നാട്ടികയിൽ ഗീതാ ഗോപി, തൃശൂരിൽ ആലങ്കോട് ലീലാകൃഷ്ണൻ സി.സി മുകുന്ദനെ ഒഴിവാക്കി സിപിഐ സ്ഥാനാർത്ഥി പട്ടിക
സി.പി.ഐ സ്ഥാനാർത്ഥി നിർണ്ണയത്തിൽ സി.സി മുകുന്ദനെ ഒഴിവാക്കി നാട്ടികയിൽ ഗീതാ ഗോപിയെയും തൃശൂരിൽ ആലങ്കോട് ലീലാകൃഷ്ണനെയും നിശ്ചയിച്ചു. ടേം വ്യവസ്ഥയിൽ ഉറച്ച് നേതൃത്വം.
Angel Varghese 
സി.പി.ഐ സ്ഥാനാർത്ഥി പട്ടികയ്ക്ക് അന്തിമരൂപം: നാട്ടികയിൽ ഗീതാ ഗോപി; തൃശൂരിൽ ആലങ്കോട് ലീലാകൃഷ്ണൻ
തൃശൂർ: സി.പി.ഐ സ്ഥാനാർത്ഥി നിർണ്ണയത്തിൽ അപ്രതീക്ഷിത നീക്കങ്ങൾ. നാട്ടികയിൽ സിറ്റിങ് എം.എൽ.എ സി.സി. മുകുന്ദനെ ഒഴിവാക്കി മുൻ എം.എൽ.എ ഗീതാ ഗോപിയെ മത്സരിപ്പിക്കാൻ സംസ്ഥാന നേതൃത്വം തീരുമാനിച്ചു. തൃശൂർ മണ്ഡലത്തിൽ സാംസ്കാരിക മുഖം എന്ന നിലയിൽ കവി ആലങ്കോട് ലീലാകൃഷ്ണനെ സ്ഥാനാർത്ഥിയായി നിശ്ചയിച്ചു.
നാട്ടിക, ചേർപ്പ് കമ്മിറ്റികൾ മുകുന്ദനെതിരെ ഉന്നയിച്ച കടുത്ത എതിർപ്പിനെത്തുടർന്നാണ് നടപടി. അദ്ദേഹം പ്രാദേശിക നേതൃത്വവുമായി അകൽച്ചയിലാണെന്നും പാർട്ടി പരിപാടികളിൽ പങ്കെടുക്കുന്നില്ലെന്നും പരാതി ഉയർന്നിരുന്നു. ജില്ലാ നേതൃത്വം അയച്ച പട്ടികയിൽ ഗീതാ ഗോപിയുടെ പേര് ഉണ്ടായിരുന്നെങ്കിലും അവർക്ക് ആദ്യപരിഗണന ഉണ്ടായിരുന്നില്ല. എന്നാൽ കഴിഞ്ഞ തവണ ടേം വ്യവസ്ഥയുടെ പേരിൽ അവർക്ക് സീറ്റ് നിഷേധിക്കപ്പെട്ടത് കണക്കിലെടുത്താണ് ഇത്തവണ അവസരം നൽകാൻ തീരുമാനിച്ചത്.
തൃശൂരിൽ പി. ബാലചന്ദ്രനും ജയരാജ് വാര്യരും മത്സരിക്കാനില്ലെന്ന് അറിയിച്ചതോടെയാണ് ആലങ്കോട് ലീലാകൃഷ്ണന്റെ പേര് സജീവമായത്. സാംസ്കാരിക രംഗത്ത് നിന്നുള്ള ഒരാൾ വേണമെന്ന തൃശൂർ ജില്ലാ നേതൃത്വത്തിന്റെ ആവശ്യം സംസ്ഥാന സമിതി അംഗീകരിക്കുകയായിരുന്നു.
മറ്റു പ്രധാന തീരുമാനങ്ങൾ:
നാദാപുരം: പി. വസന്തം സ്ഥാനാർത്ഥിയാകും. സി.എൻ. ചന്ദ്രനെ പരിഗണിച്ചെങ്കിലും പിന്തുണ ലഭിച്ചില്ല.
ടേം വ്യവസ്ഥ: മൂന്ന് ടേം പൂർത്തിയാക്കിയവർക്ക് ഇളവ് നൽകേണ്ടതില്ലെന്ന് നിർവ്വാഹകസമിതി കർശന നിലപാടെടുത്തു. പി.എസ്. സുപാൽ, ചിറ്റയം ഗോപകുമാർ, ജി.എസ്. ജയലാൽ എന്നിവർക്കായി ശുപാർശകൾ ഉയർന്നെങ്കിലും നേതൃത്വം തള്ളി.
മുതിർന്ന നേതാക്കൾ: കെ. പ്രകാശ് ബാബു, കെ.പി. രാജേന്ദ്രൻ എന്നിവരെ മത്സരിപ്പിക്കുന്നത് സംബന്ധിച്ച് ചർച്ചകൾ നടന്നുവെങ്കിലും ടേം വ്യവസ്ഥ ലംഘിക്കേണ്ടതില്ലെന്ന് പാർട്ടി തീരുമാനിച്ചു.
