ഹയർസെക്കൻഡറി തുല്യത പരീക്ഷ ജൂലൈ 10 മുതൽ കണ്ണൂരിൽ ജയിൽ അന്തേവാസികൾ ഉൾപ്പെടെ 993 പേർ എഴുതും
സാക്ഷരത മിഷന്റെ ഹയർസെക്കൻഡറി തുല്യത പരീക്ഷ ജൂലൈ 10 മുതൽ ആരംഭിക്കും. കണ്ണൂർ ജില്ലയിൽ സെൻട്രൽ ജയിലിലെ അന്തേവാസികൾ ഉൾപ്പെടെ 993 പേരാണ് ഇത്തവണ പരീക്ഷ എഴുതുന്നത്
അനില എം കൃഷ്ണൻ 
ഹയർസെക്കൻഡറി തുല്യത പരീക്ഷ ജൂലൈ 10 മുതൽ; കണ്ണൂരിൽ ജയിൽ അന്തേവാസികൾ ഉൾപ്പെടെ 993 പേർ എഴുതും
കണ്ണൂർ: സംസ്ഥാന സാക്ഷരത മിഷൻ പൊതുവിദ്യാഭ്യാസ വകുപ്പുമായി ചേർന്ന് നടത്തുന്ന ഹയർസെക്കൻഡറി തുല്യത പരീക്ഷ ജൂലൈ 10-ന് ആരംഭിക്കും. കണ്ണൂർ ജില്ലയിൽ ഇത്തവണ ആകെ 993 ഉദ്യോഗാർത്ഥികളാണ് പരീക്ഷ എഴുതുന്നത്. ഇതിൽ 455 പേർ ഒന്നാം വർഷ പരീക്ഷയും 538 പേർ രണ്ടാം വർഷ പരീക്ഷയുമാണ് എഴുതുന്നതെന്ന് ജില്ലാ ഇൻഫർമേഷൻ ഓഫീസ് അറിയിച്ചു. പരീക്ഷ എഴുതുന്നവരിൽ വലിയൊരു പങ്ക് സ്ത്രീകളാണ്—782 സ്ത്രീകൾ പരീക്ഷയ്ക്ക് ഹാജരാകുമ്പോൾ 211 പുരുഷന്മാരാണ് ലിസ്റ്റിലുള്ളത്.
സമൂഹത്തിന്റെ വിവിധ തുറകളിൽ ഉള്ളവർക്ക് വിദ്യാഭ്യാസം ഉറപ്പാക്കുന്ന തുല്യത പരീക്ഷയിൽ കണ്ണൂർ സെൻട്രൽ ജയിലിലെ എട്ട് അന്തേവാസികളും ഇത്തവണ പങ്കാളികളാകുന്നുണ്ട്. കൂടാതെ അഞ്ച് ജനപ്രതിനിധികളും, ഭിന്നശേഷിക്കാരായ 14 പേരും പരീക്ഷ എഴുതുന്നു. പരീക്ഷാർത്ഥികളിൽ പട്ടികജാതി വിഭാഗത്തിൽപ്പെട്ട 31 പേരും പട്ടികവർഗ വിഭാഗത്തിൽപ്പെട്ട 28 പേരും ഉൾപ്പെടുന്നു.
ജില്ലയിൽ ആകെ എട്ട് പരീക്ഷാ കേന്ദ്രങ്ങളാണ് ഇതിനായി സജ്ജീകരിച്ചിരിക്കുന്നത്:
ഗവ. ഹയർ സെക്കൻഡറി സ്കൂൾ മാത്തിൽ
ഗവ. വൊക്കേഷണൽ ഹയർസെക്കൻഡറി സ്കൂൾ മാടായി
മൂത്തേടത്ത് ഹയർസെക്കൻഡറി സ്കൂൾ തളിപ്പറമ്പ്
ഗവ. ഹയർസെക്കൻഡറി സ്കൂൾ പള്ളിക്കുന്ന്
ഗവ. ഹയർസെക്കൻഡറി സ്കൂൾ ചാവശ്ശേരി
ഹയർസെക്കൻഡറി സ്കൂൾ മട്ടന്നൂർ
ഗവ. ഹയർസെക്കൻഡറി സ്കൂൾ കൂത്തുപറമ്പ്
ഗവ. ബ്രണ്ണൻ ഹയർസെക്കൻഡറി സ്കൂൾ തലശ്ശേരി
തുല്യത പരീക്ഷയ്ക്കായുള്ള എല്ലാ ഒരുക്കങ്ങളും കേന്ദ്രങ്ങളിൽ പൂർത്തിയായതായി അധികൃതർ വ്യക്തമാക്കി
