കുമ്പളം ടോൾ പ്ലാസ കേസ് ബാരിക്കേഡ് തട്ടിമാറ്റി ജീപ്പ് ഓടിച്ച ഡ്രൈവറുടെ ലൈസൻസ് സസ്പെൻഡ് ചെയ്യാൻ മോട്ടോർ വാഹന വകുപ്പ്
കുമ്പളം ടോൾ പ്ലാസയിൽ ടോൾ നൽകാതെ ബാരിക്കേഡ് തട്ടിമാറ്റി അശ്രദ്ധമായി വാഹനം ഓടിച്ച ജീപ്പ് ഡ്രൈവർക്കെതിരെ മോട്ടോർ വാഹന വകുപ്പ് നടപടിയെടുത്തു. ഡ്രൈവറുടെ ലൈസൻസ് സസ്പെൻഡ് ചെയ്യാൻ ശുപാർശ.
അനില എം കൃഷ്ണൻ 
ടോൾ നൽകാതെ ബാരിക്കേഡ് തട്ടിമാറ്റി പാഞ്ഞു; ജീപ്പ് ഡ്രൈവറുടെ ലൈസൻസ് സസ്പെൻഡ് ചെയ്യാൻ ശുപാർശ
കൊച്ചി: കുമ്പളം ടോൾ പ്ലാസയിൽ ടോൾ നൽകാതെ ബാരിക്കേഡ് തട്ടിമാറ്റി അശ്രദ്ധമായി വാഹനം മുന്നോട്ട് എടുത്ത ജീപ്പ് ഡ്രൈവർക്കെതിരെ മോട്ടോർ വാഹന വകുപ്പ് ശക്തമായ നടപടി സ്വീകരിച്ചു. ടോൾ പ്ലാസ അധികൃതർ നൽകിയ പരാതിയുടെ അടിസ്ഥാനത്തിലാണ് എറണാകുളം ജില്ലാ മോട്ടോർ വാഹന വകുപ്പിന്റെ നടപടി.
ജൂൺ 20 ശനിയാഴ്ച രാവിലെ ആറരയോടെയാണ് കേസിനാസ്പദമായ സംഭവം നടന്നത്. ടോളിലെ ബാരിക്കേഡ് തട്ടിമാറ്റി അപകടകരമായ രീതിയിൽ ജീപ്പ് മുന്നോട്ട് എടുക്കുകയായിരുന്നു. ടോൾ പ്ലാസയിലെ സിസിടിവി (CCTV) ദൃശ്യങ്ങൾ പരിശോധിച്ച ശേഷമാണ് അധികൃതർ നടപടിയിലേക്ക് കടന്നത്. മനുഷ്യജീവന് ഭീഷണിയാകുന്ന രീതിയിലും അതീവ അശ്രദ്ധയോടെയും വാഹനം ഓടിച്ചതായി ദൃശ്യങ്ങളിൽ നിന്ന് വ്യക്തമായിട്ടുണ്ട്.
ഇതേത്തുടർന്ന് ഡ്രൈവറുടെ ഡ്രൈവിംഗ് ലൈസൻസ് സസ്പെൻഡ് ചെയ്യാൻ മോട്ടോർ വാഹന വകുപ്പ് നിർദ്ദേശം നൽകി. കൂടാതെ, വകുപ്പിന്റെ നേതൃത്വത്തിൽ നടത്തുന്ന റോഡ് സുരക്ഷാ ബോധവൽക്കരണ ക്ലാസിൽ നിർബന്ധമായും പങ്കെടുക്കാനും ഡ്രൈവറോട് ആവശ്യപ്പെട്ടിട്ടുണ്ട്. വരും ദിവസങ്ങളിൽ ഇത്തരം നിയമലംഘനങ്ങൾക്കെതിരെ കർശന നടപടി തുടരുമെന്ന് അധികൃതർ അറിയിച്ചു.
