തെരുവ് നായ്ക്കളെ വലിച്ചിഴച്ച് കൊലപ്പെടുത്തി നെടുമ്പാശേരിയിൽ രണ്ട് പേർ പോലീസ് പിടിയിൽ
എറണാകുളം ദേശം കുന്നുംപുറത്ത് തെരുവ് നായ്ക്കളെ കുടുക്കിട്ട് പിടിച്ച്, റോഡിലൂടെ വലിച്ചിഴച്ച് ക്രൂരമായി കൊലപ്പെടുത്തിയ കേസിൽ വാൽപ്പാറ സ്വദേശി പുനീത് രാജ്, വരാപ്പുഴ സ്വദേശി രഞ്ജൻ എന്നിവരെ നെടുമ്പാശേരി പോലീസ് അറസ്റ്റ് ചെയ്തു.
Rajeev 
ദേശം കുന്നുംപുറത്ത് തെരുവ് നായ്ക്കളെ ക്രൂരമായി കൊലപ്പെടുത്തിയ സംഭവം: രണ്ട് പേർ നെടുമ്പാശേരി പോലീസിന്റെ പിടിയിൽ
നെടുമ്പാശേരി: തെരുവ് നായ്ക്കളെ കുടുക്കിട്ട് പിടിച്ച് റോഡിലൂടെ വലിച്ചിഴച്ച് കൊണ്ടുപോയി ക്രൂരമായി കൊലപ്പെടുത്തിയ കേസിൽ രണ്ട് പേരെ നെടുമ്പാശേരി പോലീസ് അറസ്റ്റ് ചെയ്തു. തമിഴ്നാട് വാൽപ്പാറ സ്വദേശി പുനീത് രാജ് (55), വരാപ്പുഴ മണ്ണന്തുരുത്ത് സ്വദേശി രഞ്ജൻ (64) എന്നിവരെയാണ് പോലീസ് പിടികൂടിയത്.
കഴിഞ്ഞ മെയ് 27-ാം തീയതി രാവിലെ ദേശം കുന്നുംപുറം ഭാഗത്തായിരുന്നു ക്രൂരമായ സംഭവം നടന്നത്. വഴിയിലൂടെ നായ്ക്കളെ കഴുത്തിൽ കുടുക്കിട്ട് അതിക്രൂരമായി വലിച്ചിഴച്ച് കൊണ്ടുപോയി കൊലപ്പെടുത്തുകയായിരുന്നു. ഈ സമയത്ത് വഴിപോകുകയായിരുന്ന ഒരു മൃഗസ്നേഹിയാണ് മൃഗങ്ങളോടുള്ള ഈ ക്രൂരത കാണാനിടയായത്. ഇദ്ദേഹം ഉടൻ തന്നെ ദൃശ്യങ്ങൾ മൊബൈൽ ഫോണിൽ പകർത്തുകയും, തുടർന്ന് നെടുമ്പാശേരി പോലീസിൽ പരാതി നൽകുകയുമായിരുന്നു.
മൊബൈൽ ദൃശ്യങ്ങളുടെ അടിസ്ഥാനത്തിൽ നെടുമ്പാശേരി പോലീസ് ഇൻസ്പെക്ടർ ബി. കെ. അരുണിന്റെ നേതൃത്വത്തിൽ നടത്തിയ ഊർജ്ജിതമായ അന്വേഷണത്തിനൊടുവിലാണ് പ്രതികളെ കണ്ടെത്തി അറസ്റ്റ് ചെയ്തത്. പ്രതികൾക്കെതിരെ മൃഗങ്ങൾക്കെതിരെയുള്ള ക്രൂരത തടയൽ നിയമപ്രകാരം കേസെടുത്തിട്ടുണ്ട്.
