മദ്യപിച്ച് അപകടകരമായി വാഹനമോടിച്ച പോലീസിനെ ഓടിച്ചിട്ട് പിടിച്ച് വനിതാ ഓട്ടോ ഡ്രൈവർ
പത്തനംതിട്ടയിൽ ഡ്യൂട്ടിക്കിടെ മദ്യപിച്ച് ലക്കുകെട്ട് അപകടകരമായ രീതിയിൽ വാഹനമോടിച്ച ഓപ്പറേഷൻ തൂഫാൻ ഡാൻസാഫ് സംഘത്തിലെ മൂന്ന് സി.പി.ഒമാരെ ജില്ലാ പോലീസ് മേധാവി സസ്പെൻഡ് ചെയ്തു.
അനില എം കൃഷ്ണൻ 
ഡ്യൂട്ടിക്കിടെ മദ്യപിച്ച് പാഞ്ഞ പോലീസ് വാഹനം ഓട്ടോറിക്ഷാ ഡ്രൈവർ പിന്തുടർന്ന് പിടികൂടി; മൂന്ന് ഉദ്യോഗസ്ഥർക്ക് സസ്പെൻഷൻ
പത്തനംതിട്ട: ഡ്യൂട്ടിക്കിടെ മദ്യപിച്ച് ലക്കുകെട്ട്, പൊതുജനങ്ങളുടെ ജീവന് ഭീഷണിയാകുംവിധം അപകടകരമായ രീതിയിൽ ഔദ്യോഗിക വാഹനമോടിച്ച മൂന്ന് പോലീസ് ഉദ്യോഗസ്ഥരെ അന്വേഷണവിധേയമായി സസ്പെൻഡ് ചെയ്തു. പത്തനംതിട്ട ഡിവൈ.എസ്.പിയുടെ കീഴിലുള്ള ഡാൻസാഫ് (DANSAF) സംഘത്തിലെ സി.പി.ഒമാരായ പ്രിയേഷ് എം. കുറുപ്പ്, സുമൻ, രാഹുൽ എന്നിവർക്കെതിരെയാണ് ജില്ലാ പോലീസ് മേധാവി ആർ. ആനന്ദ് അടിയന്തര സസ്പെൻഷൻ നടപടി സ്വീകരിച്ചത്.
ചൊവ്വാഴ്ച വൈകിട്ടോടെയായിരുന്നു നാടകീയ സംഭവങ്ങൾ അരങ്ങേറിയത്. മണ്ണാറക്കുളഞ്ഞി സ്വദേശിയും വനിതാ ഓട്ടോറിക്ഷാ ഡ്രൈവറുമായ ശോഭാ സന്തോഷ് യാത്രക്കാരുമായി പത്തനംതിട്ടയിലേക്ക് വരികയായിരുന്നു. വാഹനം മൈലപ്രയിൽ എത്തിയപ്പോൾ, ഓട്ടോറിക്ഷയിൽ ഇടിക്കുന്ന തരത്തിൽ അതീവ അപകടകരമായ രീതിയിൽ പോലീസ് വാഹനം നിയന്ത്രണമില്ലാതെ കടന്നുപോയി.
തുടർന്ന് ധീരതയോടെ ശോഭ യാത്രക്കാരുമായി സ്വന്തം ഓട്ടോയിൽ പോലീസ് വാഹനത്തെ പിന്തുടരുകയും ഒടുവിൽ തടഞ്ഞുനിർത്തുകയുമായിരുന്നു. വാഹനം തടഞ്ഞതോടെ അതിലുണ്ടായിരുന്ന മറ്റ് രണ്ട് പോലീസ് ഉദ്യോഗസ്ഥർ ഓടി രക്ഷപെടാൻ ശ്രമിച്ചെങ്കിലും നാട്ടുകാർ പിന്നാലെ ഓടി ഇവരെ തടഞ്ഞുവെച്ച് പോലീസിൽ ഏൽപ്പിക്കുകയായിരുന്നു.
തുടർന്ന് പത്തനംതിട്ട പോലീസ് സ്ഥലത്തെത്തി വാഹനമോടിച്ച സി.പി.ഒ പ്രിയേഷിനെ കസ്റ്റഡിയിലെടുത്തു. ഇവരുടെ രക്തപരിശോധന നടത്തിയതിൽ മൂവരും കമിഴ്ന്നടിച്ചു മദ്യപിച്ചിരുന്നതായി തെളിഞ്ഞു. മനുഷ്യജീവന് ആപത്തുണ്ടാക്കുന്ന രീതിയിൽ മദ്യപിച്ച് വാഹനമോടിച്ചതിന് പ്രിയേഷിനെതിരെ പത്തനംതിട്ട പോലീസ് ക്രിമിനൽ കേസെടുത്തിട്ടുണ്ട്. മറ്റ് രണ്ട് ഉദ്യോഗസ്ഥർക്കെതിരെ ശക്തമായ വകുപ്പുതല നടപടിയും ആരംഭിച്ചു.
സംസ്ഥാനത്ത് ഗുണ്ടകൾക്കെതിരെയും ലഹരിമാഫിയക്കെതിരെയും പോലീസ് നടത്തുന്ന ശക്തമായ പരിശോധനയായ 'ഓപ്പറേഷൻ തൂഫാൻ' പദ്ധതിയുടെ ഭാഗമായി ഡ്യൂട്ടിയിലുണ്ടായിരുന്ന ഉദ്യോഗസ്ഥരാണ് ഇത്തരത്തിൽ പെരുമാറിയത്. ഉദ്യോഗസ്ഥരുടെ ഈ പ്രവർത്തി സേനയ്ക്കാകെ വലിയ നാണക്കേടുണ്ടാക്കിയതായി വിലയിരുത്തിയ ജില്ലാ പോലീസ് മേധാവി, അർധരാത്രിയോടെ തന്നെ സസ്പെൻഷൻ നടപടിക്രമങ്ങൾ പൂർത്തിയാക്കുകയായിരുന്നു.
