ക്യാമ്പസുകളെ കാലത്തിനനുസരിച്ച് സജ്ജമാക്കും മന്ത്രി റോജി എം ജോൺ
തൊഴിൽ മേഖലയിലെ മാറ്റങ്ങൾക്കനുസരിച്ച് ക്യാമ്പസുകളെ സജ്ജമാക്കാൻ ഗ്ലോബൽ ജോബ് വാച്ച് ടവർ പദ്ധതിയുമായി ഉന്നത വിദ്യാഭ്യാസ വകുപ്പ്. കോഴിക്കോട് കോളേജ് ഓഫ് അപ്ലൈഡ് സയൻസിൽ പദ്ധതി ഉദ്ഘാടനം ചെയ്തു.
Angel Varghese 
ക്യാമ്പസുകളിൽ കാലോചിതമായ മാറ്റങ്ങൾ: ഗ്ലോബൽ ജോബ് വാച്ച് ടവർ പദ്ധതിയുമായി സർക്കാർ; 'ഇൻഡസ്ട്രി ഓൺ ക്യാമ്പസ്' ഉദ്ഘാടനം ചെയ്തു
കോഴിക്കോട്: ലോകത്ത് തൊഴിൽ മേഖലയിലുണ്ടാകുന്ന ദ്രുതഗതിയിലുള്ള മാറ്റങ്ങൾ മുൻകൂട്ടി കണ്ട് കോഴ്സുകൾ രൂപപ്പെടുത്തുമെന്നും ക്യാമ്പസുകളെ അതിനനുസരിച്ച് സജ്ജമാക്കുമെന്നും ഉന്നത വിദ്യാഭ്യാസ വകുപ്പ് മന്ത്രി റോജി എം. ജോൺ പറഞ്ഞു. കോഴിക്കോട് കോളേജ് ഓഫ് അപ്ലൈഡ് സയൻസിൽ ഐ.എച്ച്.ആർ.ഡി (IHRD) നടപ്പിലാക്കുന്ന 'ഇൻഡസ്ട്രി ഓൺ ക്യാമ്പസ്' പദ്ധതിയുടെ ഉദ്ഘാടനം നിർവഹിക്കുകയായിരുന്നു അദ്ദേഹം.
വിദ്യാഭ്യാസ രംഗത്ത് മുന്നിട്ടുനിൽക്കുന്ന കേരളത്തിന് അതിന്റെ ഗുണഫലങ്ങൾ തൊഴിൽ മേഖലയിൽ പൂർണ്ണമായി പ്രയോജനപ്പെടുത്താൻ സാധിക്കുന്നില്ലെന്ന് മന്ത്രി ചൂണ്ടിക്കാട്ടി. മൊബൈൽ സോഫ്റ്റ്വെയറുകൾ അപ്ഡേറ്റ് ചെയ്യപ്പെടുന്ന വേഗത്തിൽ വിദ്യാഭ്യാസ മേഖലയും മാറേണ്ടതുണ്ട്. വ്യവസായ സ്ഥാപനങ്ങളും വിദ്യാഭ്യാസ സ്ഥാപനങ്ങളും തമ്മിലുള്ള അകലം കുറയ്ക്കുക എന്നതാണ് സർക്കാരിന്റെ പ്രധാന ലക്ഷ്യം. ഇതിന്റെ ഭാഗമായാണ് 'ഗ്ലോബൽ ജോബ് വാച്ച് ടവർ' പദ്ധതി ആവിഷ്കരിച്ചിരിക്കുന്നത്.
വിദ്യാർഥികളിൽ പ്രായോഗിക പരിജ്ഞാനവും സംരംഭകത്വ മനോഭാവവും വളർത്തുക എന്നതാണ് ഇൻഡസ്ട്രി ഓൺ ക്യാമ്പസ് പദ്ധതിയിലൂടെ ലക്ഷ്യമിടുന്നത്. അഡ്വ. കെ. ജയന്ത് എം.എൽ.എ ചടങ്ങിൽ അധ്യക്ഷത വഹിച്ചു. ഐ.എച്ച്.ആർ.ഡി അഡീഷണൽ ഡയറക്ടർ ഡോ. വി.എ. അരുൺകുമാർ, കോർപ്പറേഷൻ കൗൺസിലർ ശ്രീജ സി. നായർ, പ്രിൻസിപ്പൽ എ. സുമിത, ഡോ. ജി. അനിൽകുമാർ തുടങ്ങിയവർ പങ്കെടുത്തു.
