സിനിമാക്കഥയെ വെല്ലുന്ന റെയ്ഡ് കുളുവിലെ മഞ്ഞുമലയിൽ വേഷംമാറി കേരള പോലീസ് വൻ മയക്കുമരുന്ന് കേസിലെ പ്രധാനി പിടിയിൽ

​ബംഗളൂരു മയക്കുമരുന്ന് കടത്ത്: രണ്ടുവർഷമായി ഒളിവിലായിരുന്ന പ്രധാനപ്രതി കുളുവിൽ അറസ്റ്റിൽ; പോലീസ് വലയിലാക്കിയത് വിനോദസഞ്ചാരികളായി വേഷംമാറി

എറണാകുളം: ബംഗളൂരുവിൽനിന്ന് കേരളത്തിലേക്ക് വൻതോതിൽ മയക്കുമരുന്ന് കടത്തിയ കേസിലെ പ്രധാനപ്രതി രണ്ട് വർഷത്തിന് ശേഷം പോലീസ് പിടിയിലായി. തൃശൂർ തലപ്പിള്ളി പൈങ്കുളം മങ്ങാട്ടുതൊടി വീട്ടിൽ രാഗേഷ് (ജുമാഞ്ചി - 32) നെയാണ് നെടുമ്പാശ്ശേരി പോലീസ് ഹിമാചൽ പ്രദേശിലെ കുളുവിൽനിന്ന് പിടികൂടിയത്.

​2024 ജൂൺ 27-ന് ബംഗളൂരുവിൽനിന്ന് കാറിൽ കടത്തുകയായിരുന്ന 316 ഗ്രാം എം.ഡി.എം.എ, രണ്ട് എൽ.എസ്.ഡി സ്റ്റാമ്പുകൾ, 420 ഗ്രാം കഞ്ചാവ് എന്നിവ അത്താണിയിൽ വച്ചാണ് പോലീസ് പിടിച്ചെടുത്തത്. സംഭവവുമായി ബന്ധപ്പെട്ട് ആലുവ ചാലയ്ക്കൽ തോട്ടുമുഖം സ്വദേശി ആസാദ് (38), മലപ്പുറം തിരൂരങ്ങാടി സ്വദേശി ഹരികൃഷ്ണൻ (28) എന്നിവരെ നേരത്തെ അറസ്റ്റ് ചെയ്യുകയും ഇവർ സഞ്ചരിച്ച വാഹനം കസ്റ്റഡിയിലെടുക്കുകയും ചെയ്തിരുന്നു.

​ലഹരിമരുന്ന് വാങ്ങുന്നതിനായി സാമ്പത്തിക സഹായം നൽകിയത് രാഗേഷായിരുന്നു. കൂട്ടാളികൾ പിടിയിലായ വിവരമറിഞ്ഞതോടെ ഇയാൾ ഹിമാചൽ പ്രദേശിലേക്ക് കടക്കുകയായിരുന്നു. കുളുവിലെ ബേസ് ക്യാമ്പിൽനിന്ന് 20 കിലോമീറ്റർ മുകളിലുള്ള മലനിരകളിലെ റിസോർട്ടിൽ ടൂറിസ്റ്റ് ഗൈഡായി വേഷംമാറിയാണ് ഇയാൾ ഒളിവിൽ കഴിഞ്ഞിരുന്നത്.

​ഭൂപ്രകൃതിപരമായ പ്രയാസങ്ങൾ കാരണം ഇവിടെയെത്തി പ്രതിയെ പിടികൂടുന്നത് അങ്ങേയറ്റം ദുഷ്കരമായിരുന്നു. തുടർന്ന് അന്വേഷണസംഘം വിനോദസഞ്ചാരികളെന്ന വ്യാജേന ദിവസങ്ങളോളം ഈ റിസോർട്ടിൽ താമസിച്ച് സാഹസികമായാണ് രാഗേഷിനെ കസ്റ്റഡിയിലെടുത്തത്.

​ജില്ലാ പോലീസ് മേധാവി കെ.എസ്. സുദർശന്റെ നേതൃത്വത്തിൽ ഡി.വൈ.എസ്.പി ബൈജു പൗലോസ്, സർക്കിൾ ഇൻസ്പെക്ടർ ബി.കെ. അരുൺ, എസ്.ഐമാരായ അരുൺ രാജ്, റോണി അഗസ്റ്റിൻ, എ.എസ്.ഐ എം.വി. ബിനു, സി.പി.ഒ സജാസ് എന്നിവരടങ്ങിയ സംഘമാണ് പ്രതിയെ വലയിലാക്കിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.