ഇന്ദ്രൻസ് ജോൺ പോൾ ജോർജ് ചിത്രം ആശാൻ ആഗോള റിലീസ് നാളെ
ഒരു കൊമേഴ്സ്യൽ ചിത്രത്തിൽ ഇന്ദ്രൻസ് നായകനായി എത്തുന്നു എന്ന പ്രത്യേകതയുമായാണ് ആശാൻ പ്രേക്ഷകരിലേക്ക് എത്തുന്നത്.
Sabari
129
ഇന്ദ്രൻസ്-ജോൺ പോൾ ജോർജ് ചിത്രം 'ആശാൻ' പ്രിവ്യൂവിന് ഗംഭീര പ്രതികരണം; ബുക്കിംഗ് ആരംഭിച്ചു, ആഗോള റിലീസ് നാളെ
കൊച്ചി: 'ഗപ്പി', 'അമ്പിളി' എന്നീ ചിത്രങ്ങൾക്ക് ശേഷം ജോൺ പോൾ ജോർജ് സംവിധാനം ചെയ്ത 'ആശാൻ' പ്രിവ്യൂ ഷോയ്ക്ക് കൊച്ചിയിൽ ആവേശകരമായ തുടക്കം. സിനിമയുടെ അണിയറ പ്രവർത്തകരും സിനിമാ രംഗത്തെ പ്രമുഖരും മാധ്യമപ്രവർത്തകരും പങ്കെടുത്ത ഷോയ്ക്ക് ശേഷം മികച്ച പ്രതികരണമാണ് ചിത്രത്തിന് ലഭിക്കുന്നത്. ഇന്ദ്രൻസും ജോമോൻ ജ്യോതിറും പ്രധാന വേഷങ്ങളിലെത്തുന്ന ചിത്രം ഫെബ്രുവരി 5-ന് ലോകമെമ്പാടുമുള്ള തീയേറ്ററുകളിൽ പ്രദർശനത്തിനെത്തും.
സിനിമയ്ക്കുള്ളിലെ സിനിമ; വേറിട്ട പ്രമേയം
ഒരു കൊമേഴ്സ്യൽ ചിത്രത്തിൽ ഇന്ദ്രൻസ് നായകനായി എത്തുന്നു എന്ന പ്രത്യേകതയുമായാണ് 'ആശാൻ' പ്രേക്ഷകരിലേക്ക് എത്തുന്നത്. സിനിമയുടെ പിന്നാമ്പുറ കഥകളും സിനിമാ മോഹികളായ മനുഷ്യരുടെ ജീവിതവുമാണ് ചിത്രം പ്രമേയമാക്കിയിരിക്കുന്നത്. ആദ്യാവസാനം കോമഡിയും ഡ്രാമയും നിറഞ്ഞ ഈ എന്റർടൈനർ മലയാള സിനിമയിൽ ഇതുവരെ പരീക്ഷിക്കാത്ത രീതിയിലുള്ള ഒന്നാണെന്ന് പ്രിവ്യൂ കണ്ടവർ അഭിപ്രായപ്പെടുന്നു.
തകർപ്പൻ പ്രകടനവുമായി ഇന്ദ്രൻസും ജോമോൻ ജ്യോതിറും
നാല് പതിറ്റാണ്ടിലേറെ നീണ്ട അഭിനയജീവിതമുള്ള ഇന്ദ്രൻസിന്റെ കരിയറിലെ ഏറ്റവും മികച്ച വേഷങ്ങളിലൊന്നാണ് 'ആശാൻ'. താരത്തിന്റെ അഭിനയ മുഹൂർത്തങ്ങൾ ചിത്രത്തിന്റെ ഹൈലൈറ്റാണ്. ജോമോൻ ജ്യോതിർ തന്റെ കരിയർ ബെസ്റ്റ് പ്രകടനം പുറത്തെടുത്തപ്പോൾ ഷോബി തിലകൻ, ബിബിൻ പെരുമ്പിള്ളി എന്നിവരും ശ്രദ്ധേയമായ വേഷങ്ങൾ കൈകാര്യം ചെയ്തിരിക്കുന്നു. നൂറിലധികം പുതുമുഖങ്ങളും ചിത്രത്തിൽ അണിനിരക്കുന്നുണ്ട്.
മമ്മൂട്ടിയുടെ പ്രശംസ
മലയാളത്തിൽ ഇതുവരെ കാണാത്ത തരത്തിലുള്ള ഒരു അത്ഭുത സിനിമയാകാൻ 'ആശാൻ' സാധ്യതയുണ്ടെന്ന് ചിത്രത്തിന്റെ ട്രെയിലർ ലോഞ്ചിനിടെ മെഗാസ്റ്റാർ മമ്മൂട്ടി അഭിപ്രായപ്പെട്ടിരുന്നു. സാങ്കേതിക നിലവാരത്തിലും പ്രകടനത്തിലും ചിത്രം മുൻപന്തിയിലാണെന്ന മമ്മൂട്ടിയുടെ വാക്കുകൾ ശരിവെക്കുന്നതാണ് ഇപ്പോൾ പുറത്തുവരുന്ന പ്രിവ്യൂ റിപ്പോർട്ടുകൾ.
അണിയറ പ്രവർത്തകർ
ദുൽഖർ സൽമാന്റെ വേഫെറർ ഫിലിംസാണ് ചിത്രം കേരളത്തിൽ വിതരണത്തിനെടുത്തിരിക്കുന്നത്. ഗപ്പി സിനിമാസിനൊപ്പം ചേർന്ന് ജോൺ പോൾ ജോർജ്, അന്നം ജോൺ പോൾ, സൂരജ് ഫിലിപ്പ് ജേക്കബ് എന്നിവർ ചേർന്നാണ് നിർമ്മാണം.
ഛായാഗ്രഹണം: വിമൽ ജോസ് തച്ചിൽ
എഡിറ്റർ: കിരൺ ദാസ്
സംഗീതം: ജോൺ പോൾ ജോർജ്
പശ്ചാത്തല സംഗീതം: അജീഷ് ആന്റോ
സൗണ്ട് ഡിസൈൻ: എം.ആർ രാജാകൃഷ്ണൻ
ചിത്രത്തിലെ ഗാനങ്ങൾ ഇതിനോടകം തന്നെ ഹിറ്റ് ചാർട്ടുകളിൽ ഇടംപിടിച്ചിട്ടുണ്ട്. ഒരു ഗാനത്തിന് ഇന്ദ്രൻസ് ശബ്ദം നൽകി എന്നതും പ്രത്യേകതയാണ്. കേരളത്തിലുടനീളം ചിത്രത്തിന്റെ ഓൺലൈൻ ടിക്കറ്റ് ബുക്കിംഗ് ആരംഭിച്ചു കഴിഞ്ഞു.
