വർക്കല പി.ഡബ്ല്യു.ഡി റസ്റ്റ് ഹൗസ് മന്ത്രി മുഹമ്മദ് റിയാസ് ഉദ്ഘാടനം ചെയ്തു
വർക്കലയിൽ 9.32 കോടി രൂപ ചെലവിൽ നിർമ്മിച്ച ആധുനിക പൊതുമരാമത്ത് വിശ്രമമന്ദിരം മന്ത്രി പി.എ മുഹമ്മദ് റിയാസ് നാടിന് സമർപ്പിച്ചു. സ്യൂട്ട് റൂമുകൾ ഉൾപ്പെടെയുള്ള അത്യാധുനിക സൗകര്യങ്ങളാണ് ഇവിടെ ഒരുക്കിയിരിക്കുന്നത്.
Angel Varghese 
വർക്കല: കേരളത്തിലെ പ്രമുഖ വിനോദസഞ്ചാര കേന്ദ്രമായ വർക്കലയുടെ വികസനക്കുതിപ്പിന് ആക്കം കൂട്ടി പൊതുമരാമത്ത് വകുപ്പിന്റെ പുതിയ റസ്റ്റ് ഹൗസ് പ്രവർത്തനസജ്ജമായി. റസ്റ്റ് ഹൗസിന്റെ ഔദ്യോഗിക ഉദ്ഘാടനം പൊതുമരാമത്ത്-ടൂറിസം വകുപ്പ് മന്ത്രി പി.എ. മുഹമ്മദ് റിയാസ് നിർവഹിച്ചു. അഡ്വ. വി. ജോയി എം.എൽ.എ ചടങ്ങിൽ അധ്യക്ഷത വഹിച്ചു.
9.32 കോടി രൂപ വിനിയോഗിച്ചാണ് അന്താരാഷ്ട്ര നിലവാരത്തിലുള്ള ഈ വിശ്രമമന്ദിരം നിർമ്മിച്ചിരിക്കുന്നത്. 20,000 ചതുരശ്ര അടി വിസ്തീർണ്ണത്തിൽ, ഒരു ആധുനിക ഹോട്ടലിന് സമാനമായ രീതിയിലാണ് മൂന്ന് നിലകളുള്ള ഈ കെട്ടിടം രൂപകൽപ്പന ചെയ്തിരിക്കുന്നത്.
പ്രധാന സൗകര്യങ്ങൾ:
4 എസി സ്യൂട്ട് റൂമുകൾ, 16 എസി ഡീലക്സ് റൂമുകൾ.
2 എസി സിംഗിൾ റൂമുകൾ, 4 നോൺ എസി സിംഗിൾ റൂമുകൾ.
യൂട്ടിലിറ്റി റൂമോട് കൂടിയ എസി കോൺഫറൻസ് ഹാൾ.
റസ്റ്റോറന്റ്, വിശാലമായ റിസപ്ഷൻ, വെയ്റ്റിംഗ് ഏരിയ.
ലിഫ്റ്റ് സൗകര്യം, മാനേജർ റൂം, സ്റ്റാഫ് റസ്റ്റ് റൂം.
വിശാലമായ കോർട്ട്യാർഡ്, കാർ പോർച്ച്, പാർക്കിംഗ് യാർഡ്.
ചടങ്ങിൽ വർക്കല നഗരസഭ ചെയർപേഴ്സൺ ഗീതാ ഹേമചന്ദ്രൻ, വൈസ് ചെയർപേഴ്സൺ ബി. സുനിൽകുമാർ, വാർഡ് കൗൺസിലർ അനിൽകുമാർ എന്നിവരും വിവിധ രാഷ്ട്രീയ പ്രതിനിധികളായ എം.കെ യൂസഫ്, ഷിജു അരവിന്ദ്, സജീർ രാജകുമാരി തുടങ്ങിയവരും പങ്കെടുത്തു. ഉദ്യോഗസ്ഥ തലത്തിൽ പൊതുമരാമത്ത് കെട്ടിട വിഭാഗം ചീഫ് എൻജിനീയർ ദീപു. എസ്, ചീഫ് ഇലക്ട്രിക്കൽ എൻജിനീയർ കോശി ജോൺ തുടങ്ങിയവരും സംബന്ധിച്ചു.
