ഗർഭാശയഗള ക്യാൻസറിനെതിരെ എച്ച്.പി.വി. വാക്സിൻ സൗജന്യ കുത്തിവെപ്പ് ഇന്ന് മുതൽ

ഗർഭാശയഗള ക്യാൻസറിനെതിരെ ഇനി സുരക്ഷാകവചം: രാജ്യവ്യാപക എച്ച്.പി.വി. വാക്സിനേഷൻ ക്യാമ്പയിന് ഇന്ന് തുടക്കം

​തിരുവനന്തപുരം: ഗർഭാശയഗള ക്യാൻസർ (Cervical Cancer) പ്രതിരോധിക്കുന്നതിന്റെ ഭാഗമായി 14 വയസ്സുള്ള പെൺകുട്ടികൾക്കായി സർക്കാർ നടപ്പിലാക്കുന്ന എച്ച്.പി.വി (HPV) വാക്സിനേഷൻ ക്യാമ്പയിന് ഇന്ന് (ഫെബ്രുവരി 28) തുടക്കമാകും. മാരകമായ ഗർഭാശയഗള ക്യാൻസറിനെ രാജ്യത്തുനിന്ന് തുടച്ചുനീക്കുക എന്ന ലക്ഷ്യത്തോടെയാണ് കേന്ദ്ര ആരോഗ്യ കുടുംബക്ഷേമ മന്ത്രാലയം ഈ ബൃഹദ് പദ്ധതി ആവിഷ്കരിച്ചിരിക്കുന്നത്.

​സംസ്ഥാനതല ഉദ്ഘാടനം തിരുവനന്തപുരം തൈക്കാട് അമ്മയുടെയും കുട്ടിയുടെയും ആശുപത്രിയിൽ ഉച്ചയ്ക്ക് 2 മണിക്ക് വിദ്യാഭ്യാസ-തൊഴിൽ വകുപ്പ് മന്ത്രി അഡ്വ. വി. ശിവൻകുട്ടി നിർവ്വഹിക്കും. എറണാകുളം ജില്ലാതല ഉദ്ഘാടനം ജനറൽ ആശുപത്രിയിൽ ടി.ജെ. വിനോദ് എം.എൽ.എ നിർവ്വഹിക്കും.

​പ്രധാന വിവരങ്ങൾ ഒറ്റനോട്ടത്തിൽ:

​ലക്ഷ്യം: 14 വയസ്സുള്ള എല്ലാ പെൺകുട്ടികൾക്കും മൂന്ന് മാസത്തിനകം വാക്സിൻ നൽകുക.

​വാക്സിൻ ഡോസ്: ഒറ്റ കുത്തിവെപ്പിലൂടെ (Single Dose) പൂർണ്ണ സുരക്ഷ.

​ലഭ്യത: എല്ലാ സർക്കാർ ആരോഗ്യ കേന്ദ്രങ്ങളിലും വാക്സിൻ സൗജന്യമായി ലഭിക്കും.

​രജിസ്ട്രേഷൻ: U-WIN പോർട്ടൽ വഴി മുൻകൂട്ടി ബുക്ക് ചെയ്യാം. (uwin.mohfw.gov.in)

​എന്തുകൊണ്ട് ഈ വാക്സിൻ പ്രധാനമാണ്?

​ഇന്ത്യയിലെ സ്ത്രീകളെ ബാധിക്കുന്ന ക്യാൻസറുകളിൽ രണ്ടാം സ്ഥാനത്താണ് ഗർഭാശയഗള ക്യാൻസർ. 99.7 ശതമാനം കേസുകളും ഹ്യൂമൻ പാപ്പിലോമ വൈറസ് (HPV) മൂലമാണ് ഉണ്ടാകുന്നത്. ഇതിൽ 16, 18 എന്നീ വകഭേദങ്ങളാണ് ഇന്ത്യയിൽ 83 ശതമാനം ക്യാൻസർ കേസുകൾക്കും കാരണമാകുന്നത്. കൃത്യസമയത്തുള്ള വാക്സിനേഷനിലൂടെ ഈ രോഗസാധ്യത 90 ശതമാനത്തിലധികം കുറയ്ക്കാൻ കഴിയുമെന്ന് ലോകാരോഗ്യ സംഘടനയും (WHO) എൻ.ടി.എ.ജി.ഐയും സാക്ഷ്യപ്പെടുത്തുന്നു.

​ഭാവിയിൽ ഈ വാക്സിൻ ദേശീയ പ്രതിരോധ കുത്തിവെയ്പ്പ് പട്ടികയുടെ (Universal Immunization Programme) ഭാഗമാകും. ഇതോടെ 14 വയസ്സ് തികയുന്ന എല്ലാ പെൺകുട്ടികൾക്കും വരും വർഷങ്ങളിലും ഈ സുരക്ഷ ലഭ്യമാകും.