മണപ്പുറം സെന്റ് തെരേസാസ് സ്കൂളിന് ഇരട്ട പുരസ്കാരം

ചിൽഡ്രൻ ഫോർ ആലപ്പി ഒരുപിടി നന്മ പദ്ധതിക്കും സുരക്ഷിത് മാർഗ്ഗ് റോഡ് സുരക്ഷാ പദ്ധതിക്കും മണപ്പുറം സെന്റ് തെരേസാസ് ഹൈസ്കൂളിന് ജില്ലാ കളക്ടറുടെ പ്രത്യേക പുരസ്കാരം

P R Sumeran

Mar 5, 2026 - 10:34

335

മണപ്പുറം സെന്റ് തെരേസാസ് സ്കൂളിന് ഇരട്ട പുരസ്കാരം

മണപ്പുറം സെന്റ് തെരേസാസ് ഹൈസ്കൂളിന് ഇരട്ട നേട്ടം; 'ഒരുപിടി നന്മ'യ്ക്കും 'സുരക്ഷിത് മാർഗ്ഗി'നും ജില്ലാ കളക്ടറുടെ പുരസ്കാരം

ആലപ്പുഴ (ചേർത്തല): കാരുണ്യപ്രവർത്തനങ്ങളിലും റോഡ് സുരക്ഷാ പ്രവർത്തനങ്ങളിലും മാതൃകയായി മണപ്പുറം സെന്റ് തെരേസാസ് ഹൈസ്കൂൾ. മുൻ ആലപ്പുഴ ജില്ലാ കളക്ടറും നിലവിൽ ആന്ധ്രപ്രദേശ് പഞ്ചായത്ത് രാജ് റൂറൽ ഡെവലപ്മെന്റ് കമ്മീഷണറുമായ വി.ആർ. കൃഷ്ണ തേജ ഐ.എ.എസ് നൽകിയ പ്രത്യേക പ്രശംസാ പത്രവും, റോഡ് സുരക്ഷാ പദ്ധതിയുടെ മെമെന്റോയും സ്കൂൾ അധികൃതർ ഏറ്റുവാങ്ങി.

ആലപ്പുഴ ജില്ലാ കളക്ടർ അലക്സ് വർഗീസ് ഐ.എ.എസിൽ നിന്ന് സ്കൂൾ മാനേജർ ഫാ. ജെയിംസ് പുതുശ്ശേരി സി.എം.ഐ., ഹെഡ്മിസ്ട്രസ് റെജി എബ്രഹാം എന്നിവരുടെ നേതൃത്വത്തിലുള്ള സംഘമാണ് പുരസ്കാരങ്ങൾ സ്വീകരിച്ചത്.

കാരുണ്യത്തിന്റെ 'ഒരുപിടി നന്മ'

2023-ൽ വി.ആർ. കൃഷ്ണ തേജയുടെ ആശയത്തിൽ രൂപംകൊണ്ട 'ചിൽഡ്രൻ ഫോർ ആലപ്പി - ഒരുപിടി നന്മ' പദ്ധതി ഏറ്റവും മികച്ച രീതിയിൽ നടപ്പിലാക്കിയതിനാണ് സ്കൂളിന് അഭിനന്ദനം ലഭിച്ചത്. കുട്ടികൾ സ്വരൂപിക്കുന്ന ഭക്ഷ്യവസ്തുക്കൾ അർഹരായ പത്ത് കുടുംബങ്ങളിലേക്ക് എത്തിക്കുന്ന ഈ പദ്ധതി, മൂന്ന് വർഷം പിന്നിടുമ്പോഴും സ്കൂളിൽ സജീവമായി തുടരുന്നു. കുട്ടികളിൽ പങ്കുവെക്കലിന്റെയും സഹാനുഭൂതിയുടെയും മൂല്യങ്ങൾ വളർത്താൻ ഈ പദ്ധതിക്ക് കഴിഞ്ഞതായി കളക്ടർ അഭിപ്രായപ്പെട്ടു.

500 ദിനങ്ങൾ പിന്നിട്ട് 'സുരക്ഷിത് മാർഗ്ഗ്'

റോഡ് സുരക്ഷ ഉറപ്പാക്കുന്നതിനായി സ്കൂൾ നടപ്പിലാക്കിയ 'സുരക്ഷിത് മാർഗ്ഗ്' പദ്ധതി 500 ദിനങ്ങൾ വിജയകരമായി പൂർത്തിയാക്കി. മുൻ ഹെഡ്മാസ്റ്റർ ഷാജു സി.ആറിന്റെ ആശയത്തിൽ തുടങ്ങിയ ഈ പദ്ധതിയിലൂടെ, അധ്യാപകരുടെയും മാതാപിതാക്കളുടെയും നേതൃത്വത്തിൽ കുട്ടികളെ സുരക്ഷിതമായി റോഡ് മുറിച്ചുകടക്കാൻ സഹായിക്കുന്നു. ഈ നേട്ടത്തിനുള്ള പ്രത്യേക മെമെന്റോയും ചടങ്ങിൽ കൈമാറി.

ഒരുപിടി നന്മ കോർഡിനേറ്റർ ഫാ. ആന്റോച്ചൻ മംഗലശ്ശേരി സി.എം.ഐ., അസിസ്റ്റന്റ് കോർഡിനേറ്റർ ലിംസോ പൗലോസ്, പി.ടി.എ പ്രസിഡന്റ് ദിപു എസ്. പിള്ള, സിസ്റ്റർ അനുപമ, ഹരികുമാർ എന്നിവരും പുരസ്കാര വിതരണ ചടങ്ങിൽ പങ്കെടുത്തു.