തൊഴിലുറപ്പ് പദ്ധതി ഇനി വിബി ജി റാം ജി
തൊഴിലുറപ്പ് പദ്ധതി ഇനി വിബി ജി റാം ജി 125 തൊഴിൽദിനങ്ങൾ ഉറപ്പാക്കുന്ന ബില്ലിന് രാഷ്ട്രപതിയുടെ അംഗീകാരം
Angel Varghese 
തൊഴിലുറപ്പ് പദ്ധതി ഇനി 'വിബി ജി റാം ജി'; 125 തൊഴിൽദിനങ്ങൾ ഉറപ്പാക്കുന്ന ബില്ലിന് രാഷ്ട്രപതിയുടെ അംഗീകാരം
ന്യൂഡൽഹി: രാജ്യത്തെ ഗ്രാമീണ തൊഴിലുറപ്പ് മേഖലയിൽ വിപ്ലവകരമായ മാറ്റങ്ങൾ ലക്ഷ്യമിട്ട് കേന്ദ്രസർക്കാർ കൊണ്ടുവന്ന പുതിയ ബില്ലിന് രാഷ്ട്രപതി ദ്രൗപദി മുർമു അംഗീകാരം നൽകി. മഹാത്മാഗാന്ധി ഗ്രാമീണ തൊഴിലുറപ്പ് പദ്ധതിക്ക് (MGNREGA) പകരമായി അവതരിപ്പിച്ച 'വികസിത് ഭാരത് ഗാരന്റി ഫോർ റോസ്ഗാർ ആൻഡ് അജീവിക മിഷൻ-ഗ്രാമീൺ' (VB GRAM-G) ബില്ലാണ് ഇനി നിയമമാകുന്നത്. കഴിഞ്ഞ ദിവസങ്ങളിൽ ലോക്സഭയിലും രാജ്യസഭയിലും ബിൽ പാസായിരുന്നു.
കേന്ദ്ര ഗ്രാമവികസന മന്ത്രി ശിവരാജ് സിങ് ചൗഹാനാണ് പാർലമെന്റിൽ ബിൽ അവതരിപ്പിച്ചത്. പുതിയ നിയമപ്രകാരം ഗ്രാമീണ കുടുംബങ്ങൾക്കുള്ള കുറഞ്ഞ തൊഴിൽദിനങ്ങൾ 100-ൽനിന്ന് 125 ദിവസമായി ഉയർത്തി. ഇത് ഗ്രാമീണ മേഖലയിൽ കൂടുതൽ വരുമാന സുരക്ഷിതത്വം ഉറപ്പാക്കുമെന്ന് സർക്കാർ അവകാശപ്പെടുന്നു.
പ്രതിപക്ഷ പ്രതിഷേധം
പദ്ധതിയുടെ പേരിൽനിന്ന് മഹാത്മാഗാന്ധിയുടെ പേര് ഒഴിവാക്കിയതിനെതിരെ പ്രതിപക്ഷം പാർലമെന്റിൽ ശക്തമായ പ്രതിഷേധം രേഖപ്പെടുത്തി. പുതിയ ബില്ലിലെ വ്യവസ്ഥകൾ സംസ്ഥാനങ്ങൾക്ക് അധിക സാമ്പത്തിക ബാധ്യത വരുത്തിവെക്കുമെന്നും ആക്ഷേപമുണ്ട്. പ്രതിപക്ഷത്തിന്റെ ശക്തമായ ബഹളത്തിനിടയിലാണ് ഇരുസഭകളും ബിൽ പാസാക്കിയത്.
