ലഹരി മാഫിയക്കെതിരെ കൈകോർത്ത് മന്ത്രി ടി സിദ്ധീഖും സിനിമാതാരം അബു സലിമും വയനാട്ടിൽ തൂഫാൻ വാരിയർ ബാഡ്ജ് വിതരണം ചെയ്തു

ലഹരി മാഫിയക്കെതിരെ കൈകോർത്ത് മന്ത്രി ടി സിദ്ധീഖും സിനിമാതാരം അബു സലിമും; വയനാട്ടിൽ 'തൂഫാൻ വാരിയർ' ബാഡ്ജ് വിതരണം ചെയ്തു

​കൽപ്പറ്റ: സംസ്ഥാനത്ത് ലഹരി മാഫിയയുടെ പ്രവർത്തനങ്ങൾ പൂർണ്ണമായും ഇല്ലാതാക്കുമെന്ന് കൃഷി വകുപ്പ് മന്ത്രി അഡ്വ. ടി സിദ്ധീഖ് പറഞ്ഞു. ഇതിനായി പോലീസ്-എക്സൈസ് വകുപ്പുകളുടെ നേതൃത്വത്തിൽ നടപ്പിലാക്കുന്ന 'ഓപ്പറേഷൻ തൂഫാൻ', 'ഓപ്പറേഷൻ തണ്ടർ' പദ്ധതികൾ കൂടുതൽ കാര്യക്ഷമമാക്കുകയാണ്. അന്താരാഷ്ട്ര ലഹരി വിരുദ്ധ ദിനത്തോടനുബന്ധിച്ച് വയനാട് ജില്ലയിൽ എക്സൈസ്, പോലീസ് വകുപ്പുകളുടെ ആഭിമുഖ്യത്തിൽ സംഘടിപ്പിച്ച ജില്ലാതല ലഹരി വിരുദ്ധ ബോധവത്കരണ പരിപാടികൾ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

​ലഹരിയുടെ കരാളഹസ്തത്തിൽ നിന്നും യുവതലമുറയെ രക്ഷിച്ചെടുക്കാൻ ശക്തമായ ഇടപെടലുകളാണ് സർക്കാർ നടത്തുന്നത്. ലഹരിയുടെ ഉറവിടം തേടിയുള്ള അന്വേഷണങ്ങളും കടുത്ത നിയമനടപടികളും തുടരുകയാണ്. സംസ്ഥാനത്ത് ഇതുവരെ 3,790 കേസുകളിലായി നാലായിരത്തിലധികം പേരെ അറസ്റ്റ് ചെയ്തിട്ടുണ്ട്. വയനാട് ജില്ലയിൽ കഴിഞ്ഞ ഒരു മാസത്തിനിടെ 35 ഓളം മയക്കുമരുന്ന് കേസുകൾ രജിസ്റ്റർ ചെയ്യുകയും 36 പേരെ അറസ്റ്റ് ചെയ്യുകയും ചെയ്തു. ഇതിനുപുറമെ അബ്കാരി കേസുകളും നിരോധിത പുകയില ഉത്പന്നങ്ങളുമായി ബന്ധപ്പെട്ട 233 കേസുകളും റിപ്പോർട്ട് ചെയ്തിട്ടുണ്ടെന്ന് മന്ത്രി വ്യക്തമാക്കി. അന്താരാഷ്ട്ര ബ്ലാക്ക് ബിസിനസ് ലോബികൾ കേരളത്തെ മയക്കുമരുന്ന് ഹബ്ബാക്കാൻ ശ്രമിക്കുകയാണെന്നും, ഇതിനെതിരെ അയൽ സംസ്ഥാന ഏജൻസികളുടെ ഉൾപ്പെടെ ഏകോപനം സർക്കാർ ഉറപ്പാക്കിയിട്ടുണ്ടെന്നും അദ്ദേഹം കൂട്ടിച്ചേർത്തു.

​വിദ്യാർത്ഥികളിൽ കൃഷി ലഹരിയാക്കാൻ മിഷൻ

ജില്ലയിലെ സ്കൂളുകളിൽ 'കതിർ ക്ലബ്ബുകൾ' ആരംഭിച്ച് വിദ്യാർത്ഥികളിൽ കൃഷി ഒരു ലഹരിയാക്കി മാറ്റുന്നതിനുള്ള പുതിയ മിഷൻ കൃഷി വകുപ്പ് നടപ്പിലാക്കുമെന്നും മന്ത്രി പ്രഖ്യാപിച്ചു. സ്കൂളുകളിൽ ഇതിനായി നോഡൽ അധ്യാപകരെ ചുമതലപ്പെടുത്തി വീടുകളിൽ കൃഷി ചെയ്യുന്നതിനുള്ള നടപടികൾ സ്വീകരിക്കും. സ്ഥാപനങ്ങളുടെയും വിദ്യാലയങ്ങളുടെയും പരിസരങ്ങളിൽ ലഹരി മാഫിയ പിടിമുറുക്കാൻ അനുവദിക്കില്ലെന്നും മന്ത്രി വ്യക്തമാക്കി. പരിപാടിയുടെ ഭാഗമായി നടന്ന ലഹരി വിരുദ്ധ റാലി മന്ത്രി ഫ്ലാഗ് ഓഫ് ചെയ്തു.

​കൽപ്പറ്റ പുതിയ ബസ് സ്റ്റാൻഡ് പരിസരത്ത് നടന്ന എക്സൈസ് വകുപ്പിന്റെ പരിപാടിയിൽ ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ അധ്യക്ഷത വഹിച്ചു. വിмуക്തി മാനേജരും അസിസ്റ്റന്റ് എക്സൈസ് കമ്മീഷണറുമായ സജിത്ത് ചന്ദ്രൻ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. എസ്.കെ.എം.ജെ സ്കൂൾ വിദ്യാർത്ഥികൾ ഫ്ലാഷ് മോബ് അവതരിപ്പിച്ചു. കൽപ്പറ്റ നഗരസഭാ ചെയർപേഴ്സൺ പി. വിശ്വനാഥൻ, ഡെപ്യൂട്ടി എക്സൈസ് കമ്മീഷണർ പി.കെ. സതീഷ് കുമാർ തുടങ്ങിയവർ സംസാരിച്ചു.

​പോലീസ് വകുപ്പിന്റെ ആഭിമുഖ്യത്തിൽ നടന്ന ചടങ്ങിൽ 'തൂഫാൻ വാരിയർ ബാഡ്ജ്' വിതരണവും ലഹരി വിരുദ്ധ സന്ദേശവും ജില്ലാ പോലീസ് മേധാവി ദേവമനോഹർ നിർവഹിച്ചു. മന്ത്രി ടി. സിദ്ധീഖ്, സിനിമാതാരം അബു സലിം, ജനപ്രതിനിധികൾ എന്നിവർ ബാഡ്ജ് ഏറ്റുവാങ്ങി. ഇന്ത്യൻ ക്രിക്കറ്റ് താരം സജന സജീവൻ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. ചടങ്ങിൽ ചുണ്ട ആർ.സി.എച്ച്.എസ്. സ്കൂൾ വിദ്യാർത്ഥികൾ ലഹരി വിരുദ്ധ മൈം അവതരിപ്പിച്ചു. അഡീഷണൽ പോലീസ് സൂപ്രണ്ട് കെ.എസ് ഷാജി, കൽപ്പറ്റ പോലീസ് ഇൻസ്പെക്ടർ ടി.പി ദിനേഷ് എന്നിവർ പങ്കെടുത്തു.