വിഷുവിനെ വരവേൽക്കാൻ മൂവാറ്റുപുഴ കുടുംബശ്രീ വിഷു വിപണനമേളയ്ക്ക് തുടക്കമായി
വിഷു ആഘോഷങ്ങൾക്കായി കുടുംബശ്രീയുടെ നേതൃത്വത്തിൽ മൂവാറ്റുപുഴയിൽ വിപണനമേള തുടങ്ങി. ജൈവ പച്ചക്കറികളും വിഷുക്കണി കിറ്റുകളും മേളയുടെ സവിശേഷതയാണ്.
Angel Varghese 
മൂവാറ്റുപുഴ: വിഷു ആഘോഷങ്ങൾക്ക് പൊലിമ കൂട്ടാൻ കുടുംബശ്രീയുടെ നേതൃത്വത്തിൽ ഒരുക്കിയ 'വിഷു വിപണനമേള'യ്ക്ക് മൂവാറ്റുപുഴ നഗരസഭയിൽ തുടക്കമായി. കുടുംബശ്രീ സി.ഡി.എസ് ചെയർപേഴ്സൺ ധന്യ അരുൺ മേളയുടെ ഉദ്ഘാടനം നിർവ്വഹിച്ചു. വിഷുവിനെ വരവേൽക്കാൻ ആവശ്യമായ വിഭവങ്ങളെല്ലാം കുറഞ്ഞ നിരക്കിൽ ഒരു കുടക്കീഴിൽ എത്തിക്കുക എന്ന ലക്ഷ്യത്തോടെയാണ് നഗരസഭാ പരിസരത്ത് പ്രത്യേക സ്റ്റാളുകൾ സജ്ജമാക്കിയിരിക്കുന്നത്. നഗരസഭയിലെ വിവിധ കുടുംബശ്രീ സംരംഭകരുടെയും കർഷകരുടെയും ഉൽപ്പന്നങ്ങളാണ് മേളയിൽ വിപണനത്തിനായി എത്തിച്ചിരിക്കുന്നത്. കുടുംബശ്രീയുടെ തനത് ബ്രാൻഡ് ഉൽപ്പന്നങ്ങളാണ് മേളയുടെ പ്രധാന ആകർഷണം.
വിഷുക്കണി ഒരുക്കാൻ ആവശ്യമായ സാധനങ്ങൾ അടങ്ങിയ പ്രത്യേക കിറ്റുകൾ, കണിവെള്ളരി, നാടൻ പച്ചക്കറികൾ, വിവിധതരം പൊടികൾ തുടങ്ങിയ ജൈവ വിഭവങ്ങൾ മേളയിൽ ലഭ്യമാണ്. ഇവയ്ക്ക് പുറമെ പായസം, അച്ചാറുകൾ, പലഹാരങ്ങൾ, മില്ലറ്റ് ഉൽപ്പന്നങ്ങൾ എന്നിവയും സോപ്പുകൾ, ഹാൻഡിക്രാഫ്റ്റ് ഉൽപ്പന്നങ്ങൾ, നൈറ്റികൾ തുടങ്ങിയവയും സ്റ്റാളുകളിൽ ഒരുക്കിയിട്ടുണ്ട്. വരുംദിവസങ്ങളിൽ കൂടുതൽ ആളുകളെ മേളയിലേക്ക് പ്രതീക്ഷിക്കുന്നതായി സംഘാടകർ അറിയിച്ചു.
ഉദ്ഘാടന ചടങ്ങിൽ കുടുംബശ്രീ മെമ്പർ സെക്രട്ടറി സുധീഷ് വി. സുഗുമാരൻ, സി.ഡി.എസ് വൈസ് ചെയർപേഴ്സൺ നിഷ മനോജ്, സർമ്മ നാഷാദ്, മറ്റ് സി.ഡി.എസ് അംഗങ്ങൾ തുടങ്ങിയവർ പങ്കെടുത്തു. ഏപ്രിൽ 15 വരെ നീണ്ടുനിൽക്കുന്ന മേള എല്ലാ ദിവസവും രാവിലെ 10 മണി മുതൽ പൊതുജനങ്ങൾക്ക് സന്ദർശിക്കാവുന്നതാണ്.
