​അഭിഷേക് നാമ വിരാട് കർണ്ണ ചിത്രം നാഗബന്ധം രണ്ടാം ഗാനം പുറത്ത് ചിത്രം 2026 ജൂലൈയിൽ തീയേറ്ററുകളിലേക്ക്

​കൊച്ചി: അഭിഷേക് നാമ രചനയും സംവിധാനവും നിർവ്വഹിക്കുന്ന ബിഗ് ബജറ്റ് പാൻ ഇന്ത്യൻ ചിത്രം ‘നാഗബന്ധ’ത്തിലെ രണ്ടാമത്തെ ഗാനം പുറത്തിറങ്ങി. "സുര സുര താരാദീപം" എന്ന് തുടങ്ങുന്ന ഗാനമാണ് അണിയറപ്രവർത്തകർ പുറത്തുവിട്ടത്. വിരാട് കർണ്ണ നായകനായി എത്തുന്ന ചിത്രം 2026 ജൂലൈ 3-ന് ആഗോളതലത്തിൽ പ്രദർശനത്തിന് എത്തും.

​ജുനൈദ് കുമാർ-ആഭേ ടീം സംഗീതം നൽകിയ ഈ ഗാനത്തിന്റെ മലയാളം പതിപ്പിന് വരികൾ എഴുതിയിരിക്കുന്നത് സന്തോഷ് വർമയാണ്. അർജുൻ വിജയ്, അനില രാജീവ്, ബ്രിന്ദ എന്നിവർ ചേർന്നാണ് ഗാനം ആലപിച്ചിരിക്കുന്നത്. നായകനായ വിരാട് കർണ്ണയുടെ മികച്ച നൃത്തച്ചുവടുകൾക്കൊപ്പം നായികമാരായ നഭാ നടേഷ്, ഐശ്വര്യ മേനോൻ എന്നിവരും ഗാനരംഗത്തിൽ അണിനിരക്കുന്നുണ്ട്.

​പുരാണവും ചരിത്രവും ചേരുന്ന ദൃശ്യവിരുന്ന്

അഹമ്മദ് ഷാ അബ്ദാലിയുടെ ചരിത്രപരമായ അഫ്ഗാൻ അധിനിവേശത്തിൽ നിന്ന് പ്രചോദനം ഉൾക്കൊണ്ടാണ് ചിത്രത്തിന്റെ കഥാതന്തു വികസിപ്പിച്ചിരിക്കുന്നത്. പത്മനാഭസ്വാമി ക്ഷേത്രം, പുരി ജഗന്നാഥ് ക്ഷേത്രം തുടങ്ങിയ പുണ്യക്ഷേത്രങ്ങളിലെ നിഗൂഢമായ ആചാരങ്ങളും അടുത്തിടെ നടന്ന നിധി കണ്ടെത്തലുകളും ചിത്രത്തിന് ആധാരമായിട്ടുണ്ട്. ഇന്ത്യയിലെ 108 വിഷ്ണു ക്ഷേത്രങ്ങളുമായി ബന്ധപ്പെട്ട 'നാഗബന്ധ'ത്തെ ചുറ്റിപ്പറ്റിയാണ് ആത്മീയതയും സാഹസികതയും നിറഞ്ഞ ഈ ആക്ഷൻ ചിത്രം വികസിക്കുന്നത്.

​നേരത്തെ പുറത്തിറങ്ങിയ ‘നമോ രേ’ എന്ന ഗാനം സമൂഹ മാധ്യമങ്ങളിൽ വലിയ ശ്രദ്ധ നേടിയിരുന്നു. സൗന്ദർ രാജൻ എസ്. ഛായാഗ്രഹണം നിർവ്വഹിക്കുന്ന ചിത്രം തെലുങ്ക്, മലയാളം, തമിഴ്, ഹിന്ദി, കന്നഡ ഭാഷകളിലാണ് റിലീസ് ചെയ്യുന്നത്.

​മഹേഷ് മഞ്ജരേക്കർ, ജഗപതി ബാബു, റിഷഭ് സാഹ്നി, ദക്ഷ നാഗർക്കർ തുടങ്ങിയ വൻ താരനിര അണിനിരക്കുന്ന ചിത്രം എൻഐകെ സ്റ്റുഡിയോസ്, അഭിഷേക് പിക്ചേഴ്സ് എന്നിവയുടെ ബാനറിൽ കിഷോർ അന്നപുറെഡ്ഡി, നിഷിത നാഗിറെഡ്ഡി എന്നിവർ ചേർന്നാണ് നിർമ്മിക്കുന്നത്. വിഎഫ്എക്സ് സാങ്കേതിക വിദ്യയുടെ അതിപ്രസരമുള്ള ഈ ചിത്രം ഇന്ത്യൻ സിനിമയിലെ ഒരു വലിയ ദൃശ്യവിസ്മയമാകുമെന്നാണ് പ്രതീക്ഷിക്കപ്പെടുന്നത്