ക്രിസ്മസ് വിപണി കീഴടക്കാൻ സപ്ലൈകോ

ക്രിസ്മസ് വിപണി കീഴടക്കാൻ സപ്ലൈകോ. സബ്സിഡി സാധനങ്ങൾക്ക് വില കുറയും, ആവേശമായി 'സാന്റാ ഓഫർ'

​ ക്രിസ്മസ്-പുതുവത്സരത്തോടനുബന്ധിച്ച് സംസ്ഥാനത്ത് സപ്ലൈകോയുടെ പ്രത്യേക ഫെയറുകൾക്ക് തുടക്കമായി. ഡിസംബർ 22 മുതൽ ജനുവരി 1 വരെയാണ് ഫെയറുകൾ പ്രവർത്തിക്കുക. ആറ് ജില്ലകളിൽ പ്രത്യേകമായി സജ്ജീകരിച്ചിട്ടുള്ള മൈതാനങ്ങളിലാണ് പ്രധാന ഫെയറുകൾ നടക്കുന്നത്. ഇതിനുപുറമെ സംസ്ഥാനത്തെ എല്ലാ താലൂക്കുകളിലും ഓരോ പ്രധാന വിൽപനശാല വീതം ക്രിസ്മസ് ഫെയറുകളായി പ്രവർത്തിക്കും.

​പ്രധാന പ്രത്യേകതകൾ:

​ഫെയർ നടക്കുന്ന സ്ഥലങ്ങൾ: തിരുവനന്തപുരം പുത്തരിക്കണ്ടം മൈതാനം, കൊല്ലം ആശ്രാമം മൈതാനം, പത്തനംതിട്ട റോസ് മൗണ്ട് ഓഡിറ്റോറിയം, കോട്ടയം തിരുനക്കര മൈതാനം, എറണാകുളം മറൈൻഡ്രൈവ്, തൃശ്ശൂർ തേക്കിൻകാട് മൈതാനം.

​വെളിച്ചെണ്ണ വില കുറഞ്ഞു: സബ്സിഡി നിരക്കിൽ 319 രൂപയ്ക്ക് നൽകിയിരുന്ന ശബരി വെളിച്ചെണ്ണ ഇനി 309 രൂപയ്ക്ക് ലഭിക്കും. ഡിസംബർ, ജനുവരി മാസങ്ങളിൽ കാർഡ് ഒന്നിന് രണ്ട് ലിറ്റർ വീതം ലഭിക്കും. സബ്സിഡി ഇതര വെളിച്ചെണ്ണ ലിറ്ററിന് 329 രൂപയ്ക്കും ലഭ്യമാണ്.

​വിലക്കുറവിൽ നിത്യോപയോഗ സാധനങ്ങൾ: ഉഴുന്ന്, കടല, വൻപയർ, തുവര പരിപ്പ് എന്നിവയുടെ സബ്സിഡി വില കുറച്ചു. ജനുവരി മാസത്തെ സബ്സിഡി സാധനങ്ങൾ ഉപഭോക്താക്കൾക്ക് മുൻകൂറായി വാങ്ങാം.

​സാന്റാ ഓഫർ കിറ്റ്: കേക്ക്, പഞ്ചസാര, തേയില, പായസം മിക്സ് തുടങ്ങി 12 ഇനങ്ങൾ അടങ്ങിയ 667 രൂപയുടെ കിറ്റ് വെറും 500 രൂപയ്ക്ക് ലഭിക്കും. 500 രൂപയ്ക്ക് മുകളിൽ സബ്സിഡി ഇതര സാധനങ്ങൾ വാങ്ങുന്നവർക്ക് ഒരു കിലോ ഉപ്പ് ഒരു രൂപയ്ക്ക് നൽകുന്നതാണ്.

​ഇന്ധന കൂപ്പൺ: സപ്ലൈകോ പെട്രോൾ പമ്പുകളിൽ നിന്ന് ഇന്ധനം അടിക്കുന്നവർക്ക് 50 രൂപയുടെ ഡിസ്കൗണ്ട് കൂപ്പൺ ലഭിക്കും. 1000 രൂപയ്ക്ക് സബ്സിഡി ഇതര സാധനങ്ങൾ വാങ്ങുമ്പോൾ ഈ കൂപ്പൺ ഉപയോഗിക്കാം.

​പ്രമുഖ ബ്രാൻഡുകളുടെ ഉൽപ്പന്നങ്ങൾക്ക് 5 മുതൽ 50 ശതമാനം വരെ വിലക്കുറവും ഈ ഫെയറുകളുടെ പ്രത്യേകതയാണ്.