​ഹൈന്ദവ അവകാശ സംരക്ഷണയാത്ര സമാപിച്ചു ​സാധു കൃഷ്ണാനന്ദ സരസ്വതി മഹാരാജിന് ആദിത്യവർമ്മ തമ്പുരാന്റെ സ്വീകരണം

​ഹൈന്ദവ അവകാശ സംരക്ഷണയാത്ര സമാപിച്ചു; അവഗണനകൾക്കെതിരെ ശക്തമായ പ്രതിഷേധവുമായി സമിതി

​തിരുവനന്തപുരം: ആദ്ധ്യാത്മികം, രാഷ്ട്രീയം, വിദ്യാഭ്യാസം, സംസ്കാരം തുടങ്ങി സകല മേഖലകളിലും ഹൈന്ദവ സമൂഹം നേരിടുന്ന അവഗണനകൾക്കെതിരെ ഹിന്ദു അവകാശ സംരക്ഷണ സമിതി സംഘടിപ്പിച്ച 'ഹിന്ദു അവകാശ സംരക്ഷണയാത്ര' പത്മനാഭസ്വാമി ക്ഷേത്രസന്നിധിയിൽ സമാപിച്ചു. ഭൂരിപക്ഷ സമൂഹത്തിന് അർഹമായ ആനുകൂല്യങ്ങൾ നിഷേധിക്കപ്പെടുന്നുവെന്നും മതേതരത്വത്തിന്റെ മറവിൽ സനാതന ധർമ്മ വിരുദ്ധ പ്രവർത്തനങ്ങൾ വർദ്ധിക്കുന്നുവെന്നും ചൂണ്ടിക്കാട്ടിയാണ് യാത്ര സംഘടിപ്പിച്ചത്.ഓച്ചിറ പരബ്രഹ്മ ക്ഷേത്രത്തിൽ നിന്ന് മാർഗ്ഗദർശകമണ്ഡൽ ജനറൽ സെക്രട്ടറി സ്വാമി സത്സ്വരൂപാനന്ദ സരസ്വതി ഉദ്ഘാടനം ചെയ്ത് യാത്രയാക്കിയ രഥം നിരവധി ക്ഷേത്രങ്ങളിൽ സ്വീകരണങ്ങൾ ഏറ്റുവാങ്ങി.

വിവിധ ഹൈന്ദവ സംഘടനകൾ അവകാശ സംരക്ഷണ യാത്രയിൽ ഭാഗമായി. 

ഹൈന്ദവ സാമൂഹിക സാംസ്കാരിക രംഗങ്ങളിലെ പ്രമുഖരായിരുന്നു യാത്രയിൽ കൂടെയുണ്ടായിരുന്നത്.

​ഓച്ചിറ പരബ്രഹ്മ ക്ഷേത്രത്തിൽ നിന്നും ആരംഭിച്ച യാത്രയ്ക്ക് വിവിധ ഗ്രാമങ്ങളിലും ക്ഷേത്രങ്ങളിലും വൻ ഭക്തജന പങ്കാളിത്തത്തോടെയുള്ള സ്വീകരണമാണ് ലഭിച്ചത്. സമാപന വേളയിൽ ശ്രീ പത്മനാഭസ്വാമി ക്ഷേത്രത്തിൽ വെച്ച് തിരുവിതാംകൂർ രാജകുടുംബാംഗം ആദിത്യവർമ്മ തമ്പുരാൻ, യാത്രയുടെ മുഖ്യ രക്ഷാധികാരി വിശ്വബ്രഹ്മ ശങ്കരാചാര്യ പീഠാധീശ്വർ ദണ്ഡിസ്വാമി സാധു കൃഷ്ണാനന്ദ സരസ്വതി മഹാരാജിനെ പൂർണ്ണകുംഭം നൽകി സ്വീകരിച്ചു.

​മത-രാഷ്ട്രീയ നേതാക്കൾ കയ്യേറുന്ന ശങ്കരമഠങ്ങളുടെ ഭൂസ്വത്തുക്കൾ സംരക്ഷിക്കണമെന്നും ഹൈന്ദവ സമൂഹം നേരിടുന്ന ആത്മീയവും ഭൗതികവുമായ പ്രശ്നങ്ങളിൽ സർക്കാർ-കോടതി തലങ്ങളിൽ അടിയന്തര ഇടപെടൽ വേണമെന്നും സ്വാമിജി ആവശ്യപ്പെട്ടു.

പ്രധാന ആവശ്യങ്ങൾ:

​യാത്രയുടെ ഭാഗമായി സമിതി മുന്നോട്ടുവെച്ച പ്രധാന ആവശ്യങ്ങൾ ഇവയാണ്:

​ഹൈന്ദവ ആദ്ധ്യാത്മിക ക്ഷേമനിധി ബോർഡ് രൂപീകരിക്കുക.

​ക്ഷേത്ര ഭരണസമിതികളിൽ രാഷ്ട്രീയ പ്രവർത്തകർ വരുന്നത് തടയാൻ നിയമനിർമ്മാണം നടത്തുക.

​കേരളത്തിലെ മതം തിരിച്ചുള്ള ജനസംഖ്യാ കണക്ക് ഔദ്യോഗികമായി പുറത്തുവിടുക.

​ക്ഷേത്രഭൂമികളിലെ അനധികൃത കയ്യേറ്റങ്ങൾ അടിയന്തരമായി ഒഴിപ്പിക്കുക.

​ദേവസ്വം ബോർഡ് വരുമാനത്തിന്റെ 25% നിർദ്ധനരായ ഹൈന്ദവരുടെ ക്ഷേമത്തിനായി മാറ്റിവെക്കുക.

​നിർബന്ധിത മതപരിവർത്തന നിരോധന നിയമം നടപ്പാക്കുക.

​സംസ്കൃത പഠനം സ്കൂളുകളിൽ നിർബന്ധമാക്കുക.

​യജ്ഞാചാര്യൻ സുന്ദരേശൻ നയിച്ച യാത്രയിൽ സമിതി പ്രസിഡന്റ് ഹരിദാസ് മഹാദേവൻ, സംസ്ഥാന സന്യാസി സഭ കൺവീനർ സ്വാമി രാമപ്രസാദാനന്ദ സരസ്വതി തുടങ്ങി പതിമൂന്നിലധികം സന്യാസിവര്യന്മാർ പങ്കെടുത്തു.