ട്രോളിങ് നിരോധനം ജൂൺ 9 മുതൽ ഡീസൽ ബങ്കുകൾ അടച്ചിടാൻ കളക്ടറുടെ കർശന നിർദ്ദേശം പരമ്പരാഗത തൊഴിലാളികൾക്ക് ഇളവ്

​ട്രോളിങ് നിരോധനം ജൂൺ 9 മുതൽ: ഹാർബറുകളിലെ ഡീസൽ ബങ്കുകൾ അടച്ചിടാൻ ജില്ലാ കളക്ടറുടെ നിർദ്ദേശം

​കൊച്ചി: സംസ്ഥാനത്ത് ട്രോളിങ് നിരോധനം നിലവിൽ വരുന്നതിന് മുന്നോടിയായി എറണാകുളം ജില്ലയിലെ ഹാർബറുകളിലെ ഡീസൽ ബങ്കുകൾ അടച്ചുപൂട്ടാൻ ജില്ലാ കളക്ടർ ജി. പ്രിയങ്ക നിർദ്ദേശം നൽകി. ട്രോളിങ് നിരോധനവുമായി ബന്ധപ്പെട്ട് കളക്ടറുടെ ചേംബറിൽ ചേർന്ന പ്രത്യേക ജില്ലാതല യോഗത്തിലാണ് തീരുമാനം. ജൂൺ 9 അർദ്ധരാത്രി മുതൽ ജൂലൈ 31 അർദ്ധരാത്രി വരെ 52 ദിവസങ്ങളിലാണ് ഇത്തവണ ട്രോളിങ് നിരോധനം ഏർപ്പെടുത്തിയിരിക്കുന്നത്.

​നിരോധന കാലയളവിൽ പരമ്പരാഗത മത്സ്യത്തൊഴിലാളികൾക്ക് വലിയ ബുദ്ധിമുട്ടുകൾ ഉണ്ടാകാതിരിക്കാൻ പ്രത്യേക ക്രമീകരണങ്ങൾ ഏർപ്പെടുത്തിയിട്ടുണ്ട്. ബയോമെട്രിക് കാർഡ് ഉൾപ്പെടെയുള്ള കൃത്യമായ തിരിച്ചറിയൽ രേഖകൾ കൈവശമുള്ള പരമ്പരാഗത തൊഴിലാളികൾക്ക് കാനുകളിൽ ഡീസൽ നൽകാൻ ബങ്കുകളോട് ആവശ്യപ്പെടും. കൂടാതെ, ചെല്ലാനത്ത് മണ്ണെണ്ണ, ഡീസൽ, പെട്രോൾ എന്നിവ ലഭ്യമാക്കുന്നതിനായി താൽക്കാലിക ബങ്ക് സ്ഥാപിക്കാനുള്ള നടപടികൾ വേഗത്തിലാക്കുമെന്നും കളക്ടർ അറിയിച്ചു.

​കർശന നിയന്ത്രണങ്ങളും പരിശോധനയും

​നിരോധന കാലയളവിൽ കടലിൽ പോകുന്ന ഇൻബോർഡ് വള്ളങ്ങളിൽ മതിയായ ജീവൻ രക്ഷാ ഉപകരണങ്ങൾ, ആശയവിനിമയ സംവിധാനങ്ങൾ, തിരിച്ചറിയൽ രേഖകൾ എന്നിവ നിർബന്ധമായും ഉണ്ടായിരിക്കണം. നിയമാനുസൃത കണ്ണിവലിപ്പമുള്ള വലകൾ മാത്രമേ ഉപയോഗിക്കാവൂ. അനുമതിയില്ലാത്ത വലകൾ ഉപയോഗിച്ച് അടിത്തട്ട് മത്സ്യബന്ധനം നടത്തി കിളിമീൻ, അരണ മീൻ മുതലായ ചെറുകിട മത്സ്യങ്ങളെയും മത്സ്യക്കുഞ്ഞുങ്ങളെയും നശിപ്പിക്കുന്നവർക്കെതിരെ കർശന നിയമനടപടി സ്വീകരിക്കും. അന്യസംസ്ഥാന ബോട്ടുകൾ നിരോധനം തുടങ്ങുന്നതിന് മുൻപ് തന്നെ കേരള തീരം വിട്ടു പോകണം. ട്രോളിങ് നിരോധന സമയത്ത് ഭക്ഷ്യസുരക്ഷാ വകുപ്പുമായി ചേർന്ന് ഹാർബറുകളിലും മാർക്കറ്റുകളിലും കർശന പരിശോധന നടത്തുമെന്നും അധികൃതർ വ്യക്തമാക്കി.

