മമ്മൂട്ടിക്ക് എംജി സർവകലാശാലയുടെ ഡി ലിറ്റ് ഗവർണർ രാജേന്ദ്ര അർലേക്കറിൽ നിന്നും ബിരുദം സ്വീകരിച്ചു
ഇന്ത്യൻ സിനിമയ്ക്ക് നൽകിയ സമഗ്ര സംഭാവനകൾ പരിഗണിച്ച് നടൻ മമ്മൂട്ടിക്ക് മഹാത്മാഗാന്ധി സർവകലാശാലയുടെ ഓണററി ഡി ലിറ്റ് ബിരുദം. ഗവർണർ രാജേന്ദ്ര അർലേക്കറിൽ നിന്നും അദ്ദേഹം പുരസ്കാരം സ്വീകരിച്ചു.
Angel Varghese 
സിനിമാ ലോകത്തെ സമഗ്ര സംഭാവന; നടൻ മമ്മൂട്ടിക്ക് എംജി സർവകലാശാലയുടെ ഡി ലിറ്റ് ബിരുദം
കോട്ടയം: ഇന്ത്യൻ ചലച്ചിത്ര ലോകത്തിന് നൽകിയ സമാനതകളില്ലാത്ത സമഗ്ര സംഭാവനകൾ മുൻനിർത്തി മഹാനടൻ ശ്രീ. മമ്മൂട്ടിക്ക് മഹാത്മാഗാന്ധി സർവകലാശാലയുടെ ഓണററി ഡി ലിറ്റ് (D.Litt) ബിരുദം. കോട്ടയത്ത് നടന്ന പ്രത്യേക ചടങ്ങിൽ കേരള ഗവർണർ രാജേന്ദ്ര അർലേക്കറിൽ നിന്നും അദ്ദേഹം ബിരുദം ഏറ്റുവാങ്ങി. മമ്മൂട്ടിക്ക് ലഭിക്കുന്ന മൂന്നാമത്തെ ഓണററി ഡോക്ടറേറ്റ് ആണിത്. നേരത്തെ കേരള സർവകലാശാലയും കാലിക്കറ്റ് സർവകലാശാലയും ഡോക്ടറേറ്റ് നൽകി അദ്ദേഹത്തെ ആദരിച്ചിട്ടുണ്ട്.
രാജ്യം 1998-ൽ പത്മശ്രീയും, ഈ വർഷം (2026) പത്മഭൂഷണും നൽകി ആദരിച്ച മമ്മൂട്ടിക്ക്, എംജി സർവകലാശാലയുടെ ഈ ബഹുമതി അദ്ദേഹത്തിന്റെ ഐതിഹാസികമായ ചലച്ചിത്ര ജീവിതത്തിലെ മറ്റൊരു പൊൻതൂവലായി മാറി. മികച്ച നടനുള്ള ദേശീയ പുരസ്കാരം മൂന്ന് തവണയും, സംസ്ഥാന പുരസ്കാരം അഞ്ച് തവണയും, ഫിലിംഫെയർ (ദക്ഷിണേന്ത്യൻ) പുരസ്കാരം 12 തവണയും കരസ്ഥമാക്കിയ അദ്ദേഹം ഇന്നും സിനിമാ രംഗത്ത് സജീവമായി തുടരുകയാണ്.
മറ്റു പ്രമുഖർക്കും ആദരം
മമ്മൂട്ടിയെ കൂടാതെ കേരളത്തിന്റെ സാംസ്കാരിക-വൈദ്യശാസ്ത്ര രംഗത്തെ പ്രമുഖരായ നാദസ്വര വിദ്വാൻ തിരുവിഴ ശ്രീ. ജയശങ്കർ, പ്രശസ്ത വാസ്കുലർ സർജൻ ശ്രീ. ഡോ. എൻ. രാധാകൃഷ്ണൻ എന്നിവർക്കും എം ജി സർവ്വകലാശാല ഇതേ ചടങ്ങിൽ ഓണററി ബിരുദങ്ങൾ നൽകി ആദരിച്ചു.
സർവകലാശാല പ്രതിനിധികളും സാംസ്കാരിക നായകന്മാരും പങ്കെടുത്ത പ്രൗഢഗംഭീരമായ ചടങ്ങിലാണ് പുരസ്കാരങ്ങൾ വിതരണം ചെയ്തത്.
