എല്ലാ സാധാരണക്കാർക്കും എസി യാത്ര തമിഴ്നാട്ടിൽ ഇനി സർക്കാർ എസി ബസുകൾ മാത്രം വാങ്ങുമെന്ന് മുഖ്യമന്ത്രി ജോസഫ് വിജയ്
തമിഴ്നാട് പൊതുഗതാഗത ശൃംഖല പൂർണ്ണമായും ആധുനികവൽക്കരിക്കുന്നു. ഇനി മുതൽ എസി ബസുകൾ മാത്രമേ വാങ്ങുകയുള്ളൂവെന്ന് മുഖ്യമന്ത്രി ജോസഫ് വിജയ് പ്രഖ്യാപിച്ചു.
Angel Varghese 
തമിഴ്നാട്ടിൽ ഇനി എസി ബസുകൾ മാത്രം: പൊതുഗതാഗത രംഗത്ത് വിപ്ലവകരമായ മാറ്റങ്ങളുമായി മുഖ്യമന്ത്രി ജോസഫ് വിജയ്
ചെന്നൈ: തമിഴ്നാട് പൊതുഗതാഗത വകുപ്പിൽ വിപ്ലവകരമായ മാറ്റങ്ങൾക്ക് തുടക്കം കുറിച്ചുകൊണ്ട്, സംസ്ഥാന സർക്കാർ ഇനി മുതൽ എയർ കണ്ടീഷൻ ചെയ്ത (എസി) ബസുകൾ മാത്രമേ വാങ്ങുകയുള്ളൂവെന്ന് മുഖ്യമന്ത്രി ജോസഫ് വിജയ് അറിയിച്ചു. തമിഴ്നാട് ഗതാഗത മന്ത്രി വിജയ് തമിഴൻ പാർത്ഥിപനാണ് ചെന്നൈയിൽ മാധ്യമപ്രവർത്തകരെ കണ്ട് ഈ സുപ്രധാന തീരുമാന വിവരം പങ്കുവെച്ചത്. സാധാരണക്കാരായ ജനങ്ങൾക്ക് കുറഞ്ഞ ചെലവിൽ വിപുലവും സുഖകരവുമായ യാത്രാസൗകര്യം ലഭ്യമാക്കുകയാണ് ഇതിലൂടെ സർക്കാർ ലക്ഷ്യമിടുന്നത്.
തമിഴ്നാട്ടിലെ സാധാരണക്കാരായ യാത്രക്കാർക്ക് ഉയർന്ന നിലവാരമുള്ള യാത്രാനുഭവം ഉറപ്പാക്കണമെന്ന് മുഖ്യമന്ത്രിക്ക് പ്രത്യേക താല്പര്യമുണ്ടെന്ന് മന്ത്രി വ്യക്തമാക്കി. അടുത്തിടെ ഒരു സർക്കാർ ബസിൽ മുഖ്യമന്ത്രി ജോസഫ് വിജയ് നേരിട്ട് യാത്ര ചെയ്തിരുന്നു. ഈ യാത്രയ്ക്കിടയിലാണ് പൊതുജനങ്ങളുടെ ബുദ്ധിമുട്ടുകൾ മനസ്സിലാക്കിയതെന്നും, വരും ദിവസങ്ങളിൽ നിരത്തിലിറങ്ങുന്ന എല്ലാ പുതിയ പൊതുഗതാഗത വാഹനങ്ങളിലും നിർബന്ധമായും എയർ കണ്ടീഷനിംഗ് സൗകര്യം ഉണ്ടായിരിക്കണമെന്ന് അദ്ദേഹം നിർദ്ദേശിച്ചതെന്നും മന്ത്രി കൂട്ടിച്ചേർത്തു.
കേവലം നഗരങ്ങളിൽ മാത്രമല്ല, തമിഴ്നാടിൻ്റെ എല്ലാ വിദൂര ഗ്രാമീണ മേഖലകളിലേക്കും മികച്ച ബസ് സർവീസുകൾ വ്യാപിപ്പിക്കാൻ പദ്ധതി തയ്യാറായിക്കഴിഞ്ഞു. ഗ്രാമങ്ങളെയും നഗരങ്ങളെയും തമ്മിൽ ബന്ധിപ്പിക്കുന്ന ശക്തമായ ഒരു ശൃംഖല രൂപീകരിക്കാനാണ് തമിഴക വെട്രി കഴകം (ടിവികെ) ലക്ഷ്യമിടുന്നത്. ഇതിൻ്റെ ഭാഗമായി കഴിഞ്ഞ ദിവസം 300 പുതിയ അത്യാധുനിക ബസുകളുടെ സർവീസ് മുഖ്യമന്ത്രി ഫ്ലാഗ് ഓഫ് ചെയ്തിരുന്നു.
സംസ്ഥാനത്തുടനീളമുള്ള കണക്റ്റിവിറ്റി മെച്ചപ്പെടുത്തുന്നതിനൊപ്പം നിലവിലുള്ള പൊതുഗതാഗത സംവിധാനങ്ങളെ ആധുനികവൽക്കരിക്കുക എന്നതും സർക്കാരിന്റെ മുൻഗണനാ പട്ടികയിലുണ്ട്. എല്ലാ സാമ്പത്തിക വിഭാഗങ്ങളിലുമുള്ള ജനങ്ങൾക്കും ഒരുപോലെ സുഖകരമായി സഞ്ചരിക്കാൻ ആവശ്യമായ അടിസ്ഥാന സൗകര്യങ്ങൾ ഓരോ ബസിലും ഉറപ്പുവരുത്തുമെന്നും ഗതാഗത മന്ത്രി മാധ്യമങ്ങളോട് വ്യക്തമാക്കി
