നിയമസഭാ തിരഞ്ഞെടുപ്പ് 2026 പെരുമാറ്റച്ചട്ട ലംഘനങ്ങൾ തടയാൻ സി വിജിൽ ആപ്പ് പരാതികൾക്ക് 100 മിനിറ്റിനുള്ളിൽ പരിഹാരം

​നിയമസഭാ തിരഞ്ഞെടുപ്പ്: പെരുമാറ്റച്ചട്ട ലംഘനം തടയാൻ 'സി-വിജിൽ'; 100 മിനിറ്റിനുള്ളിൽ പരിഹാരം

നിയമസഭാ തിരഞ്ഞെടുപ്പ് പ്രഖ്യാപിച്ചതോടെ മാതൃകാ പെരുമാറ്റച്ചട്ട ലംഘനങ്ങൾ തടയാൻ കർശന നടപടികളുമായി തിരഞ്ഞെടുപ്പ് കമ്മീഷൻ. പൊതുജനങ്ങൾക്ക് പരാതികൾ നേരിട്ട് അറിയിക്കാൻ 'സി-വിജിൽ' (c-VIGIL) മൊബൈൽ ആപ്ലിക്കേഷൻ സജ്ജമായി. പണം, മദ്യം, ലഹരിമരുന്ന് വിതരണം, ഭീഷണിപ്പെടുത്തൽ, മതസ്പർധയുണ്ടാക്കുന്ന പ്രസംഗങ്ങൾ തുടങ്ങിയ ഏത് ലംഘനവും ഈ ആപ്പിലൂടെ അധികൃതരെ അറിയിക്കാം.

​പരാതി നൽകേണ്ടത് ഇങ്ങനെ:

പ്ലേ സ്റ്റോറിൽ നിന്ന് ഡൗൺലോഡ് ചെയ്ത ആപ്പിലൂടെ തത്സമയ ചിത്രങ്ങൾ, 2 മിനിറ്റ് വരെയുള്ള വീഡിയോകൾ, ശബ്ദരേഖകൾ എന്നിവ സമർപ്പിക്കാം. ലൊക്കേഷൻ കണ്ടെത്താൻ ജിഐഎസ് (GIS) സംവിധാനം ഉപയോഗിക്കുന്നതിനാൽ അതിവേഗ അന്വേഷണം സാധ്യമാകും. നേരത്തെ ഫോണിലുള്ള ഫോട്ടോകളോ വീഡിയോകളോ അപ്‌ലോഡ് ചെയ്യാനാവില്ല; സംഭവസ്ഥലത്തുനിന്ന് 5 മിനിറ്റിനുള്ളിൽ തന്നെ പരാതി നൽകണം. പരാതിക്കാരന് പേരുവിവരങ്ങൾ വെളിപ്പെടുത്താതെയും (Anonymous) വിവരങ്ങൾ കൈമാറാം.

​100 മിനിറ്റിൽ മറുപടി:

പരാതി ലഭിച്ചാൽ ഉടൻ തന്നെ ഫ്ലയിങ് സ്‌ക്വാഡ്, ആന്റി ഡീഫേയ്‌സ്‌മെന്റ് സ്‌ക്വാഡ് എന്നിവർക്ക് വിവരം കൈമാറും. അന്വേഷണ റിപ്പോർട്ട് ലഭിക്കുന്ന മുറയ്ക്ക് വരണാധികാരി നടപടി സ്വീകരിക്കും. പരാതി നൽകി 100 മിനിറ്റിനുള്ളിൽ സ്വീകരിച്ച നടപടി പരാതിക്കാരനെ അറിയിക്കും. യുണീക് ഐഡി ഉപയോഗിച്ച് പരാതിയുടെ സ്ഥിതി ട്രാക്ക് ചെയ്യാനും സാധിക്കും.

​കോട്ടയത്ത് 27 കേന്ദ്രങ്ങളിൽ പരിശോധന:

ജില്ലയിൽ 27 കേന്ദ്രങ്ങളിലായി സ്റ്റാറ്റിക് സർവൈലൻസ് ടീമുകൾ (SST) 24 മണിക്കൂറും പരിശോധന നടത്തുന്നുണ്ട്. രേഖകളില്ലാതെ 50,000 രൂപയിൽ കൂടുതൽ കൈവശം വെക്കുന്നത് പിടിച്ചെടുക്കും. ജില്ലാ ഫിനാൻസ് ഓഫിസർക്കാണ് ഏകോപന ചുമതല. അതിർത്തി പ്രദേശങ്ങളിലും പ്രധാന റോഡുകളിലും വിഡിയോഗ്രാഫർ അടങ്ങുന്ന സംഘം കർശന നിരീക്ഷണം തുടരുകയാണ്.