​രഹസ്യങ്ങളുടെ നിഗൂഢ ലോകവുമായി നാഗബന്ധം റിലീസ് തീയതി പ്രഖ്യാപിച്ച് പുത്തൻ പോസ്റ്റർ പുറത്തുവിട്ടു

ഓരോ മുഖത്തും ഓരോ കഥ; രഹസ്യങ്ങളുടെ നിഗൂഢ ലോകവുമായി ‘നാഗബന്ധം’ ജൂലൈ 3-ന് തിയേറ്ററുകളിലേക്ക്

 കൊച്ചി: ഓരോ മുഖവും ഓരോ കഥകൾ ഒളിപ്പിക്കുമ്പോൾ, എല്ലാ നിഴലുകളും ഓരോ രഹസ്യങ്ങൾ സൂക്ഷിക്കുന്നു എന്ന ആകാംഷയുണർത്തുന്ന കുറിപ്പോടെ പാൻ ഇന്ത്യൻ തെലുങ്ക് ചിത്രം ‘നാഗബന്ധം’ തിയേറ്ററുകളിലേക്ക്. അഭിഷേക് നാമ രചനയും സംവിധാനവും നിർവ്വഹിക്കുന്ന വിരാട് കർണ്ണ ചിത്രം 2026 ജൂലൈ 3-ന് ആഗോളതലത്തിൽ റിലീസ് ചെയ്യും. ചിത്രത്തിന്റെ റിലീസ് തീയതി ഒരിക്കൽ കൂടി ഉറപ്പിച്ചു കൊണ്ടുള്ള ഗംഭീരമായ പുത്തൻ പോസ്റ്റർ അണിയറ പ്രവർത്തകർ പുറത്തുവിട്ടു. യോദ്ധാക്കൾ മുതൽ സഞ്ചാരികൾ വരെയും, വിശുദ്ധർ മുതൽ അതിജീവിച്ചവർ വരെയും അടങ്ങുന്ന നാഗബന്ധത്തിന്റെ നിഗൂഢ ലോകം വ്യക്തമാക്കുന്നതാണ് പുതിയ പോസ്റ്റർ.

​എൻഐകെ സ്റ്റുഡിയോസ്, അഭിഷേക് പിക്ചേഴ്സ് എന്നിവയുടെ ബാനറിൽ കിഷോർ അന്നപുറെഡ്ഡി, നിഷിത നാഗിറെഡ്ഡി എന്നിവർ ചേർന്ന് നിർമ്മിക്കുന്ന ചിത്രം അവതരിപ്പിക്കുന്നത് ലക്ഷ്മി ഇറയും, ദേവാൻഷ് നാമയും ചേർന്നാണ്. താരക് സിനിമാസ് ആണ് ചിത്രത്തിന്റെ സഹനിർമ്മാതാക്കൾ.

​വമ്പൻ നിർമ്മാണ സ്കെയിലും ലോകോത്തര സാങ്കേതിക നിലവാരവുമുള്ള ഒരു പാൻ-ഇന്ത്യൻ ദൃശ്യവിരുന്നായാണ് ചിത്രം ഒരുങ്ങുന്നത്. ഇന്ത്യൻ സിനിമയിലെ പുരാണ സാഹസിക (Mythological Adventure) വിഭാഗത്തെ ഈ ചിത്രം പുനർനിർവചിക്കുമെന്നാണ് സിനിമാ ലോകത്തിന്റെ പ്രതീക്ഷ. ഹോളിവുഡ് നിലവാരത്തിലുള്ള സ്റ്റണ്ട് സീക്വൻസുകൾ ഒരുക്കുന്നതിനായി അന്താരാഷ്ട്ര പ്രശസ്തി നേടിയ പ്രശസ്ത ആക്ഷൻ ഡയറക്ടർ വ്ലാഡ് റിംബർഗ് ആണ് ചിത്രത്തിന്റെ ആക്ഷൻ രംഗങ്ങൾ കൈകാര്യം ചെയ്തിരിക്കുന്നത്.