​സൗജന്യ റേഷനും സുരക്ഷാ ക്രമീകരണങ്ങളും

​നിരോധനം മൂലം തൊഴിൽ നഷ്ടപ്പെടുന്ന മത്സ്യത്തൊഴിലാളികൾക്ക് ജില്ലാ സപ്ലൈ ഓഫീസർ മുഖാന്തിരം സൗജന്യ റേഷൻ വിതരണം ചെയ്യും. ഫോർട്ട് കൊച്ചിയിലും വൈപ്പിനിലും മത്സ്യത്തൊഴിലാളികളുടെ വാഹനങ്ങൾ പാർക്ക് ചെയ്യുന്നതിന് ആവശ്യമായ ക്രമീകരണങ്ങൾ ഒരുക്കാൻ പോലീസിനെ ചുമതലപ്പെടുത്തി. അടിയന്തര ആരോഗ്യ പരിചരണങ്ങൾക്കായി മുനമ്പം കേന്ദ്രീകരിച്ച് രണ്ട് '108' ആംബുലൻസുകൾ അനുവദിക്കാൻ ജില്ലാ മെഡിക്കൽ ഓഫീസർക്ക് നിർദ്ദേശം നൽകിയിട്ടുണ്ട്.

​കടലിലെ അടിയന്തര രക്ഷാപ്രവർത്തനങ്ങൾക്കായി ചെല്ലാനത്ത് കോസ്റ്റൽ പോലീസിന്റെ ബോട്ടും മറൈൻ ആംബുലൻസും പ്രവർത്തനസജ്ജമാക്കും. സുരക്ഷ ഉറപ്പാക്കുന്നതിന്റെ ഭാഗമായി വൈപ്പിൻ ഫിഷറീസ് സ്റ്റേഷനിലും മുനമ്പം കൺട്രോൾ റൂമിലും 10 പോലീസ് ഉദ്യോഗസ്ഥരെ വീതം അധികമായി നിയോഗിക്കും.

​24 മണിക്കൂറും പ്രവർത്തിക്കുന്ന കൺട്രോൾ റൂം

​മത്സ്യത്തൊഴിലാളികളുടെ സഹായത്തിനായി വൈപ്പിൻ ഫിഷറീസ് സ്റ്റേഷനിൽ 24 മണിക്കൂറും പ്രവർത്തിക്കുന്ന കൺട്രോൾ റൂം തുറന്നിട്ടുണ്ട്.

​ഫോൺ നമ്പറുകൾ: 0484-2502768, 9496007048

​ജില്ലാ കളക്ടറുടെ അധ്യക്ഷതയിൽ ചേർന്ന യോഗത്തിൽ ഫിഷറീസ് വകുപ്പ് ഡയറക്ടർ വി. ചെൽസാസിനി, ഫിഷറീസ് ഡെപ്യൂട്ടി ഡയറക്ടർ മാജാ ജോസ് പി, മറ്റ് വിവിധ വകുപ്പ് ഉദ്യോഗസ്ഥർ, മത്സ്യത്തൊഴിലാളി-ബോട്ട് ഉടമ സംഘടനാ പ്രതിനിധികൾ തുടങ്ങിയവർ പങ്കെടുത്തു.