കേരളത്തിൽ ചൂട് അസഹനീയം ഹീറ്റ് ഇൻഡക്സ് 50 ഡിഗ്രി കടന്നു, വിവിധ ജില്ലകളിൽ മഞ്ഞ അലർട്ട്
കേരളത്തിൽ അന്തരീക്ഷ താപനില ഉയരുന്നു. ഹീറ്റ് ഇൻഡക്സ് 50 ഡിഗ്രി സെൽഷ്യസിന് മുകളിലെത്തിയതായി കുസാറ്റ് റിപ്പോർട്ട്. എറണാകുളം ഉൾപ്പെടെയുള്ള ജില്ലകളിൽ യെല്ലോ അലർട്ട്.
Angel Varghese 
സംസ്ഥാനത്ത് ഉഷ്ണതരംഗ സമാനമായ സാഹചര്യം; അനുഭവപ്പെടുന്നത് 50 ഡിഗ്രിയിലേറെ ചൂട്, ജാഗ്രതാ നിർദ്ദേശം
കൊച്ചി: കേരളത്തിൽ വരും ദിവസങ്ങളിൽ ചൂട് അസഹനീയമാകുമെന്ന് കാലാവസ്ഥാ വിദഗ്ധരുടെ മുന്നറിയിപ്പ്. അന്തരീക്ഷ താപനില 38 ഡിഗ്രി സെൽഷ്യസ് ആണെങ്കിലും ഈർപ്പത്തിന്റെ (Humidity) സാന്നിധ്യം മൂലം അനുഭവപ്പെടുന്ന ചൂട് (Heat Index) 50 ഡിഗ്രി സെൽഷ്യസിന് മുകളിലെത്തിയതായി കുസാറ്റ് അഡ്വാൻസ്ഡ് സെന്റർ ഫോർ അറ്റ്മോസ്ഫറിക് റഡാർ റിസർച് ഡയറക്ടർ ഡോ. എസ്. അഭിലാഷ് അറിയിച്ചു. ഒരാഴ്ച കൂടി നിലവിലെ സാഹചര്യം തുടരാനാണ് സാധ്യത.
ദക്ഷിണേന്ത്യയ്ക്ക് മുകളിൽ സൂര്യൻ ഉച്ചസ്ഥായിയിൽ നിൽക്കുന്നതിനാൽ അൾട്രാ വയലറ്റ് (UV) രശ്മികളുടെ സാന്ദ്രത വർധിച്ചിട്ടുണ്ട്. മഴമേഘങ്ങളുടെ അഭാവവും വടക്കൻ അറബിക്കടലിൽ രൂപപ്പെട്ട എതിർചക്രവാതവും ചൂടുകൂടിയ വായുസഞ്ചാരവും താപനില ഉയരാൻ പ്രധാന കാരണങ്ങളാകുന്നു. സാധാരണ താപനിലയേക്കാൾ കൂടുതൽ ശരീരത്തിന് അനുഭവപ്പെടുന്ന 'ഹീറ്റ് ഇൻഡക്സ്' ഉയരുന്നത് ആരോഗ്യപ്രശ്നങ്ങൾക്ക് കാരണമായേക്കാം.
അടുത്ത രണ്ട് ദിവസങ്ങളിൽ വയനാട്, ഇടുക്കി ഒഴികെയുള്ള ജില്ലകളിൽ താപനില 36 ഡിഗ്രി സെൽഷ്യസിന് മുകളിൽ തുടരും. എറണാകുളം ജില്ലയിൽ ഏപ്രിൽ 14, 15 തീയതികളിൽ ചൂട് 37 ഡിഗ്രി സെൽഷ്യസിലേക്ക് ഉയരാൻ സാധ്യതയുള്ളതിനാൽ മഞ്ഞ അലർട്ട് (Yellow Alert) പ്രഖ്യാപിച്ചു. കഠിനമായ ചൂട് കണക്കിലെടുത്ത് ഉച്ചസമയങ്ങളിൽ നേരിട്ട് വെയിൽ ഏൽക്കുന്നത് ഒഴിവാക്കണമെന്നും നിർദ്ദേശമുണ്ട്.
