ചൂരൽമല ടൗൺഷിപ്പ് ഉദ്ഘാടനം മാർച്ച് ഒന്നിലേക്ക് മാറ്റി
ചൂരൽമല മുണ്ടക്കൈ പുനരധിവാസ ടൗൺഷിപ്പ് ഒന്നാംഘട്ട ഉദ്ഘാടനം മാർച്ച് ഒന്നിലേക്ക് മാറ്റി. മുഖ്യമന്ത്രി 178 വീടുകൾ കൈമാറും
അനില എം കൃഷ്ണൻ 
ചൂരൽമല-മുണ്ടക്കൈ ടൗൺഷിപ്പ് ഉദ്ഘാടനം മാറ്റി; ആദ്യഘട്ടം മാർച്ച് ഒന്നിന് മുഖ്യമന്ത്രി നിർവഹിക്കും
വയനാട്: ചൂരൽമല-മുണ്ടക്കൈ ഉരുൾപൊട്ടൽ ദുരന്തബാധിതർക്കായി സർക്കാർ കൽപ്പറ്റയിൽ ഒരുക്കുന്ന ടൗൺഷിപ്പിന്റെ ഒന്നാംഘട്ട ഉദ്ഘാടനം മാറ്റി വെച്ചു. ഈ മാസം 25-ന് നടക്കേണ്ടിയിരുന്ന ചടങ്ങ് മാർച്ച് ഒന്നിലേക്കാണ് മാറ്റിയത്. മുഖ്യമന്ത്രിയുടെ ഓഫീസാണ് ഇക്കാര്യം അറിയിച്ചത്. തീയതി മാറ്റിയതിന്റെ കൃത്യമായ കാരണം അധികൃതർ വ്യക്തമാക്കിയിട്ടില്ല.
ടൗൺഷിപ്പിന്റെ ഒന്നാംഘട്ടത്തിൽ നിർമ്മാണം പൂർത്തിയായ 178 വീടുകളുടെ താക്കോൽദാനമാണ് മാർച്ച് ഒന്നിന് മുഖ്യമന്ത്രി പിണറായി വിജയൻ നിർവഹിക്കുക. ആകെ 410 വീടുകളും മറ്റ് അനുബന്ധ സൗകര്യങ്ങളുമാണ് പദ്ധതിയിൽ വിഭാവനം ചെയ്തിരിക്കുന്നത്. ഇതിൽ പൂർണ്ണമായും വീട് നഷ്ടപ്പെട്ട കുടുംബങ്ങൾക്കാണ് മുൻഗണന.
കൽപ്പറ്റ വില്ലേജിലെ എൽസ്റ്റൺ എസ്റ്റേറ്റിൽ ഏറ്റെടുത്ത 64.4705 ഹെക്ടർ ഭൂമിയിലാണ് മാതൃകാ ടൗൺഷിപ്പ് ഉയരുന്നത്. കഴിഞ്ഞ വർഷം മാർച്ച് 27-നാണ് മുഖ്യമന്ത്രി പദ്ധതിക്ക് തറക്കല്ലിട്ടത്. റെക്കോർഡ് വേഗത്തിൽ നിർമ്മാണം പൂർത്തിയാക്കിയ വീടുകളുടെ ഗുണഭോക്താക്കളെ കണ്ടെത്താനുള്ള നറുക്കെടുപ്പ് കഴിഞ്ഞ ദിവസം പൂർത്തിയായിരുന്നു. ഉടൻ തന്നെ രണ്ടാം ഘട്ട നിർമ്മാണ പ്രവർത്തനങ്ങളും ആരംഭിക്കുമെന്നാണ് സൂചന.
