സ്വർണം ചെമ്പായ് മാറ്റിയേ എന്ന വൈറൽ രണ്ടാം ഭാഗം

സ്വർണം ചെമ്പായ് മാറ്റിയേ...' എന്ന വൈറൽ ഗാനത്തിന്റെ രചയിതാവ്: നാദാപുരം സ്വദേശി ജി.പി. കുഞ്ഞബ്ദുല്ല

​വിശ്വാസികളുടെ മനസ്സിനെ പിളർത്തിയ ശബരിമല സ്വർണക്കൊള്ളയുടെ വേദനയിൽ പിറന്ന 'പോറ്റിയേ കേറ്റിയേ, സ്വര്‍ണം ചെമ്പായ് മാറ്റിയേ...' എന്ന പാരഡി ഗാനം തദ്ദേശതിരഞ്ഞെടുപ്പിൽ യുഡിഎഫിന്റെയും ബിജെപിയുടെയും പ്രചാരണരംഗത്ത് തരംഗമായി. ഖത്തറിൽ ബിസിനസുകാരനായ നാദാപുരം ചാലപ്പുറം സ്വദേശി ജി.പി. കുഞ്ഞബ്ദുല്ലയാണ് ഈ വൈറൽ ഗാനത്തിന് പിന്നിൽ.

​പ്രശസ്തമായ അയ്യപ്പഭക്തിഗാനം 'സ്വാമിയേ അയ്യപ്പോ' എന്നതിന്റെ ഈണത്തിലുള്ള ഈ ഗാനം യൂട്യൂബിൽ ഇതിനോടകം രണ്ട് ദശലക്ഷത്തിലധികം കാഴ്ചക്കാരെ നേടി. യുഡിഎഫ് പ്രചാരണ വേദികളിൽ കേരളത്തിലുടനീളം ഈ ഗാനം മുഴങ്ങി. ശബരിമല സ്വർണക്കവർച്ചയെ ഒരു പ്രചാരണായുധമാക്കാൻ ഈ ഗാനം യുഡിഎഫിന് വലിയ സഹായമായി.

​പാട്ടിന്റെ വിജയത്തെ തുടർന്ന് ഹൈബി ഈഡൻ എംപി, കെപിസിസി വർക്കിംഗ് പ്രസിഡന്റ് പി.സി. വിഷ്ണുനാഥ് എംഎൽഎ, ഡിസിസി പ്രസിഡന്റ് കെ. പ്രവീൺകുമാർ അടക്കമുള്ള പ്രമുഖർ ജി.പി. കുഞ്ഞബ്ദുല്ലയെ വിളിച്ച് അനുമോദിച്ചു. 600-ൽ അധികം പാട്ടുകൾ ഇതിനോടകം എഴുതിയിട്ടുള്ള ഇദ്ദേഹം 30 വർഷമായി യുഡിഎഫിന് വേണ്ടി തിരഞ്ഞെടുപ്പ് ഗാനങ്ങൾ രചിക്കുന്നുണ്ട്. എന്നാൽ ഇത്രയും വ്യാപകമായി ജനം ഏറ്റെടുത്ത പാട്ട് ഇതാണെന്ന് അദ്ദേഹം അഭിപ്രായപ്പെട്ടു.

​ഡാനിഷ് മലപ്പുറമാണ് ഗാനം ആലപിച്ചത്. സിഎംഎസ് മീഡിയ വീഡിയോ ചിത്രീകരണവും സൈബർ പന്തലൂർ നിർമാണവും നിർവഹിച്ചു. സാമൂഹിക മാധ്യമങ്ങളിൽ ട്രെൻഡായ ഗാനം, ലോക്‌സഭയുടെ പ്രചാരണ കവാടത്തിൽ കേരളത്തിലെ എംപിമാർ പാടിയതോടെ കൂടുതൽ ശ്രദ്ധേയമായി. ഈ ഗാനത്തിന്റെ രണ്ടാം ഭാഗം ഉടൻ റിലീസ് ചെയ്യുമെന്നും ജി.പി. കുഞ്ഞബ്ദുല്ല അറിയിച്ചു.

​പാട്ടെഴുത്തിന് പുറമെ 'മാപ്പിളപ്പാട്ടിന്റെ വർണചരിത്രം' എന്ന പേരിൽ അദ്ദേഹം ഒരു പുസ്തകവും രചിച്ചിട്ടുണ്ട്.