ട്വന്റി 20 സ്ഥാനാർഥി പട്ടിക പ്രഖ്യാപിച്ചു; വീണാ നായരും ലക്ഷ്മി പ്രിയയും മത്സരരംഗത്ത്
ഏറ്റുമാനൂരിൽ വീണാ നായരും പെരുമ്പാവൂരിൽ ലക്ഷ്മി പ്രിയയും ട്വന്റി 20 സ്ഥാനാർഥികളാകും. അഞ്ജലി നായർ തൃപ്പൂണിത്തുറയിലും പ്രോമി കുര്യാക്കോസ് അങ്കമാലിയിലും മത്സരിക്കും.
അനില എം കൃഷ്ണൻ 
ട്വന്റി 20 സ്ഥാനാർഥി പട്ടിക പുറത്ത്; വീണാ നായരും ലക്ഷ്മി പ്രിയയും ഉൾപ്പെടെ വൻ താരനിര
കൊച്ചി: വരാനിരിക്കുന്ന നിയമസഭാ തിരഞ്ഞെടുപ്പിൽ താരപ്പൊലിമയുമായി ട്വന്റി 20. കിഴക്കമ്പലത്ത് നടന്ന വാർത്താസമ്മേളനത്തിൽ ട്വന്റി 20 ചീഫ് കോർഡിനേറ്റർ സാബു ജേക്കബാണ് പ്രമുഖ സിനിമാ താരങ്ങളെ ഉൾപ്പെടുത്തിയുള്ള സ്ഥാനാർഥി പട്ടിക പ്രഖ്യാപിച്ചത്. നടിമാരായ വീണാ നായർ, ലക്ഷ്മി പ്രിയ, അഞ്ജലി നായർ എന്നിവർ വിവിധ മണ്ഡലങ്ങളിൽ ജനവിധി തേടും.
പ്രധാന സ്ഥാനാർഥികൾ ഇവരാണ്:
ഏറ്റുമാനൂർ: നടി വീണാ നായർ.
പെരുമ്പാവൂർ: നടി ലക്ഷ്മി പ്രിയ.
തൃപ്പൂണിത്തുറ: നടി അഞ്ജലി നായർ.
അങ്കമാലി: സോഷ്യൽ മീഡിയ ഇൻഫ്ളുവൻസർ പ്രോമി കുര്യാക്കോസ്.
വിദ്യാഭ്യാസ കാലഘട്ടത്തിൽ എസ്.എഫ്.ഐ പ്രവർത്തകയായിരുന്നുവെന്ന് സ്ഥാനാർഥിത്വം പ്രഖ്യാപിക്കപ്പെട്ട ശേഷം വീണാ നായർ പറഞ്ഞു. അഭിനയ ജീവിതത്തിനിടയിലും സാമൂഹിക വിഷയങ്ങളിൽ ഇടപെട്ടിരുന്നുവെന്നും ട്വന്റി 20 വഴി കൂടുതൽ സേവനങ്ങൾ ജനങ്ങളിലേക്ക് എത്തിക്കാൻ കഴിയുമെന്നും അവർ പ്രത്യാശ പ്രകടിപ്പിച്ചു.
കഴിഞ്ഞ പത്ത് വർഷമായി ബി.ജെ.പി വേദികളിലെ സജീവ സാന്നിധ്യമായിരുന്ന ലക്ഷ്മി പ്രിയ പെരുമ്പാവൂരിലാണ് മത്സരിക്കുന്നത്. താര സംഘടനയായ 'അമ്മ'യുടെ വൈസ് പ്രസിഡന്റ് കൂടിയാണ് ഇവർ. തൃപ്പൂണിത്തുറയിലെ ജനങ്ങളുടെ ആവശ്യങ്ങൾക്കായി ഒപ്പമുണ്ടാകുമെന്ന് അഞ്ജലി നായരും പ്രതികരിച്ചു. പ്രമുഖ താരങ്ങളുടെ വരവോടെ മണ്ഡലങ്ങളിൽ ശക്തമായ ചതുഷ്കോണ മത്സരത്തിനാണ് വഴി തെളിഞ്ഞിരിക്കുന്നത്.
