സിബിഐ ഡയറക്ടർ തിരഞ്ഞെടുപ്പ് പ്രതിപക്ഷ നേതാവ് റബ്ബർ സ്റ്റാമ്പ് അല്ല പ്രധാനമന്ത്രിക്ക് കത്തെഴുതി രാഹുൽ ഗാന്ധി.
സിബിഐ ഡയറക്ടർ തിരഞ്ഞെടുപ്പ് പ്രക്രിയയിലെ അതൃപ്തി അറിയിച്ച് പ്രധാനമന്ത്രി നരേന്ദ്ര മോദിക്ക് രാഹുൽ ഗാന്ധി കത്തയച്ചു. വിവരങ്ങൾ കൈമാറാത്തത് തിരഞ്ഞെടുപ്പിനെ പരിഹസിക്കലാണെന്ന് അദ്ദേഹം ആരോപിച്ചു.
Angel Varghese 
സിബിഐ ഡയറക്ടർ തിരഞ്ഞെടുപ്പ്: നടപടികളിൽ കടുത്ത അതൃപ്തിയുമായി രാഹുൽ ഗാന്ധി; പ്രധാനമന്ത്രിക്ക് കത്തെഴുതി
ന്യൂഡൽഹി: സിബിഐ ഡയറക്ടറെ തിരഞ്ഞെടുക്കുന്നതിനുള്ള നടപടിക്രമങ്ങളിൽ കടുത്ത വിയോജിപ്പും അതൃപ്തിയും പ്രകടിപ്പിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി പ്രധാനമന്ത്രി നരേന്ദ്ര മോദിക്ക് കത്തെഴുതി. തിരഞ്ഞെടുപ്പ് പ്രക്രിയ സുതാര്യമല്ലെന്നും പ്രതിപക്ഷ നേതാവിനെ വെറുമൊരു ‘റബ്ബർ സ്റ്റാമ്പ്’ ആയി കാണാൻ അനുവദിക്കില്ലെന്നും അദ്ദേഹം വ്യക്തമാക്കി. സോഷ്യൽ മീഡിയ പ്ലാറ്റ്ഫോമായ എക്സിലൂടെയാണ് (X) അദ്ദേഹം തന്റെ നിലപാട് പരസ്യപ്പെടുത്തിയത്.
ഭരണഘടനാപരമായ ഉത്തരവാദിത്തങ്ങളിൽ നിന്ന് ഒഴിഞ്ഞുമാറാൻ തനിക്ക് കഴിയില്ലെന്ന് വ്യക്തമാക്കിയ രാഹുൽ ഗാന്ധി, നിലവിലെ രീതി തിരഞ്ഞെടുപ്പ് പ്രക്രിയയെ പരിഹസിക്കുന്നതിന് തുല്യമാണെന്ന് ആരോപിച്ചു. സിബിഐ മേധാവിയെ തിരഞ്ഞെടുക്കുന്ന മൂന്നംഗ സമിതിയിൽ പ്രധാനമന്ത്രി നരേന്ദ്ര മോദി, സുപ്രീം കോടതി ചീഫ് ജസ്റ്റിസ് സൂര്യകാന്ത് എന്നിവർക്കൊപ്പം രാഹുൽ ഗാന്ധിയും അംഗമാണ്.
യോഗ്യരായ ഉദ്യോഗാർത്ഥികളുടെ പട്ടികയും അവരുടെ പൂർണ്ണമായ റിപ്പോർട്ടുകളും ലഭ്യമാക്കണമെന്ന് ആവർത്തിച്ച് രേഖാമൂലം ആവശ്യപ്പെട്ടിട്ടും സർക്കാർ അത് നൽകാൻ തയ്യാറായില്ലെന്ന് കത്തിൽ പറയുന്നു. വിവരങ്ങൾ മറച്ചുവെക്കുന്നത് തിരഞ്ഞെടുപ്പ് പ്രക്രിയയുടെ വിശ്വാസ്യതയെ ബാധിക്കുമെന്നും, പക്ഷപാതപരമായ ഇത്തരം നടപടികളിൽ പങ്കുചേരാൻ തനിക്ക് കഴിയില്ലെന്നും രാഹുൽ ഗാന്ധി കൂട്ടിച്ചേർത്തു. കേന്ദ്ര ഏജൻസികളുടെ തലപ്പത്തെ നിയമനങ്ങളിൽ പ്രതിപക്ഷത്തിന്റെ ശബ്ദത്തിന് അർഹമായ പ്രാധാന്യം നൽകുന്നില്ലെന്ന വികാരം ഉയർത്തിക്കാട്ടുന്നതാണ് രാഹുലിന്റെ പുതിയ നീക്കം.
