യുഡിഎഫ് വിജയത്തിന്റെ രാജശിൽപി കെ.സി. വേണുഗോപാൽ; സതീശന് അഭിനന്ദനം വെള്ളാപ്പള്ളി നടേശൻ
കേരള നിയമസഭാ തിരഞ്ഞെടുപ്പിലെ യുഡിഎഫ് വിജയത്തിന്റെ ക്രെഡിറ്റ് കെ.സി. വേണുഗോപാലിന് നൽകി വെള്ളാപ്പള്ളി നടേശൻ. വി.ഡി. സതീശന്റെ ഭരണത്തിന് ആശംസകൾ നേർന്ന അദ്ദേഹം ചെന്നിത്തലയുടെ അവസരം നഷ്ടപ്പെട്ടതിലും പ്രതികരിച്ചു.
Angel Varghese 
യുഡിഎഫ് വിജയത്തിന്റെ രാജശിൽപി കെ.സി. വേണുഗോപാൽ; വി.ഡി. സതീശന് ആശംസകളുമായി വെള്ളാപ്പള്ളി നടേശൻ
തിരുവനന്തപുരം: കേരള നിയമസഭാ തിരഞ്ഞെടുപ്പിൽ യുഡിഎഫ് ഉജ്ജ്വല വിജയത്തിന് പിന്നിലെ പ്രധാന ബുദ്ധികേന്ദ്രം കെ.സി. വേണുഗോപാലാണെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. തന്ത്രങ്ങൾ മെനയുന്നതിലും വിഭവസമാഹരണത്തിലും കെ.സി. വേണുഗോപാൽ പുലർത്തിയ മികവാണ് മുന്നണിയെ വിജയത്തിലേക്ക് നയിച്ചതെന്നും അദ്ദേഹം കൂട്ടിച്ചേർത്തു.
വിജയത്തിന്റെ യഥാർത്ഥ ശിൽപി കെ.സി. വേണുഗോപാലാണെന്ന് വെള്ളാപ്പള്ളി വിശേഷിപ്പിച്ചു. "കെ.സി. മോശക്കാരനല്ല. ആളും അർത്ഥവും കൊണ്ടും, കൃത്യമായ നയരൂപീകരണത്തിലൂടെയും തിരഞ്ഞെടുപ്പ് തന്ത്രങ്ങളിലൂടെയും വലിയ സ്വാധീനം ചെലുത്താൻ അദ്ദേഹത്തിന് സാധിച്ചു. സമ്പത്തായാലും ബുദ്ധിയായാലും യുഡിഎഫിന്റെ വിജയത്തിൽ വേണുഗോപാലിന്റെ പങ്ക് നിർണ്ണായകമാണ്," വെള്ളാപ്പള്ളി പറഞ്ഞു.
പുതിയ മുഖ്യമന്ത്രിയായി തിരഞ്ഞെടുക്കപ്പെട്ട വി.ഡി. സതീശനെ വെള്ളാപ്പള്ളി അഭിനന്ദിച്ചു. സാമൂഹിക നീതിയിലധിഷ്ഠിതമായ ഭരണം കാഴ്ചവെക്കാൻ അദ്ദേഹത്തിന് സാധിക്കട്ടെ എന്ന് അദ്ദേഹം ആശംസിച്ചു. കഴിഞ്ഞ അഞ്ചുവർഷം പ്രതിപക്ഷത്തിരുന്ന് ഭരണപക്ഷത്തെ ക്രിയാത്മകമായി വിമർശിക്കാനും ജനമനസ്സുകൾ കീഴടക്കാനും സതീശന് കഴിഞ്ഞിട്ടുണ്ടെന്നും അത് ചെറിയ കാര്യമല്ലെന്നും അദ്ദേഹം ഓർമ്മിപ്പിച്ചു.
അതേസമയം, രമേശ് ചെന്നിത്തലയെക്കുറിച്ച് പരാമർശിക്കവെ, അദ്ദേഹത്തിന് അർഹമായ പല അവസരങ്ങളും കപ്പിനും ചുണ്ടിനും ഇടയിൽ നഷ്ടപ്പെടുകയാണെന്ന് വെള്ളാപ്പള്ളി നിരീക്ഷിച്ചു. സീനിയോറിറ്റിയും പ്രവർത്തന പരിചയവും കണക്കിലെടുത്ത് ചെന്നിത്തല മുഖ്യമന്ത്രിയാകുമെന്ന് പലരും കരുതിയിരുന്നതായും അദ്ദേഹം കൂട്ടിച്ചേർത്തു.
