ദേശീയപാത ഉദ്ഘാടനം മന്ത്രി റിയാസിനെ ഒഴിവാക്കി രാഷ്ട്രീയ വിവേചനമെന്ന് കേരള സർക്കാർ

​ദേശീയപാത ഉദ്ഘാടനം: മന്ത്രി റിയാസിന് ക്ഷണമില്ല; അവഗണനയെന്ന് സംസ്ഥാന സർക്കാർ, ചടങ്ങ് ബഹിഷ്കരിക്കാൻ മന്ത്രിമാർ

​കൊച്ചി: പ്രധാനമന്ത്രി നരേന്ദ്ര മോദി പങ്കെടുക്കുന്ന ദേശീയപാത പദ്ധതികളുടെ ഉദ്ഘാടന ചടങ്ങിൽ നിന്ന് പൊതുമരാമത്ത് മന്ത്രി പി.എ. മുഹമ്മദ് റിയാസിനെ ഒഴിവാക്കിയതിനെച്ചൊല്ലി വിവാദം പുകയുന്നു. സ്ഥലമേറ്റെടുപ്പിലടക്കം സംസ്ഥാന സർക്കാർ നിർണായക പങ്കുവഹിച്ച പദ്ധതിയുടെ ചടങ്ങിൽ മന്ത്രിയെ വിളിക്കാത്തത് രാഷ്ട്രീയ ലക്ഷ്യത്തോടെയാണെന്ന് സർക്കാർ ആരോപിച്ചു. പ്രതിഷേധസൂചകമായി മുഖ്യമന്ത്രി പിണറായി വിജയനും മന്ത്രി എം.ബി. രാജേഷും ചടങ്ങിൽ പങ്കെടുക്കില്ല.

​ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ പങ്കെടുക്കുന്ന പരിപാടിയിൽ നിന്ന് വകുപ്പ് മന്ത്രിയെത്തന്നെ ഒഴിവാക്കിയത് ജനാധിപത്യത്തിന് ഭൂഷണമല്ലെന്ന് മന്ത്രി മുഹമ്മദ് റിയാസ് പ്രതികരിച്ചു. യുഡിഎഫ് ഭരണകാലത്ത് ദേശീയപാത അതോറിറ്റി ഓഫിസ് പോലും പൂട്ടിപ്പോയ അവസ്ഥയിലായിരുന്നെന്നും എൽഡിഎഫ് സർക്കാർ അധികാരത്തിൽ വന്ന ശേഷമാണ് പദ്ധതിക്ക് ജീവൻ വെച്ചതെന്നും അദ്ദേഹം ഓർമ്മിപ്പിച്ചു. ദേശീയപാത വികസനത്തിനായി ചരിത്രത്തിലാദ്യമായി 5600 കോടി രൂപ സംസ്ഥാനം ചിലവഴിച്ചതായും മന്ത്രി കൂട്ടിച്ചേർത്തു.

​മന്ത്രി എം.ബി. രാജേഷും കേന്ദ്ര നിലപാടിനെതിരെ രൂക്ഷമായ വിമർശനം ഉന്നയിച്ചു. കഴിഞ്ഞ ദിവസം തിരുവനന്തപുരത്ത് നടന്ന ചടങ്ങിൽ പങ്കെടുത്തപ്പോൾ എസ്പിജി ആധാർ കാർഡ് ചോദിച്ചു തടഞ്ഞുവെച്ച അനുഭവം അദ്ദേഹം പങ്കുവെച്ചു. ഇത്തരം പരിപാടികളിൽ പങ്കെടുത്ത് സമയം കളയാനില്ലെന്ന് അദ്ദേഹം വ്യക്തമാക്കി.

​ഇന്ന് ഉച്ചയ്ക്ക് 1.15-ന് കലൂർ സ്റ്റേഡിയത്തിൽ നടക്കുന്ന ചടങ്ങിൽ 10,800 കോടി രൂപയുടെ വികസന പദ്ധതികൾക്കാണ് പ്രധാനമന്ത്രി തുടക്കം കുറിക്കുന്നത്. എൻഎച്ച് 66-ലെ തലപ്പാടി-ചെങ്കള ആറുവരിപ്പാതയും കോഴിക്കോട് ബൈപാസിന്റെ വെങ്ങളം–രാമനാട്ടുകര ആറുവരിപ്പാതയും ഇതിൽ ഉൾപ്പെടുന്നു. ബിപിസിഎൽ കൊച്ചി റിഫൈനറിയിലെ പോളിപ്രൊപ്പിലിൻ പ്ലാന്റിനും പ്രധാനമന്ത്രി തറക്കല്ലിടും.