കള്ളാടി തുരങ്ക പാത മണ്ണിടിച്ചിൽ ദുരന്തനിവാരണ പ്രവർത്തനങ്ങൾ ഏകോപിപ്പിക്കാൻ പ്രിയങ്ക ഗാന്ധി എം.പി

കള്ളാടി തുരങ്ക പാത മണ്ണിടിച്ചിൽ: ദുരന്തനിവാരണ പ്രവർത്തനങ്ങൾ ഏകോപിപ്പിക്കാൻ പ്രിയങ്ക ഗാന്ധി എം.പി; ജാഗ്രതാ നിർദേശവുമായി മുഖ്യമന്ത്രി

​കല്പറ്റ: കള്ളാടി തുരങ്ക പാത നിർമാണ പ്രദേശത്തെ മണ്ണിടിച്ചിൽ മേഖലയിലെ ദുരന്ത നിവാരണ പ്രവർത്തനങ്ങൾ അടിയന്തിരമായി ഏകോപിപ്പിക്കാൻ പ്രിയങ്ക ഗാന്ധി എം.പി നിർദേശം നൽകി. കളക്ടറേറ്റ് മിനി കോൺഫറൻസ് ഹാളിൽ മുഖ്യമന്ത്രി വി.ഡി സതീശന്റെ അധ്യക്ഷതയിൽ ചേർന്ന അവലോകന യോഗത്തിൽ ഓൺലൈനായി പങ്കെടുത്തു സംസാരിക്കുകയായിരുന്നു എം.പി.

​ജില്ലയിലെ പരിസ്ഥിതി ദുർബല പ്രദേശങ്ങളിൽ നിന്നും വെള്ളപ്പൊക്ക ഭീഷണി നേരിടുന്ന സ്ഥലങ്ങളിൽ നിന്നും ആളുകളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിക്കണമെന്ന് പ്രിയങ്ക ഗാന്ധി ആവശ്യപ്പെട്ടു. മഴ തുടരുന്ന സാഹചര്യത്തിൽ കള്ളാടി ഉൾപ്പെടെയുള്ള മണ്ണിടിച്ചിൽ മേഖലകളിൽ കടുത്ത ജാഗ്രത പാലിക്കണം. മേപ്പാടിയിലുണ്ടായത് ഒറ്റപ്പെട്ട അപകടമാണെന്നും, ജില്ലയെ മുഴുവൻ ബാധിച്ച രീതിയിൽ ഇതിനെ തെറ്റായി പ്രചരിപ്പിക്കരുതെന്നും എം.പി ഓർമ്മിപ്പിച്ചു. അപകടത്തിന്റെ കാരണങ്ങൾ കണ്ടെത്താൻ സമഗ്രമായ അന്വേഷണം നടത്തണമെന്നും കാണാതായവരുടെ ബന്ധുക്കൾക്ക് ആവശ്യമായ പിന്തുണ നൽകണമെന്നും അവർ നിർദേശിച്ചു. രക്ഷാപ്രവർത്തനങ്ങൾക്ക് നേതൃത്വം നൽകുന്ന ജില്ലാ ഭരണകൂടത്തെയും വിവിധ സുരക്ഷാ സേനകളെയും വളണ്ടിയർമാരെയും എം.പി അഭിനന്ദിച്ചു.

​ദുരന്തനിവാരണ നിർദേശങ്ങൾ പാലിക്കുന്നതിൽ വീഴ്ച വരുത്തുന്നവർക്കെതിരെ കർശന നടപടി സ്വീകരിക്കുമെന്ന് മുഖ്യമന്ത്രി വി.ഡി സതീശൻ യോഗത്തിൽ വ്യക്തമാക്കി. വയനാട്ടിൽ 81 മേഖലകളാണ് പരിസ്ഥിതി ദുർബല പ്രദേശങ്ങളായി കണ്ടെത്തിയിട്ടുള്ളതെന്ന് ജില്ലാ കലക്ടർ യോഗത്തെ അറിയിച്ചു. ഈ സാഹചര്യത്തിൽ, ദുർബല പ്രദേശങ്ങളിലെ തദ്ദേശ സ്ഥാപനങ്ങളെ ഉൾപ്പെടുത്തി അടിയന്തിര യോഗം ചേരാൻ മുഖ്യമന്ത്രി ജില്ലാ കലക്ടർക്ക് നിർദേശം നൽകി.

​അവലോകന യോഗത്തിൽ മന്ത്രിമാരായ എ.പി അനിൽകുമാർ, ടി. സിദ്ദീഖ്, എം.എൽ.എ ഐ.സി ബാലകൃഷ്ണൻ, ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ, ജില്ലാ കലക്ടർ ഡി.ആർ മേഘശ്രീ, കണ്ണൂർ റേഞ്ച് ഡി.ഐ.ജി കെ കാർത്തിക്, ജില്ലാ പൊലീസ് മേധാവി എസ്. ദേവമനോഹ‍ർ, സബ് കളക്ടർ അതുൽ സാഗർ എന്നിവരും വിവിധ വകുപ്പ് ഉദ്യോഗസ്ഥരും ജനപ്രതിനിധികളും പങ്കെടുത്തു.