഗരസഭ ചെയർപേഴ്സൺ ജോയ്സ് മേരി ആന്റണി ഉദ്ഘാടനം ചെയ്തു.
റെഡ് ക്രോസ് താലൂക്ക് ചെയർമാൻ ജോർജ് എബ്രഹാം ചടങ്ങിൽ അധ്യക്ഷത വഹിച്ചു. പൊതുജനങ്ങൾക്കും യാത്രക്കാർക്കും ഏറെ പ്രയോജനപ്പെടുന്ന ഈ പദ്ധതി സന്നദ്ധ പ്രവർത്തന രംഗത്ത് റെഡ് ക്രോസ് നടത്തുന്ന മികച്ച ഇടപെടലുകളിൽ ഒന്നാണെന്ന് ചെയർപേഴ്സൺ പറഞ്ഞു.
ദുരിതമനുഭവിക്കുന്നവർക്കും രോഗികൾക്കും കൈത്താങ്ങായി പ്രവർത്തിക്കുന്ന റെഡ് ക്രോസ് മൂവാറ്റുപുഴ യൂണിറ്റ്, തങ്ങളുടെ പ്രവർത്തനങ്ങൾ കൂടുതൽ മേഖലകളിലേക്ക് വ്യാപിപ്പിക്കുകയാണ്. പാലിയേറ്റീവ് കെയർ, ദുരന്തനിവാരണം തുടങ്ങി വൈവിധ്യമാർന്ന സേവനങ്ങളിലൂടെ നഗര-ഗ്രാമ വ്യത്യാസമില്ലാതെ ജനങ്ങളുടെ ആശ്രയമായി മാറാൻ സംഘടനയ്ക്ക് സാധിക്കുന്നുണ്ടെന്ന് ഭാരവാഹികൾ വ്യക്തമാക്കി.
ചടങ്ങിൽ റെഡ് ക്രോസ് താലൂക്ക് സെക്രട്ടറി പി.ജെ. മത്തായി, ട്രഷറർ ചാർലി ജെയിംസ്, വൈസ് ചെയർമാൻ എൽദോ ബാബു വട്ടക്കാവൻ, മാനേജിംഗ് കമ്മിറ്റിയംഗങ്ങളായ ജേക്കബ് തോമസ്, ജെയിംസ് മാത്യു, ചിന്നമ്മ വർഗീസ് എന്നിവർ പങ്കെടുത്തു. കൂടാതെ നഗരസഭ കൗൺസിലർമാരായ ജിനു ആന്റണി മഠത്തിക്കണ്ടം, ഷീബ റാണി തോമസ്, ഷമീന പി.ഇ., മനുപോൾ, ഷേർളി പൗലോസ് എന്നിവരും സന്നിഹിതരായിരുന്നു. കെ.എസ്.ആർ.ടി.സി മൂവാറ്റുപുഴ എ.ടി.ഒ എൻ.പി. രാജേഷ് ചടങ്ങിൽ സംസാരിച്ചു.
