പ്രതികളുടെ ചിത്രം സോഷ്യൽ മീഡിയയിൽ പങ്കുവെക്കുന്നതിൽ ആശങ്ക പൊലീസിന് മാർഗനിർദേശം നൽകാൻ സുപ്രീംകോടതി
പ്രതികളുടെ അന്തസ്സ് കെടുത്തുന്ന രീതിയിൽ ദൃശ്യങ്ങൾ പ്രചരിപ്പിക്കുന്നത് സോഷ്യൽ മീഡിയ വിചാരണയ്ക്ക് വഴിയൊരുക്കുമെന്ന് സുപ്രീംകോടതി. പൊലീസിന്റെ ഇടപെടലുകളിൽ കർശന മാർഗരേഖ വരുന്നു.
അനില എം കൃഷ്ണൻ 
പ്രതികളുടെ ചിത്രം സോഷ്യൽ മീഡിയയിൽ പങ്കുവെക്കുന്നതിൽ ആശങ്ക: പൊലീസിന് മൂക്കുകയറിടാൻ സുപ്രീംകോടതി
ന്യൂഡൽഹി: കുറ്റാരോപിതരുടെ ചിത്രങ്ങളും ദൃശ്യങ്ങളും ഔദ്യോഗിക സോഷ്യൽ മീഡിയ അക്കൗണ്ടുകൾ വഴി പ്രചരിപ്പിക്കുന്ന പൊലീസ് നടപടിയിൽ സുപ്രീംകോടതി കടുത്ത ആശങ്ക രേഖപ്പെടുത്തി. പ്രതികളെ കൈകൾ ബന്ധിച്ചും മുട്ടുകുത്തിച്ചും പരേഡ് ചെയ്യിക്കുന്ന ദൃശ്യങ്ങൾ പൊലീസ് തന്നെ പോസ്റ്റ് ചെയ്യുന്നത് വ്യക്തികളുടെ അന്തസ്സിനെ ബാധിക്കുമെന്നും ഇത് അനാവശ്യമായ 'സോഷ്യൽ മീഡിയ വിചാരണ'യ്ക്ക് (Social Media Trial) വഴിമാറുമെന്നും കോടതി നിരീക്ഷിച്ചു.
പ്രതികളുടെ ചിത്രം പോസ്റ്റ് ചെയ്യുന്നതിന് വ്യക്തമായ മാർഗനിർദേശം ആവശ്യപ്പെട്ടുള്ള പൊതുതാൽപര്യ ഹർജി പരിഗണിക്കവെയാണ് ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചിന്റെ പരാമർശം. ഗുജറാത്ത്, ഹരിയാന, മഹാരാഷ്ട്ര തുടങ്ങിയ സംസ്ഥാനങ്ങളിലെ പൊലീസിന്റെ സോഷ്യൽ മീഡിയ ഇടപെടലുകൾ ഹർജിയിൽ ചൂണ്ടിക്കാട്ടിയിരുന്നു.
കോടതിയുടെ പ്രധാന നിരീക്ഷണങ്ങൾ:
അന്തസ്സ് സംരക്ഷിക്കപ്പെടണം: കുറ്റം തെളിയുന്നത് വരെ ഒരാളെ കുറ്റവാളിയായി ചിത്രീകരിക്കുന്നത് നിയമവാഴ്ചയ്ക്ക് വിരുദ്ധമാണ്.
മാധ്യമ വിചാരണ: നിയമവാഴ്ചയെ അട്ടിമറിക്കുന്ന രീതിയിലുള്ള മാധ്യമ വിചാരണയ്ക്ക് പൊലീസ് തന്നെ സാഹചര്യം ഒരുക്കരുത്.
മാറുന്ന കാലം: ഇന്ന് ഫോൺ കയ്യിലുള്ളവരെല്ലാം മാധ്യമപ്രവർത്തകരാകുന്ന സാഹചര്യമാണ്. റോഡപകടമുണ്ടായാൽ ഒരാളെ സഹായിക്കുന്നതിനേക്കാൾ ദൃശ്യങ്ങൾ പകർത്താനാണ് പലർക്കും താല്പര്യം.
പുതിയ മാർഗരേഖ: മാധ്യമങ്ങൾക്ക് വിവരം കൈമാറുന്നതിൽ പൊലീസിന് പാലിക്കേണ്ട ചട്ടങ്ങൾ രൂപീകരിക്കാൻ കോടതി നിർദ്ദേശിച്ചു.
ഉത്തരവാദിത്തത്തോടെ പ്രവർത്തിക്കുന്ന മാധ്യമങ്ങൾ ഉണ്ടെങ്കിലും, ബ്ലാക്ക് മെയിലിംഗ് സ്വഭാവമുള്ള ടാബ്ലോയിഡുകളും ഡിജിറ്റൽ പ്ലാറ്റ്ഫോമുകളും വർധിച്ചു വരുന്നത് ഗൗരവകരമാണെന്ന് സോളിസിറ്റർ ജനറൽ തുഷാർ മേത്തയും കോടതിയിൽ അഭിപ്രായപ്പെട്ടു.