​പുരാതന ക്ഷേത്രങ്ങളും നിഗൂഢ ലോകങ്ങളും വലിയ യുദ്ധ രംഗങ്ങളും ഉൾപ്പെടുത്തി, ഒരു ആഗോള സിനിമാറ്റിക് അനുഭവം പ്രേക്ഷകർക്ക് സമ്മാനിക്കാൻ അത്യാധുനിക വിഷ്വൽ ഇഫക്റ്റുകളാണ് (VFX) ചിത്രത്തിൽ ഉപയോഗിച്ചിരിക്കുന്നത്. ചിത്രത്തിൻ്റെ പോസ്റ്റ്-പ്രൊഡക്ഷൻ, വിഎഫ്എക്സ് ജോലികൾ നിലവിൽ പൂർണ്ണ വേഗതയിൽ പുരോഗമിക്കുകയാണ്.

​വലിയ ബിസിനസ്സ് സാധ്യതകളാണ് റിലീസിന് മുന്നേ തന്നെ ചിത്രം സ്വന്തമാക്കിയിട്ടുള്ളത്. പ്രമുഖ ഇന്ത്യൻ വിനോദ പ്ലാറ്റ്ഫോം ആയ സീ സ്റ്റുഡിയോസ് ചിത്രത്തിന്റെ ഉത്തരേന്ത്യൻ തിയേറ്റർ വിതരണ അവകാശങ്ങൾ സ്വന്തമാക്കി. ഹിന്ദി വിപണികളിൽ വൻതോതിലുള്ള റിലീസിനാണ് കമ്പനി പദ്ധതിയിടുന്നത്. സ്ട്രീമിംഗ് ഭീമനായ ആമസോൺ പ്രൈം വീഡിയോ ചിത്രത്തിന്റെ ഒടിടി (OTT) അവകാശങ്ങളും, സ്റ്റാർ മാ തെലുങ്ക് സാറ്റലൈറ്റ് അവകാശങ്ങളും സ്വന്തമാക്കിയതായാണ് റിപ്പോർട്ടുകൾ.

​പുരാതന രഹസ്യങ്ങൾ, മറഞ്ഞിരിക്കുന്ന നിധികൾ, ദിവ്യശക്തികൾ, മറന്നുപോയ ഇതിഹാസങ്ങൾ എന്നിവയുടെ പശ്ചാത്തലത്തിൽ കഥ പറയുന്ന ചിത്രത്തിൽ നഭാ നടേഷ്, ഐശ്വര്യ മേനോൻ, ദക്ഷ നാഗർക്കർ എന്നിവരാണ് നായികമാർ. മഹേഷ് മഞ്ജരേക്കർ, ജഗപതി ബാബു, റിഷഭ് സാഹ്നി, ഗരുഡ റാം, ജയപ്രകാശ്, മുരളി ശർമ, അനസൂയ ഭരദ്വാജ്, ബി. എസ്. അവിനാഷ് എന്നിവരും പ്രധാന വേഷങ്ങളിൽ എത്തുന്നു. ആത്മീയതയും ആവേശകരമായ സാഹസികതയും സംയോജിപ്പിച്ച് ഒരുക്കുന്ന ഈ ചിത്രം തെലുങ്ക്, ഹിന്ദി, തമിഴ്, കന്നഡ, മലയാളം എന്നീ അഞ്ച് ഭാഷകളിൽ ഒരേസമയം പ്രദർശനത്തിനെത്തും.

​സൌന്ദർ രാജൻ എസ് ഛായാഗ്രഹണവും, അഭേയും ജുനൈദ് കുമാറും ചേർന്ന് സംഗീതവും നിർവ്വഹിക്കുന്നു. ആർ. സി. പനവ് ആണ് എഡിറ്റർ. വിഎഫ്എക്സ് ഡയറക്ടർ കൂടിയായ അഭിഷേക് നാമയുടെ മേൽനോട്ടത്തിൽ റെഡ് ചില്ലീസിലെ കെൻ മെറ്റ്സ്കർ ആണ് കളറിംഗ് നിർവ്വഹിക്കുന്നത്. സിങ്ക് സിനിമാസ് സൗണ്ട് ഡിസൈനും M.R. രാജാകൃഷ്ണൻ ഓഡിയോഗ്രഫിയും കൈകാര്യം ചെയ്യുന്നു.