മുണ്ടക്കൈ ടൗൺഷിപ്പിലെ വീടിന് വിള്ളൽ പരാതിപ്പെട്ട ദുരന്തബാധിതനെതിരെ സൈബർ ആക്രമണം

​മുണ്ടക്കൈ ടൗൺഷിപ്പിലെ വീടിന് വിള്ളൽ: പരാതിപ്പെട്ട ദുരന്തബാധിതനെതിരെ സൈബർ ആക്രമണം

​കൽപ്പറ്റ: മുണ്ടക്കൈ–ചൂരൽമല പുനരധിവാസത്തിനായി സർക്കാർ ഒരുക്കിയ മാതൃകാ ടൗൺഷിപ്പിലെ വീടിന്റെ നിർമാണപ്പിശക് ചൂണ്ടിക്കാട്ടിയ ദുരന്തബാധിതനെതിരെ വ്യാപക സൈബർ ആക്രമണം. മുണ്ടക്കൈ സ്വദേശിയും പതിനാറോളം ബന്ധുക്കളെ ഉരുൾപൊട്ടലിൽ നഷ്ടപ്പെടുകയും ചെയ്ത കെ.ടി. നൗഫലിനെതിരെയാണ് സമൂഹമാധ്യമങ്ങളിൽ ഇടത് അനുകൂലികൾ ആക്ഷേപമുന്നയിക്കുന്നത്. തനിക്ക് നേരെ ഫോൺ വഴിയും ഭീഷണി ഉയരുന്നതായി നൗഫൽ പറഞ്ഞു.

​നൗഫൽ രാഷ്ട്രീയ പ്രേരിതമായാണ് നുണ പറയുന്നതെന്നും കോൺഗ്രസിൽ നിന്ന് പണം വാങ്ങിയാണ് ഇത്തരം ആരോപണങ്ങൾ ഉന്നയിക്കുന്നതെന്നുമാണ് സൈബർ ഇടങ്ങളിലെ പ്രചാരണം. ടൗൺഷിപ്പിലെ വീട് വേണ്ടെന്നു വെച്ച് കോൺഗ്രസ് നൽകുന്ന വീട് സ്വീകരിക്കാൻ നൗഫൽ തയ്യാറാകണമെന്ന് പരിഹസിച്ചും കമന്റുകൾ വരുന്നുണ്ട്. സൈബർ ആക്രമണത്തിനെതിരെ ഇന്ന് പൊലീസിൽ പരാതി നൽകുമെന്ന് നൗഫൽ വ്യക്തമാക്കി.

​കഴിഞ്ഞ ദിവസം ടൗൺഷിപ്പ് സന്ദർശിച്ച റവന്യൂ മന്ത്രി കെ. രാജൻ, നൗഫലിന്റെ പരാതിയിൽ കഴമ്പില്ലെന്ന് സ്ഥാപിക്കാൻ ശ്രമിച്ചത് വലിയ വിവാദമായിരുന്നു. മേൽക്കൂരയിൽ നിന്ന് വെള്ളം കിനിഞ്ഞിറങ്ങിയ ഭാഗത്തെ അടയാളങ്ങൾ ചുരണ്ടിക്കളഞ്ഞാണ് മന്ത്രി വിള്ളലില്ലെന്ന് അവകാശപ്പെട്ടത്. എന്നാൽ യഥാർത്ഥ വിള്ളലുള്ള അടുത്ത മുറിയിലേക്ക് മന്ത്രി പ്രവേശിച്ചില്ലെന്നും പരാതിക്കാരനായ തന്നെ കാണാൻ മന്ത്രി തയ്യാറായില്ലെന്നും നൗഫൽ ആരോപിച്ചു.

​മാർച്ച് ഒന്നിന് മുഖ്യമന്ത്രി ഉദ്ഘാടനം ചെയ്ത ടൗൺഷിപ്പിലെ വീടിന്റെ രേഖകൾ നൗഫലിന് കൈമാറിയെങ്കിലും ഒന്നര മാസം കഴിഞ്ഞിട്ടും നിർമാണത്തിലെ പോരായ്മകൾ പരിഹരിച്ചിട്ടില്ല. യൂത്ത് കോൺഗ്രസ് നേതാക്കൾക്കൊപ്പം മാധ്യമങ്ങളെ കണ്ട നൗഫൽ മന്ത്രിയുടെ നിലപാടിനെ വിമർശിച്ചതാണ് സൈബർ ആക്രമണം കടുക്കാൻ കാരണം.