ചാലക്കുടിപ്പാലം അടച്ചു ദേശീയപാതയിൽ വൻ ഗതാഗതക്കുരുക്ക്, വാഹനങ്ങൾ തിരിച്ചുവിടുന്നു
ദേശീയപാതയിൽ അറ്റകുറ്റപ്പണികൾക്കായി ചാലക്കുടിപ്പാലം അടച്ചു. തൃശൂർ എറണാകുളം യാത്രക്കാർക്കുള്ള ബദൽ പാതകളും പുതിയ ഗതാഗത ക്രമീകരണങ്ങളും അറിയാം.
Angel Varghese 
ചാലക്കുടിപ്പാലം അടച്ചു: ദേശീയപാതയിൽ വൻ ഗതാഗതക്കുരുക്ക്; വാഹനങ്ങൾ തിരിച്ചുവിടുന്നു
ചാലക്കുടി: ദേശീയപാതയിൽ തൃശൂർ ഭാഗത്തേക്കുള്ള ചാലക്കുടി പഴയ പാലം അറ്റകുറ്റപ്പണികൾക്കായി അടച്ചു. കൊരട്ടി മേൽപ്പാലം, മുരിങ്ങൂർ-ചിറങ്ങര അടിപ്പാത നിർമാണം, പാലത്തിന്റെ ബലപരിശോധന, ബെയറിങ് മാറ്റൽ എന്നിവയുമായി ബന്ധപ്പെട്ടാണ് നടപടി. ഇതോടെ ഇരുഭാഗത്തേക്കുമുള്ള വാഹനങ്ങൾ സമാന്തരമായുള്ള പുതിയ പാലത്തിലൂടെ കടത്തിവിട്ടു തുടങ്ങിയത് ദേശീയപാതയിൽ കിലോമീറ്ററുകളോളം ഗതാഗതക്കുരുക്കിന് കാരണമായി.
ഇന്നലെ രാത്രി ഒൻപതു മണിയോടെ പാലം അടയ്ക്കുമെന്ന് അറിയിച്ചിരുന്നെങ്കിലും ഒരു മണിക്കൂർ വൈകിയാണ് ഗതാഗത ക്രമീകരണം നിലവിൽ വന്നത്. മീഡിയൻ മുറിച്ചുണ്ടാക്കിയ താത്കാലിക വഴിയിലൂടെയാണ് വാഹനങ്ങൾ പുതിയ പാലത്തിലേക്ക് പ്രവേശിപ്പിക്കുന്നത്. ബലപരിശോധനയ്ക്ക് ശേഷം ബെയറിങ് മാറ്റുന്ന തീയതി നിശ്ചയിക്കുമെന്ന് ദേശീയപാത ബ്രിജസ് വിഭാഗം അറിയിച്ചു.
ഗതാഗത നിയന്ത്രണവും ബദൽ പാതകളും
കുരുക്ക് ലഘൂകരിക്കുന്നതിനായി പോലീസ് താഴെ പറയുന്ന ക്രമീകരണങ്ങൾ ഏർപ്പെടുത്തിയിട്ടുണ്ട്:
തൃശൂർ - എറണാകുളം ഭാഗത്തേക്ക്: കോട്ടമുറിയിൽ നിന്നും തിരിഞ്ഞ് സാൻജോ നഗർ, പാറക്കൂട്ടം, കിൻഫ്ര പാർക്ക്, കോനൂർ, പെരുമ്പി വഴി ദേശീയപാതയിൽ പ്രവേശിക്കാം.
എറണാകുളം - തൃശൂർ ഭാഗത്തേക്ക്: ചിറങ്ങര മേൽപ്പാലം വഴി തിരിഞ്ഞ് ദേവമാത, കൊരട്ടി പള്ളി, കാടുകുറ്റി, മുരിങ്ങൂർ വഴി ദേശീയപാതയിൽ പ്രവേശിക്കാം.
നിലവിലെ ക്രമീകരണം ഫലപ്രദമല്ലെങ്കിൽ വാഹനങ്ങൾ കൊടകരയിൽ നിന്നും പൊങ്ങത്തു നിന്നും തിരിച്ചുവിടാനും അധികൃതർക്ക് പദ്ധതിയുണ്ട്. ഗതാഗത നിയന്ത്രണത്തിനായി ഡിവൈഎസ്പിയുടെ നേതൃത്വത്തിൽ പ്രത്യേക പോലീസ് സംഘത്തെയും ട്രാഫിക് വാർഡൻമാരെയും സ്ഥലത്ത് വിന്യസിച്ചിട്ടുണ്ട്.
