സസ്പെൻഷൻ പിൻവലിച്ചു ഹൈബി ഈഡനും ഡീൻ കുര്യാക്കോസും അടക്കം 8 എംപിമാർ ലോക്സഭയിൽ തിരിച്ചെത്തി
പാർലമെന്റിൽ പ്രതിഷേധിച്ചതിനെ തുടർന്ന് സസ്പെൻഷനിലായിരുന്ന എട്ട് പ്രതിപക്ഷ എംപിമാരുടെ ശിക്ഷാ നടപടി ലോക്സഭ റദ്ദാക്കി. അടിയന്തര പ്രാബല്യത്തോടെ ഇവർ സഭയിൽ തിരിച്ചെത്തി.
അനില എം കൃഷ്ണൻ 
സസ്പെൻഷൻ പിൻവലിച്ചു; എട്ട് പ്രതിപക്ഷ എംപിമാരും ലോക്സഭയിലേക്ക് തിരിച്ചെത്തി
ന്യൂഡൽഹി: പാർലമെന്റിലെ പ്രതിഷേധത്തെത്തുടർന്ന് സസ്പെൻഷനിലായിരുന്ന എട്ട് പ്രതിപക്ഷ എംപിമാരുടെ ശിക്ഷാ നടപടി ലോക്സഭ റദ്ദാക്കി. ഫെബ്രുവരി 3 മുതൽ സസ്പെൻഷനിലായിരുന്ന എംപിമാരെ അടിയന്തര പ്രാബല്യത്തോടെയാണ് സഭയിലേക്ക് തിരിച്ചെടുത്തത്. ബജറ്റ് സമ്മേളനം അവസാനിക്കുന്ന ഏപ്രിൽ 2 വരെയായിരുന്നു നേരത്തെ ഇവർക്ക് വിലക്ക് ഏർപ്പെടുത്തിയിരുന്നത്.
കേരളത്തിൽ നിന്നുള്ള ഹൈബി ഈഡൻ, ഡീൻ കുര്യാക്കോസ് എന്നിവരുൾപ്പെടെ എട്ട് എംപിമാരാണ് സഭയിൽ തിരിച്ചെത്തിയത്. ഗുർജീത് സിങ് ഔജ്ല, സി. കിരൺ കുമാർ റെഡ്ഡി, അമരീന്ദർ സിങ് രാജ വാറിങ്, മാണിക്കം ടഗോർ, പ്രശാന്ത് പടോലെ (കോൺഗ്രസ്), എസ്. വെങ്കിടേശൻ (സിപിഎം) എന്നിവരാണ് മറ്റു അംഗങ്ങൾ. മുൻ കരസേനാ മേധാവി ജനറൽ എംഎം നരവനെയുടെ പുസ്തകത്തെക്കുറിച്ചുള്ള റിപ്പോർട്ട് സഭയിൽ പരാമർശിക്കുന്നതിൽ നിന്ന് രാഹുൽ ഗാന്ധിയെ തടഞ്ഞതിനെത്തുടർന്ന് നടത്തിയ പ്രതിഷേധമാണ് സസ്പെൻഷനിൽ കലാശിച്ചത്.
സഭയിൽ 'ലക്ഷ്മണ രേഖ' വേണമെന്ന് സ്പീക്കർ
സഭയുടെ സുഗമമായ നടത്തിപ്പിന് അംഗങ്ങൾ പാലിക്കേണ്ട മര്യാദകളെക്കുറിച്ച് സ്പീക്കർ ഓം ബിർള കർശന നിർദ്ദേശങ്ങൾ നൽകി. സഭയ്ക്കകത്തോ പാർലമെന്റ് പരിസരത്തോ പ്ലക്കാർഡുകൾ, പോസ്റ്ററുകൾ, എഐ ഉപയോഗിച്ച് നിർമ്മിച്ച ചിത്രങ്ങൾ എന്നിവ പ്രദർശിപ്പിക്കാൻ പാടില്ലെന്ന് അദ്ദേഹം വ്യക്തമാക്കി. എല്ലാവരും 'ലക്ഷ്മണ രേഖ' പാലിക്കണമെന്ന് പാർലമെന്ററികാര്യ മന്ത്രി കിരൺ റിജിജു ആവശ്യപ്പെട്ടപ്പോൾ, ഭരണപക്ഷവും മര്യാദ പാലിക്കണമെന്ന് പ്രതിപക്ഷം ഓർമ്മിപ്പിച്ചു. സഭയുടെ അന്തസ്സ് ഉയർത്തിപ്പിടിക്കാൻ സഹകരിക്കുമെന്ന് കെ. സുരേഷ് ഉറപ്പുനൽകി.
