ഷാജി പാപ്പന്റെ വരവ് മാർച്ച് 19 ന് ആവേശമായി ആട് 3 ലെ പുതിയ വീഡിയോ ഗാനം പുറത്ത്
മിഥുൻ മാനുവൽ തോമസ് സംവിധാനം ചെയ്യുന്ന ആട് 3 ലെ ആവേശകരമായ വീഡിയോ ഗാനം പുറത്തിറങ്ങി. ജയസൂര്യയും സംഘവും വീണ്ടും വിസ്മയിപ്പിക്കാനൊരുങ്ങുന്ന ചിത്രത്തിൽ തെന്നിന്ത്യൻ താരം വേദികയുടെ തകർപ്പൻ പ്രകടനമാണ് ഗാനരംഗത്തുള്ളത്.
Vazhoor Jose 
കൊച്ചി: മലയാള സിനിമയിൽ വലിയ ആരാധകവൃന്ദമുള്ള ഷാജി പാപ്പനും സംഘവും മൂന്നാം വരവിനൊരുങ്ങുന്നു. മിഥുൻ മാനുവൽ തോമസ് തിരക്കഥയെഴുതി സംവിധാനം ചെയ്യുന്ന ‘ആട് 3’ (Aadu 3) എന്ന ചിത്രത്തിലെ ഏറ്റവും പുതിയ വീഡിയോ ഗാനം പുറത്തിറങ്ങി. "ഭൂലോകം വെല്ലാനായ് പോരണ സുൽത്താൻ" എന്ന് തുടങ്ങുന്ന ആഘോഷഗാനമാണ് അണിയറപ്രവർത്തകർ പുറത്തുവിട്ടത്.
ഫ്രൈഡേ ഫിലിം ഹൗസും കാവ്യ ഫിലിം കമ്പനിയും ചേർന്ന് വിജയ് ബാബു, വേണു കുന്നപ്പള്ളി എന്നിവരാണ് ചിത്രം നിർമ്മിക്കുന്നത്. പുറത്തിറങ്ങി നിമിഷങ്ങൾക്കകം തന്നെ സമൂഹമാധ്യമങ്ങളിൽ തരംഗമായി മാറിയ ഗാനത്തിൽ തെന്നിന്ത്യൻ താരം വേദികയാണ് ചുവടുവെച്ചിരിക്കുന്നത്. മനു മഞ്ജിത്തിന്റെ വരികൾക്ക് ഷാൻ റഹ്മാൻ ഈണമൊരുക്കിയ ഗാനം ആലപിച്ചിരിക്കുന്നത് അനില ഈശ്വറാണ്. ചിത്രത്തിന്റെ കഥാപുരോഗതിയിൽ ഏറെ നിർണ്ണായകമായ ഒരു ഘട്ടത്തിലാണ് ഈ ഗാനം കടന്നുവരുന്നത്.
ഫാന്റസിയും ഹ്യൂമറും ഒത്തുചേരുന്ന ഒരു ക്ലീൻ എന്റർടൈനറായാണ് ആട് 3 ഒരുങ്ങുന്നത്. വലിയ ബജറ്റിലൊരുങ്ങുന്ന ചിത്രത്തിൽ ജയസൂര്യക്കൊപ്പം വിനായകൻ, സണ്ണി വെയ്ൻ, സൈജു കുറുപ്പ്, ഇന്ദ്രൻസ്, വിജയ് ബാബു, അജു വർഗീസ് തുടങ്ങി വലിയൊരു താരനിര തന്നെയുണ്ട്. ഹോളിവുഡ് താരം ലാറയും പ്രധാന വേഷത്തിലെത്തുന്നു എന്ന പ്രത്യേകതയുമുണ്ട്. മാർച്ച് 19-ന് ചിത്രം തിയേറ്ററുകളിലെത്തും.
അഖിൽ ജോർജ് ഛായാഗ്രഹണവും ലിജോ പോൾ എഡിറ്റിംഗും നിർവ്വഹിക്കുന്നു. ഷിബു ജി. സുശീലനാണ് പ്രൊഡക്ഷൻ കൺട്രോളർ. ഏറെ കാത്തിരിപ്പിന് ശേഷം എത്തുന്ന പാപ്പന്റെയും ടീമിന്റെയും മൂന്നാം ഭാഗം പ്രേക്ഷകർക്ക് വലിയൊരു ദൃശ്യവിരുന്നായിരിക്കുമെന്ന് ഉറപ്പാണ്.
