പ്രിയദർശിനി സർവീസുകൾ തിരിച്ചടിയായി ഇരുന്നൂറോളം സ്വകാര്യ ബസുകൾ ‘ജി ഫോം’ നൽകി സർവീസ് നിർത്തുന്നു
കനത്ത സാമ്പത്തിക പ്രതിസന്ധിയെത്തുടർന്ന് തൃശൂർ ജില്ലയിലെ ഇരുന്നൂറോളം സ്വകാര്യ ബസുകൾ സർവീസ് നിർത്തലാക്കാൻ ഒരുങ്ങുന്നു. നികുതി ഒഴിവാക്കുന്നതിനായി ജൂലൈ ഒന്നിനകം മോട്ടർ വാഹന വകുപ്പിന് ‘ജി ഫോം’ സമർപ്പിക്കാനാണ് ബസുടമകളുടെ തീരുമാനം
അനില എം കൃഷ്ണൻ 
നഷ്ടം സഹിക്കാനാകുന്നില്ല; തൃശൂരിൽ ഇരുന്നൂറോളം സ്വകാര്യ ബസുകൾ ‘ജി ഫോം’ സമർപ്പിച്ച് സർവീസ് നിർത്താനൊരുങ്ങുന്നു
തൃശൂർ: കനത്ത കളക്ഷൻ കുറവും ഇന്ധനവില വർധനവും മൂലം പ്രതിസന്ധിയിലായ തൃശൂർ ജില്ലയിലെ ഇരുന്നൂറോളം സ്വകാര്യ ബസുകൾ സർവീസ് നിർത്താനൊരുങ്ങുന്നു. നിശ്ചിത കാലയളവിൽ വാഹനം റോഡിലിറക്കില്ലെന്ന് മോട്ടർ വാഹന വകുപ്പിനെ മുൻകൂട്ടി അറിയിക്കുന്ന ‘ജി ഫോം’ സമർപ്പിച്ച് നികുതി ഒഴിവാക്കാനാണ് ബസുടമകളുടെ തീരുമാനം. രണ്ടാമത്തെ ക്വാർട്ടർ കാലാവധി ജൂൺ 30-ന് അവസാനിക്കുന്ന സാഹചര്യത്തിൽ, ജൂലൈ ഒന്നിനകം ജി ഫോം സമർപ്പിക്കാനാണ് ഉടമകൾ തയാറെടുക്കുന്നത്. 10 ബസുകൾ ഇതിനോടകം തന്നെ ഫോം നൽകിക്കഴിഞ്ഞതായി കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്സ് ഓർഗനൈസേഷൻ ജില്ലാ ജനറൽ സെക്രട്ടറി വി.എസ്. പ്രദീപ് അറിയിച്ചു.
തൃശൂരിൽ നിന്ന് പാലക്കാട്, ഗോവിന്ദാപുരം, കൊഴിഞ്ഞാമ്പാറ റൂട്ടുകളിലും ചാലക്കുടി–മാള, കൊടുങ്ങല്ലൂർ–മാള, ഗുരുവായൂർ–എറണാകുളം തുടങ്ങിയ പ്രധാന റൂട്ടുകളിലോടുന്ന ബസുകളാണ് സർവീസ് നിർത്താൻ പ്രധാനമായും ഒരുങ്ങുന്നത്.
യാത്രക്കാരുടെ കുറവും കെഎസ്ആർടിസി സർവീസുകളും തിരിച്ചടിയായി
ജില്ലയിലെ ഭൂരിഭാഗം സ്വകാര്യ ബസുകൾക്കും നിലവിൽ 50 ശതമാനത്തോളം കളക്ഷൻ കുറഞ്ഞിരിക്കുകയാണ്. കെഎസ്ആർടിസിയുടെ പ്രിയദർശിനി ബസുകൾ നേരിട്ട് സർവീസ് നടത്താത്ത റൂട്ടുകളിൽ പോലും യാത്രക്കാർ കണക്ഷൻ ബസുകൾ ഉപയോഗിച്ച് സ്ഥിരമായി സൗജന്യയാത്ര ചെയ്യുന്നത് സ്വകാര്യ ബസുകളെ പ്രതിസന്ധിയിലാക്കുന്നു. മെഡിക്കൽ കോളജ് റൂട്ടിൽ പ്രിയദർശിനി സർവീസുകൾ കൂടുതലുള്ളതിനാൽ ആ റൂട്ടിൽ ഓടിയിരുന്ന സ്വകാര്യ ബസുകൾക്ക് വൻ നഷ്ടമാണ് നേരിടേണ്ടി വന്നത്. ഇതിനൊപ്പം ഡീസൽ വില വർധിച്ചതു കൂടി ആയതോടെ ബസ് വ്യവസായം ഇരട്ടി ആഘാതത്തിലായി.
ചർച്ചകൾ ഫലം കണ്ടില്ല, ജീവനക്കാരും പ്രതിസന്ധിയിൽ
പ്രതിസന്ധി പരിഹരിക്കണമെന്നാവശ്യപ്പെട്ട് കഴിഞ്ഞ ദിവസം കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്സ് ഭാരവാഹികൾ മുഖ്യമന്ത്രി, ഗതാഗത മന്ത്രി എന്നിവരുമായി കൂടിക്കാഴ്ച നടത്തിയിരുന്നെങ്കിലും അനുകൂലമായ തീരുമാനങ്ങളൊന്നും ഉണ്ടായില്ല.
വരവും ചെലവും ഒത്തുപോകാത്ത സാഹചര്യത്തിൽ ബസ് ജീവനക്കാർക്ക് കൃത്യമായ ശമ്പളം നൽകാൻ കഴിയുന്നില്ലെന്നും പരാതിയുണ്ട്. കഴിഞ്ഞ ദിവസം തൃശൂർ–പാലക്കാട് റൂട്ടിൽ പുലർച്ചെ മുതൽ രാത്രി വരെ സർവീസ് നടത്തിയ മിക്ക ഡ്രൈവർമാർക്കും ദിവസക്കൂലിയായി ലഭിച്ചത് വെറും 500 രൂപ മാത്രമാണെന്ന് ബസുടമകൾ ചൂണ്ടിക്കാണിക്കുന്നു. വരും ദിവസങ്ങളിൽ കൂടുതൽ ബസുകൾ ജി ഫോം നൽകി സർവീസ് നിർത്തുന്നതോടെ ജില്ലയിലെ യാത്രാക്ലേശം രൂക്ഷമാകുമെന്നാണ് സൂചന.
