പിണറായി വിജയൻ ആദ്യമായി പ്രതിപക്ഷ നേതൃസ്ഥാനത്തേക്ക്

കേരളത്തിൽ ഭരണമാറ്റം. മുഖ്യമന്ത്രിയായി വി.ഡി. സതീശനെ കോൺഗ്രസ് തിരഞ്ഞെടുത്തപ്പോൾ, പത്തു വർഷത്തെ ഭരണത്തിന് ശേഷം പിണറായി വിജയൻ പ്രതിപക്ഷ നേതാവായി സഭയിലെത്തും.

Angel Varghese

May 14, 2026 - 20:49

പിണറായി വിജയൻ ആദ്യമായി പ്രതിപക്ഷ നേതൃസ്ഥാനത്തേക്ക്

പിണറായി വിജയൻ പ്രതിപക്ഷ നേതാവായി സഭയിലെത്തും.

പ്രതിപക്ഷ നേതാവായി പിണറായി വിജയൻ

തിരുവനന്തപുരം: കേരള രാഷ്ട്രീയത്തിൽ അപ്രതീക്ഷിത മാറ്റങ്ങൾ കുറിച്ചുകൊണ്ട് പുതിയ ഭരണ-പ്രതിപക്ഷ നേതൃത്വങ്ങൾ ചുമതലയേൽക്കുന്നു. യു.ഡി.എഫ് അധികാരത്തിൽ വന്നതോടെ വി.ഡി. സതീശനെ പുതിയ മുഖ്യമന്ത്രിയായി കോൺഗ്രസ് തിരഞ്ഞെടുത്തു. ഇതിന് പിന്നാലെ, നിയമസഭയിൽ പ്രതിപക്ഷത്തെ നയിക്കാൻ പിണറായി വിജയനെ സി.പി.എം സംസ്ഥാന സമിതി ഐകകണ്ഠ്യേന തീരുമാനിച്ചു.

തുടർച്ചയായ പത്തു വർഷം മുഖ്യമന്ത്രി പദവിയിലിരുന്ന ശേഷമാണ് പിണറായി വിജയൻ പ്രതിപക്ഷ നിരയിലേക്ക് മാറുന്നത്. ഇതാദ്യമായാണ് അദ്ദേഹം പ്രതിപക്ഷ നേതാവെന്ന ഉത്തരവാദിത്തം ഏറ്റെടുക്കുന്നത് എന്നത് ശ്രദ്ധേയമാണ്. നിയമസഭാ തിരഞ്ഞെടുപ്പിൽ തിരിച്ചടിയുണ്ടായെങ്കിലും, പാർട്ടിക്ക് കരുത്തുപകരാൻ പിണറായി വിജയന്റെ അനുഭവസമ്പത്ത് അനിവാര്യമാണെന്ന വിലയിരുത്തലിലാണ് സി.പി.എം സംസ്ഥാന സമിതി ഈ തീരുമാനമെടുത്തത്. കരുത്തുറ്റ ഒരു പ്രതിപക്ഷമായി സഭയിൽ സർക്കാരിനെ നേരിടാനാണ് ഇടത് മുന്നണിയുടെ നീക്കം.