​വെങ്കിടേഷും കല്യാൺ റാമും ഒന്നിക്കുന്നു ഒപ്പം കീർത്തിയും കൃതിയും ബോക്സ് ഓഫീസ് ഇളക്കിമറിക്കാൻ അനിൽ രവിപുടി ചിത്രം തുടങ്ങി

​വിക്ടറി വെങ്കിടേഷും നന്ദമുരി കല്യാൺ റാമും ഒന്നിക്കുന്നു; അനിൽ രവിപുടി ചിത്രത്തിന് ഗംഭീര തുടക്കം

ഹൈദരാബാദ്: തെലുങ്ക് സിനിമാ ലോകം ഏറെ ആകാംഷയോടെ കാത്തിരിക്കുന്ന വമ്പൻ പ്രോജക്റ്റിന് ഔദ്യോഗിക തുടക്കം. വിക്ടറി വെങ്കിടേഷ്, നന്ദമുരി കല്യാൺ റാം എന്നിവരെ പ്രധാന കഥാപാത്രങ്ങളാക്കി സൂപ്പർ ഹിറ്റ് സംവിധായകൻ അനിൽ രവിപുടി ഒരുക്കുന്ന പുതിയ ചിത്രത്തിൻ്റെ പൂജയും മുഹൂർത്ത ചടങ്ങുകളും ഹൈദരാബാദിൽ വെച്ച് ഗംഭീരമായി നടന്നു. ഷൈൻ സ്‌ക്രീൻസിൻ്റെ ബാനറിൽ സാഹു ഗാരപതി നിർമ്മിക്കുന്ന ഈ ചിത്രം സുരേഷ് പ്രൊഡക്ഷൻസ്, സീ സ്റ്റുഡിയോസ്, ശ്രീമതി അർച്ചന എന്നിവർ ചേർന്നാണ് പ്രേക്ഷകരിലേക്ക് എത്തിക്കുന്നത്. താൽക്കാലികമായി '#VenkyAnil5', '#NkrAR2' എന്നീ ഹാഷ്‌ടാഗുകളിലാണ് ചിത്രം പ്രഖ്യാപിച്ചിരിക്കുന്നത്.

​കീർത്തി സുരേഷും കൃതി ഷെട്ടിയും നായികമാരായെത്തുന്ന ഈ ചിത്രം ആദ്യാവസാനം ചിരിയും വിനോദവും നിറഞ്ഞ ഒരു സമ്പൂർണ്ണ ഉത്സവകാല എന്റർടെയ്‌നർ ആയിരിക്കുമെന്ന് അണിയറ പ്രവർത്തകർ ഉറപ്പുനൽകുന്നു. ചലച്ചിത്ര രംഗത്തെ പ്രമുഖർ പങ്കെടുത്ത ചടങ്ങിൽ പ്രശസ്ത നിർമ്മാതാക്കളായ ദിൽ രാജുവും ശിരീഷും ചേർന്ന് ചിത്രത്തിൻ്റെ തിരക്കഥ സംവിധായകൻ അനിൽ രവിപുടിക്കും നിർമ്മാതാവ് സാഹു ഗാരപതിക്കും കൈമാറി.

​പ്രധാന താരങ്ങൾ പങ്കെടുത്ത ആദ്യ ഷോട്ടിന് പ്രമുഖ നിർമ്മാതാവ് അല്ലു അരവിന്ദ് ക്ലാപ്പ് ബോർഡ് അടിക്കുകയും, സുരേഷ് ബാബു ക്യാമറ സ്വിച്ച് ഓൺ ചെയ്യുകയും ചെയ്തു. ഇതിഹാസ ചലച്ചിത്രകാരൻ കെ. രാഘവേന്ദ്ര റാവുവാണ് ചിത്രത്തിൻ്റെ ആദ്യ ഷോട്ട് സംവിധാനം ചെയ്തത്. വെങ്കിടേഷിൻ്റെയും കല്യാൺ റാമിൻ്റെയും അത്യപൂർവ്വ കോമ്പോ തന്നെയാണ് ചിത്രത്തിൻ്റെ പ്രധാന ആകർഷണം. അനിൽ രവിപുടിയുടെ മുൻകാല വിജയങ്ങളും പ്രമുഖ പ്രൊഡക്ഷൻ ഹൗസുകളുടെ പങ്കാളിത്തവും ചിത്രത്തിന് ഇതിനോടകം വലിയ ഹൈപ്പാണ് നൽകിയിരിക്കുന്നത്.

​യുവനിരയിലെ ശ്രദ്ധേയനായ ജി.വി. പ്രകാശ് കുമാറാണ് ചിത്രത്തിന് സംഗീതം ഒരുക്കുന്നത്. സമീർ റെഡ്ഡി ഛായാഗ്രഹണവും തമ്മിരാജു എഡിറ്റിംഗും നിർവ്വഹിക്കുന്നു. എ.എസ്. പ്രകാശാണ് കലാസംവിധാനം. എസ്. കൃഷ്ണ എക്സിക്യൂട്ടീവ് പ്രൊഡ്യൂസറാകുന്ന ചിത്രത്തിൻ്റെ റെഗുലർ ഷൂട്ടിംഗ് ഉടൻ തന്നെ ആരംഭിക്കും. 2027-ലെ സംക്രാന്തി റിലീസായി ചിത്രം തിയേറ്ററുകളിൽ എത്തിക്കാനാണ് നിർമ്മാതാക്കൾ ലക്ഷ്യമിടുന്നത്. പി.ആർ.ഒ: ശബരി, മാർക്കറ്റിംഗ്: ഹാഷ്‌ടാഗ് മീഡിയ.