യുവനടിയുടെ പരാതിയിൽ സംവിധായകൻ രഞ്ജിത്ത് അറസ്റ്റിൽ സിനിമാ സെറ്റിൽ പീഡനശ്രമം എന്ന് ആരോപണം
സിനിമാ ചിത്രീകരണത്തിനിടെ നടിയെ പീഡിപ്പിക്കാൻ ശ്രമിച്ചെന്ന പരാതിയിൽ സംവിധായകൻ രഞ്ജിത്തിനെ പോലീസ് അറസ്റ്റ് ചെയ്തു. തൊടുപുഴയിൽ വെച്ചാണ് കസ്റ്റഡിയിലെടുത്തത്.
Angel Varghese 
യുവനടിയെ പീഡിപ്പിക്കാൻ ശ്രമം: സംവിധായകൻ രഞ്ജിത്ത് അറസ്റ്റിൽ
കൊച്ചി: സിനിമാ ലൊക്കേഷനിൽ വച്ച് യുവനടിയെ ലൈംഗികമായി അതിക്രമിക്കാൻ ശ്രമിച്ചെന്ന പരാതിയിൽ പ്രമുഖ സംവിധായകൻ രഞ്ജിത്ത് അറസ്റ്റിലായി. എറണാകുളത്ത് നിന്ന് തൊടുപുഴയിലേക്ക് പോകുന്നതിനിടെ മുട്ടത്ത് വച്ചാണ് കൊച്ചി സിറ്റി പോലീസ് കമ്മീഷണറുടെ നിർദ്ദേശപ്രകാരം തൊടുപുഴ പോലീസ് ഇദ്ദേഹത്തെ കസ്റ്റഡിയിലെടുത്തത്.
രഞ്ജിത്ത് പുതുതായി സംവിധാനം ചെയ്യുന്ന സിനിമയിലെ നടിയാണ് പരാതിക്കാരി. ചിത്രീകരണത്തിനിടെ സംവിധായകൻ മോശമായി പെരുമാറുകയും കയറിപ്പിടിക്കുകയും ചെയ്തു എന്നാണ് പരാതി. സിനിമയുടെ സെറ്റിലുള്ള ആഭ്യന്തര പരാതി പരിഹാര സമിതിയെ (IC) നടി ആദ്യം സമീപിച്ചെങ്കിലും നടപടിയുണ്ടാകാത്തതിനെ തുടർന്ന് ഡി.ജി.പിക്കും ഹേമ കമ്മിറ്റി റിപ്പോർട്ടുമായി ബന്ധപ്പെട്ട പ്രത്യേക അന്വേഷണ സംഘത്തിനും (SIT) പരാതി നൽകുകയായിരുന്നു. കൊച്ചി നോർത്ത് വനിതാ പോലീസ് നടിയുടെ മൊഴി രേഖപ്പെടുത്തിയ ശേഷമാണ് അറസ്റ്റ് രേഖപ്പെടുത്തിയത്.
നേരത്തെ ബംഗാളി നടി നൽകിയ പരാതിയെ തുടർന്ന് രഞ്ജിത്തിന് ചലച്ചിത്ര അക്കാദമി ചെയർമാൻ സ്ഥാനം രാജിവയ്ക്കേണ്ടി വന്നിരുന്നു. എന്നാൽ കാലപ്പഴക്കം ചൂണ്ടിക്കാട്ടി ഹൈക്കോടതി ഈ കേസ് റദ്ദാക്കിയിരുന്നു. കോഴിക്കോട് സ്വദേശിയായ യുവാവ് നൽകിയ മറ്റൊരു ലൈംഗികാരോപണ കേസും കർണാടക ഹൈക്കോടതി സമാനമായ രീതിയിൽ റദ്ദാക്കിയിരുന്നു. ഇതിന് പിന്നാലെയാണ് പുതിയ പരാതിയിൽ അറസ്റ്റ് നടക്കുന്നത്.
