അത്ഭുത പ്രതിമയുമായി ധ്യാൻ ശ്രീനിവാസനും സംഘവും ഹ്യൂമർ ഫാൻ്റസി ചിത്രം തേവർ ചിത്രീകരണം പൂർത്തിയായി

​ധ്യാൻ ശ്രീനിവാസനും ഷെഹീൻ സിദ്ദിഖും ഒന്നിക്കുന്ന 'തേവർ' ചിത്രീകരണം പൂർത്തിയായി; ചിരിയും ഫാൻ്റസിയും നിറഞ്ഞ ദൃശ്യവിരുന്ന് വരുന്നു

​കൊച്ചി: അത്ഭുത സിദ്ധിയുള്ള ഒരു പ്രതിമയെ ചുറ്റിപ്പറ്റിയുള്ള രസകരമായ സംഭവവികാസങ്ങൾ പ്രമേയമാക്കി ഒരുങ്ങുന്ന 'തേവർ' എന്ന സിനിമയുടെ ചിത്രീകരണം പൂർത്തിയായി. പൊള്ളാച്ചി, കോയമ്പത്തൂർ എന്നിവിടങ്ങളിലായി നടന്ന ചിത്രീകരണം പൂർത്തിയായ വിവരം അണിയറ പ്രവർത്തകർ അറിയിച്ചു. ഹൊറൈസൺ എൻ്റെർടൈൻമെൻ്റിൻ്റെ ബാനറിൽ രാജൻ മൊട്ടമ്മൽ (തളിപ്പറമ്പ്) നിർമ്മിക്കുന്ന ചിത്രം നിജിഷ് സഹദേവനാണ് തിരക്കഥ എഴുതി സംവിധാനം ചെയ്യുന്നത്.

​ഹ്യൂമർ, ഫാൻ്റസി ജോണറുകളിൽ ഒരുങ്ങുന്ന ചിത്രം കേരള-തമിഴ്‌നാട് അതിർത്തി ഗ്രാമത്തിലാണ് നടക്കുന്നത്. വ്യത്യസ്ത സാഹചര്യങ്ങളിൽ നിന്ന് ഒരു സ്ഥലത്ത് എത്തിച്ചേരുന്ന മൂന്ന് യുവാക്കളെയും അവരുടെ ജീവിതത്തിലേക്ക് അപ്രതീക്ഷിതമായി കടന്നുവരുന്ന ഒരു പ്രതിമയെയും കേന്ദ്രീകരിച്ചാണ് കഥാപുരോഗതി. ആ പ്രതിമ എത്തിയതോടെ ഇവരുടെ ജീവിതത്തിൽ അരങ്ങേറുന്ന വിചിത്രമായ പ്രശ്നങ്ങളാണ് ചിത്രം പറയുന്നത്.

​ധ്യാൻ ശ്രീനിവാസൻ, ഷെഹീൻ സിദ്ദിഖ് എന്നിവർക്കൊപ്പം പുതുമുഖം ഡോ. റോഷൻ രാജുമാണ് കേന്ദ്ര കഥാപാത്രങ്ങളെ അവതരിപ്പിക്കുന്നത്. പരിയാരം മെഡിക്കൽ കോളേജിലെ ഡോക്ടറായ റോഷൻ രാജ് 'ക്രിസ്റ്റി' എന്ന കഥാപാത്രത്തെയാണ് അവതരിപ്പിക്കുന്നത്. നിർമ്മാതാവ് രാജൻ മൊട്ടമ്മലിന്റെ മകൻ കൂടിയാണ് അദ്ദേഹം.

​ഒരു പാൻ ഇന്ത്യൻ സ്വഭാവത്തോടെ ഒരുങ്ങുന്ന ചിത്രത്തിൽ തലൈവാസൽ വിജയ്, കലാഭവൻ ഷാജോൺ, ദേവൻ, ഹരീഷ് കണാരൻ, സുനിൽ സുഗത, ഷാജു ശ്രീധർ, മേജർ രവി, നിർമ്മൽ പാലാഴി, ശിവജി ഗുരുവായൂർ, ജയരാജ് വാര്യർ, മൊട്ട രാജേന്ദ്രൻ, വയ്യാപുരി, ഐശ്വര്യ, പൂജാ റാം തുടങ്ങിയ വൻ താരനിര അണിനിരക്കുന്നുണ്ട്.

​അണിയറ പ്രവർത്തകർ:

​സംഗീതം: ഔസേപ്പച്ചൻ

​ഛായാഗ്രഹണം: എൽദോ ഐസക്

​എഡിറ്റിംഗ്: അയൂബ് ഖാൻ

​കലാസംവിധാനം: സജിത് മുണ്ടയാട്

​പ്രൊജക്റ്റ് ഡിസൈൻ: ഹംസ ദേശമംഗലം

​മേക്കപ്പ്: മഹേഷ് ചേർത്തല

​സമീപകാല മലയാള സിനിമയിലെ ഏറ്റവും മികച്ച ഹ്യൂമർ-ഫാൻ്റസി ചിത്രമായിരിക്കും 'തേവർ' എന്ന് അണിയറ പ്രവർത്തകർ അവകാശപ്പെടുന്നു