എലത്തൂർ സീറ്റിനെച്ചൊല്ലി എൻസിപിയിൽ തർക്കം എ.കെ. ശശീന്ദ്രൻ യോഗത്തിൽനിന്നിറങ്ങിപ്പോയി
എലത്തൂർ സീറ്റിലെ സ്ഥാനാർത്ഥിത്വത്തെ ചൊല്ലി എൻസിപി യോഗത്തിൽ വൻ തർക്കം. പി.സി. ചാക്കോയുടെ നിലപാടിൽ പ്രതിഷേധിച്ച് മന്ത്രി എ.കെ. ശശീന്ദ്രൻ യോഗം ബഹിഷ്കരിച്ചു.
Angel Varghese 
എലത്തൂർ സീറ്റിനെച്ചൊല്ലി എൻസിപിയിൽ തർക്കം; പി.സി. ചാക്കോയുമായി ഉടക്കി എ.കെ. ശശീന്ദ്രൻ യോഗത്തിൽനിന്നിറങ്ങിപ്പോയി
കോഴിക്കോട്: എലത്തൂർ നിയമസഭാ സീറ്റിലെ സ്ഥാനാർത്ഥിത്വത്തെച്ചൊല്ലി എൻസിപിയിൽ (NCP) ഭിന്നത രൂക്ഷമാകുന്നു. ഇത്തവണ എ.കെ. ശശീന്ദ്രൻ മത്സരിക്കാതെ മാറിനിൽക്കണമെന്ന് പാർട്ടി സംസ്ഥാന അധ്യക്ഷൻ പി.സി. ചാക്കോ ആവശ്യപ്പെട്ടതോടെ മന്ത്രി യോഗത്തിൽനിന്ന് ഇറങ്ങിപ്പോയി. ഏകപക്ഷീയമായ ചർച്ചയാണ് നടക്കുന്നതെന്ന് ആരോപിച്ചാണ് ശശീന്ദ്രൻ അതൃപ്തി പരസ്യമാക്കിയത്.
"കൂടിയാലോചനകൾ ഇല്ലാതെ ഏകപക്ഷീയമായി തീരുമാനങ്ങൾ പ്രഖ്യാപിക്കാനാണെങ്കിൽ പിന്നെ യോഗം ചേരേണ്ട ആവശ്യമില്ലല്ലോ" എന്ന് ശശീന്ദ്രൻ പ്രതികരിച്ചു. കഴിഞ്ഞ പത്തു വർഷമായി മന്ത്രിസ്ഥാനത്തുള്ള ശശീന്ദ്രൻ മാറി മറ്റൊരാൾക്ക് വഴിമാറിക്കൊടുക്കണമെന്നാണ് പി.സി. ചാക്കോ പക്ഷത്തെ ഒരു വിഭാഗം നേതാക്കളുടെ ആവശ്യം.
എലത്തൂരിൽ ശശീന്ദ്രനെതിരെ ശക്തമായ പ്രാദേശിക വികാരമുണ്ടെന്നും അദ്ദേഹം വീണ്ടും മത്സരിച്ചാൽ തിരിച്ചടിയുണ്ടാകുമെന്നുമാണ് ജില്ലാ നേതാക്കളുടെ പരാതി. എന്നാൽ, പാർട്ടി ആവശ്യപ്പെട്ടാൽ എലത്തൂരിൽ തന്നെ ഇത്തവണയും പോരാട്ടത്തിനിറങ്ങുമെന്ന നിലപാടിൽ ഉറച്ചുനിൽക്കുകയാണ് മന്ത്രി. മുന്നണിയിലെ പ്രധാന ഘടകകക്ഷിയായ എൻസിപിയിലെ ഈ തർക്കം വരുംദിവസങ്ങളിൽ എൽഡിഎഫിനുള്ളിലും ചർച്ചയായേക്കും.
