ചിന്നക്കനാലിൽ കാട്ടാന ആക്രമണത്തിൽ കൊല്ലപ്പെട്ട മാരിയുടെ കുടുംബത്തിന് 5 ലക്ഷം രൂപ ധനസഹായം നൽകുമെന്ന് മന്ത്രി ഷിബു ബേബി ജോൺ

ചിന്നക്കനാലിൽ കാട്ടാനയുടെ ആക്രമണത്തിൽ കൊല്ലപ്പെട്ട സൂര്യനെല്ലി സ്വദേശി മാരിയുടെ കുടുംബത്തിന് അടിയന്തര സഹായമായി 5 ലക്ഷം രൂപ പ്രഖ്യാപിച്ച് വനംവകുപ്പ്. കുട്ടികളുടെ സംരക്ഷണവും വിദ്യാഭ്യാസവും സർക്കാർ ഏറ്റെടുക്കുമെന്ന് വനംമന്ത്രി ഷിബു ബേബി ജോൺ അറിയിച്ചു

അനില എം കൃഷ്ണൻ

Jun 9, 2026 - 19:39

ചിന്നക്കനാലിൽ കാട്ടാന ആക്രമണത്തിൽ കൊല്ലപ്പെട്ട മാരിയുടെ കുടുംബത്തിന് 5 ലക്ഷം രൂപ ധനസഹായം നൽകുമെന്ന് മന്ത്രി ഷിബു ബേബി ജോൺ

കാട്ടാന ആക്രമണത്തിൽ കൊല്ലപ്പെട്ട മാരി, മക്കൾ രക്ഷൻ, രക്ഷിത എന്നിവർക്കൊപ്പം

♥️ *നിങ്ങൾക്ക് ഞങ്ങളുടെ വാർത്തകൾ ഇഷ്ടപ്പെടുന്നുണ്ടോ*?

ചിന്നക്കനാലിൽ കാട്ടാന ആക്രമണത്തിൽ കൊല്ലപ്പെട്ട മാരിയുടെ കുടുംബത്തിന് അഞ്ചുലക്ഷം ധനസഹായം; കുട്ടികളുടെ സംരക്ഷണം വനംവകുപ്പ് ഏറ്റെടുക്കും

ഇടുക്കി: ചിന്നക്കനാലിൽ കാട്ടാനയുടെ ആക്രമണത്തിൽ കൊല്ലപ്പെട്ട സൂര്യനെല്ലി സ്വദേശി മാരിയുടെ കുടുംബത്തിന് ആദ്യസഹായമായി അഞ്ചുലക്ഷം രൂപ നൽകുമെന്ന് വനംമന്ത്രി ഷിബു ബേബി ജോൺ അറിയിച്ചു. ദുരന്തത്തിന് ഇരയായ കുടുംബത്തെ സർക്കാർ കൈവിടില്ലെന്നും മാരിയുടെ കുട്ടികളുടെ പൂർണ്ണ ഉത്തരവാദിത്തം വനംവകുപ്പ് ഏറ്റെടുക്കുമെന്നും മന്ത്രി വ്യക്തമാക്കി.

കൊല്ലപ്പെട്ട മാരിയുടെ രണ്ട് മക്കളുടെയും ബാങ്ക് അക്കൗണ്ടുകളിൽ രണ്ടരലക്ഷം രൂപ വീതം നിക്ഷേപിക്കും. കുട്ടികളുടെ മേൽനോട്ടത്തിനായി ഒരു ഫോറസ്റ്റ് ഉദ്യോഗസ്ഥനെ പ്രത്യേക 'മെന്ററായി' നിയോഗിക്കും. കൂടാതെ കുട്ടികൾക്ക് എല്ലാ മാസവും 5000 രൂപ വീതം ധനസഹായം നൽകുമെന്നും മന്ത്രി അറിയിച്ചു.

"മാതാപിതാക്കൾ മരിച്ചാൽ കുട്ടികൾ വഴിയാധാരമാകുന്ന സാഹചര്യം ഇനി ഉണ്ടാകില്ല. അവരുടെ പൂർണ്ണ സംരക്ഷണം സർക്കാർ ഏറ്റെടുക്കും. കുട്ടികൾക്കുള്ള റേഷൻ സൗജന്യമാക്കാനും നടപടി സ്വീകരിക്കും," - വനംമന്ത്രി ഷിബു ബേബി ജോൺ പറഞ്ഞു.

തിങ്കളാഴ്ച രാവിലെ മകനെ സ്കൂളിലാക്കാൻ പോകുന്നതിനിടെയായിരുന്നു മാരി കാട്ടാനയുടെ ആക്രമണത്തിൽ ഇരയായത്. ദാരുണമായ ഈ സംഭവത്തെത്തുടർന്ന് പ്രദേശത്ത് വലിയ രീതിയിലുള്ള പ്രതിഷേധങ്ങൾ ഉയർന്നിരുന്നു. ഇതിന് പിന്നാലെയാണ് അടിയന്തര ഇടപെടലുമായി സർക്കാർ രംഗത്തെത്തിയത്. വന്യജീവി ആക്രമണങ്ങളിൽ ഇരയാകുന്നവരുടെ കുടുംബങ്ങളെ പുനരധിവസിപ്പിക്കുന്നതിൽ മാതൃകാപരമായ സമീപനമാണ് വനംവകുപ്പ് സ്വീകരിക്കുന്നതെന്നും മന്ത്രി കൂട്ടിച്ചേർത്തു.